Ni Karta yu Jalaqtsꞌoqnikal ni

Hebreos

Ni Dios kintatꞌachivinitan por istsꞌal

1 Maqancha ni Dios aqlhuvaj jalaktꞌachivinil kepayankꞌan kun pulhuu axtoqnuꞌ yu makal. Jalaktꞌachivinil por ni lapanakni yu ixtalaqputeꞌey ixchivinti. 2 Pero chavaycha kintatꞌachivinin por isTsꞌal. Ni Dios lakꞌulal isTsꞌal para ixnavin kaval tachun yu alin. Vachuꞌ junil isTsꞌal ni kamakal ni lakamunukpaꞌ kun laktꞌiyan. 3 La ixjatsukunti ni Jesucristo ox tapulkuy y ancha tasuy ixꞌayaxtu ni Dios. Vachuꞌ la ixjatsukunti ancha tasuꞌojoy tacha junita ni Dios. Ixchivinti lhitꞌajun tapꞌasta y por yucha taylhaaniy tachun yu alin. Yucha nil para kamalaqmixinikau kintalaqalhinkꞌan, ex astan taulchal laktꞌiyan la ixlhijakanaj Dios yu ay junita.

Ni Jesucristo apalay ay junita xajantu yu ixmayulnin Dios

4 Jesucristo apalay ay val xajantu yu ixmayulnin Dios. Xlhiyucha ni Dios mapaqaꞌuy Jesucristo Sasꞌatꞌa y chuncha masuy ni apalay ay junita. 5 Ni Dios jantu aqtaun kajunil qayntaun ixmayul chuncha tacha junil ni Jesucristo:

Uxintꞌi va keSꞌatꞌa kꞌatꞌi.

Chavay ikxtaqnincha metsukunti.

Vachu jantu aqtaun kalhichivinil qayntaun ixmayul tacha inchineꞌ:

Kitꞌin kajkunaꞌ ixPay,

yucha kajunaꞌ kinTsꞌal.

6 Vachu tejkan ni Dios malaqachal aniy lakamunukpaꞌ Sasꞌatꞌa yu pꞌunaj ixlhiꞌalinta, ex naul:

Katatoꞌoyal tachun ixmayulnin ni Dios.

7 La ixchivinti Dios taꞌan lhichiviniy ixmayulnin, najun:

Ni yuꞌuncha Dios jalakmapaxay tus tacha un kataval y vachuꞌ tacha jikmi.

Yuꞌuncha tatapatsaniy tacha ixꞌoqxtamatin.

8 Pero yu Dios juniy ni Sasꞌatꞌa:

Ni uxintꞌi, Dios kꞌatꞌi, ni mimpalhachimoꞌon jantu aqtaun kamiꞌoyaꞌ mas va tavanancha kaval.

Uxintꞌi si vas jalhachꞌimoꞌonun.

9 Uxintꞌi vamun achꞌaniy yu la ox junita y xkꞌaꞌiy yu talaqalhin.

Xlhiyucha ni miDios apalay ay lakꞌulatan xajantu yu mintꞌaltanan.

Chuncha xtaqnitan apalay lhuu achati.

10 Vachu junkan Sasꞌatꞌa:

Uxintꞌi Jalhachimoꞌonu kꞌatꞌi, tejkan pꞌunaj aqtaynil ni lakamunukpaꞌ va uxintꞌi makꞌatꞌi xaputayan.

Vachuꞌ kun mimakaꞌ lakmakꞌatꞌi ni laktꞌiyan.

11 Tachun yu anuꞌ kamiꞌoyaꞌ pero uxintꞌi va tacha kꞌaꞌalineꞌecha.

Tachun si kapuchꞌiyaꞌ tacha laqchꞌiti,

12 uxintꞌi kꞌasmiliyeꞌe tacha aqxtaun laqchꞌiti.

Kꞌamapꞌaxayeꞌe kun yu laqsastꞌi.

Pero uxintꞌi jantu aqtaun tꞌapꞌaxay,

yu metsukunti jantu aqtaun kamiꞌoyaꞌ.

13 Vachuꞌ Dios jantu aqtaun kajunil matichun ixmayul chuncha tacha junil Jesús tejkan naul:

Kꞌalhachꞌimoꞌoncha la kilhijakanaj,

tus tejkan klaqmaqalhajaꞌoyaꞌ tachun mintꞌalaxkayan tus kalakꞌakchꞌintꞌamatꞌi.

14 Yu ixmayulnin Dios tatapatsaniy tacha ixꞌoqxtamatin y va espíritus tajunita. Dios jalaqmalaqachay katamil aqtayjunun ni lapanakni yu katalaqtaxtuyaꞌ.

HEBREOS 2 ->