APOCALIPSIS 5

Aqxtaun jalhiki yu jasmilniti ixjunita ali yu Sasꞌatꞌa borrego

1 Astan klaqtsꞌil ni anchanuꞌ yu ixvil taꞌan jalhachimoꞌonunkan, va ixchꞌapata la ixlhijakanaj makaꞌ aqxtaun jalhiki. Va jasmilniti ixjunita y ukxputꞌuy ixtsꞌoqkanta, la ixꞌukxpuꞌ ali ixlhimakan. Ox ixmalakchaukanta, va lakatujun ixlakaltꞌaunkanta. 2 Ex klaqtsꞌil qayntaun ixmayul Dios yu pꞌays lhasakminil, va naul:

—¿Tasꞌayucha paxtoqniy kapuxꞌoqlhi ni aniy jalhiki y kalajꞌexnil taꞌan ltꞌaunikanta?

3 Pero jantu matichun kaꞌalil yu oxicha para kapuxꞌoqlhi ni jalhiki yu jasmilniti ixjunita, mas laktꞌiyan, mas lakatꞌun, mas ixtaꞌapuꞌ lakatꞌun y jantu matiꞌ lay kalaqtsꞌil. 4 Jantu matichun lay kapuxꞌoqlhi ni jalhiki yu jasmilniti ixjunita para lay kalaqtsꞌil, xlhiyucha kitꞌin va ayaj xajqalhun. 5 Ex chuncha qayntaun xapay yu ixvil taꞌan jalhachimoꞌonunkan kijunil:

—Jantucha kꞌaꞌalhu. Alin ni lapanaki yu junkan ni león yu mintachal xalakatꞌun Judá yu ixpapanti David. Yucha maqalhajatacha ixtꞌalaxkaynin. Yucha lay kapuxꞌoqlhi ni jalhiki yu jasmilniti, lay kalajꞌexnil yu lakatujun taꞌan ltꞌaunikanta.

6 Ex chuncha klaqtsꞌil taꞌan jalhachimoꞌonunkan ixyal laqataun Sasꞌatꞌa borrego. Yucha ixtaꞌajyal yu laꞌatꞌati talhitsukuti yu takujta ali yu pꞌuxauntꞌati xapaynin. Ni Sasꞌatꞌa borrego ixtasuy tacha yu maqnikantacha. Ixlhitꞌajun maqatujun ixꞌaqaloqoti ali laqatujun ixlaqchul. Yucha naunputun va laqatujun ixꞌespíritu ni Dios yu jalaqmalaqachal por taꞌakapuchun aniy lakamunukpaꞌ. 7 Chuncha ni Sasꞌatꞌa borrego alcha, va maxtunil ni jalhiki la ixlhijakanaj makaꞌ yu ixvil taꞌan jalhachimoꞌonunkan. 8 Tejkan chꞌapalcha ni jalhiki, ex yu laꞌatꞌati talhitsukuti yu takujta ali yu pꞌuxauntꞌati xapaynin tatatsoqoqtanil la ixlakaꞌukxpuꞌ ni Sasꞌatꞌa borrego. Tachun si ixtalhitꞌajun ixlhisankꞌan yu arpa junkan, va si ixtalhaꞌanta ixpamapꞌuvankꞌan yu si oro ixjunita. Si ox pꞌal ixtavilanal pun. Tejkan ixtaxavay pun yucha naunputun va ixchivintikꞌan ixlapanakni Dios tejkan taskꞌin. 9 Yuꞌuncha ixtamilpay yu sastꞌi milpati yu inchineꞌ najun:

Uxintꞌi laqsaval paxtoqniyan kachꞌapꞌa ni jalhiki

y kaꞌexnin taꞌan ltꞌaunikanta.

Uxintꞌi tꞌamaqxtꞌaqtꞌi para kꞌanitꞌi.

Chuncha kun mijakꞌalna jalaklhiꞌitꞌi lapanakni para Dios,

va yu tachiviniy tachun lhichivin, yu machaqan tachun putaulanaxna,

ali yu minchal taꞌoqxlaqchux lapanakni lakamunukpaꞌ.

10 Uxintꞌi kilamakau jalhachimoꞌonun y kilamakau kuras para kaktapatsaniu Dios.

Kaklhachimoꞌonunau aniy lakamunukpaꞌ.

11 Ex klaqtsꞌil y ijqasmaknil ixchivintikꞌan lhuu ixmayulnin Dios ali yu pumatꞌati yu tatasuy tacha talhitsukuti ali yu xapaynin. Laqalhuu miyones ixtayanal tantilaqachoqo taꞌan jalhachimoꞌonunkan. 12 Ayaj pꞌays ixtachiviniy y ixtanajun:

Ni Sasꞌatꞌa borrego yu moqslakal tacha lapaxkan

yucha lhitꞌajun tachun tapꞌasta, tachun maqaliti,

tachun jatapastakꞌati, xoqta lay makay.

Xlhiyucha tsꞌanqay katoꞌoyau, ay kamakakal y ox kalhichivinkal.

13 Vachuꞌ ijqasmaklhi tachun axtoqnuꞌ yu Dios lakmakal, yu alin laktꞌiyan, ali yu alin lakatꞌun y vachuꞌ yu alin ixtaꞌapuꞌ lakatꞌun ali yu alin laka mar, tachun yu alin ixtanajun:

Yu vil taꞌan jalhachimoꞌonunkan ali yu Sasꞌatꞌa borrego,

vamun yuꞌuncha ay kalakmakakal y kalaktoꞌoyakal y ox kalaklhichivinkal.

Vamun yuꞌuncha talhitꞌajun tapꞌasta mas va tavanancha kaval, jantu aqtaun katamaktal.

14 Chuncha yu laꞌatꞌati talhitsukuti yu takujta ixtanajun:

—¡Chuncha kaval!

Ex yu pꞌuxauntꞌati xapaynin tatatsoqoqtanil y tatoꞌoyal Dios yu kujta mas va tavanancha, jantu aqtaun katamaktal.

<- APOCALIPSIS 4 APOCALIPSIS 6 ->