Link to home pageLanguagesLink to all Bible versions on this site
49
Zeikob Tóba Simanal Olmal Bles Ninóp

1 Zeikob tóba simanal olmal ngibaunürr tóbaka. Wa bóktanórr wagó, “Kürü kal-kal kangónam, zitülkus ka kubó yabü nüzazilnümo sab laróga tómbapóne yabüka darrpan-darrpandó, singül kwata ne paila tótókdako.

2 “Yao, darrpan pokodó togob! Tübarrkrru, e Zeikobón simanal olmal!
Kürü bóktan tübarrkrru, ka yabü ab Isrrael!
 
3 “Rruben, ma kürü ngaen olomla,
ma kürü arüngla.
Ka ngaen-gógópan marü mulngumilürrü, ka wirri pam nóma bairrü.
Ma wirri ngi pamla ó marü arüng wirria blaman zoretaldógab.
4 Naiz naeazan busoda, ma inzan ngürsil pamla. Ma sab amkoman wirri pam koke namulo,
zitülkus ma kürü darrü kolpükü umtulürrü,
ó ma kürü ut marrgu ⌊tóman⌋ alópórró.[a]
 
5 “Simion akó Libae narezoretiamli.
Ibü turrik gazirr klamamli elklaza kolae bainüm.
6 Ka sab ibü piküpan ikikdi koke barümo,
akó ibü bóktan tómbapónde koke tang namtino.
Zitülkus módóga, ibü ene ngürsil yarilürr, pam we okrralórr;
i ⌊kau⌋ wapór kus nümgününóp agólgum tibiób ubidügab.
7 Ibü ngürsil sab ki amórrórrón yarilün, zitülkus kari kolae kokea.
Ibü wirri ngürsil sab ki amórrórrón yarilün, zitülkus gyaur babula.
God sab ibü nórrgrróte Zeikobón olmalbobatalab aodó,
akó wa sab ibü nórngene blaman Isrrael tüpdü.
 
8 “Zuda, marü zonaretala sab marü magürnórre.
Ma sab ibü gepko nómóngnónómo, mankü nidi bókrrale.
Marü zonaretala sab marüka wakósingül amgünórre.
9 Zuda, kürü olom, ma ⌊laeon⌋ kupozanla;[b]
su we elóngórró, da we bupadórró, moba pepesdó we alkomórró.
Wa siman laeona, wa wapór tang barrngumilda tüpdü utüdi.
Wa wata óp laeonzana, gum-koke nótóka arsümülüm?
10 Kingan ne arüng bidame, sab oyakagab kokean aupe,
kingan tupuru sab metat oya tangdó yarile,
kókó wa sab tame, kingan arüng noakame;
Blaman pamkolpama sab oya bóktan arrkrru kwarile.
11 Zuda tóba ⌊donki⌋ sab sye amele ⌊grreip⌋ syepordó,
tóba donki kupo sab sye amele amkoman morroalan grreip syepordó.
Wa tóba mórrkenyórr sab waendó bagulóle;
oya kokrrapan mórrkenyórr sab óe-óe grreip more bagulóle.[c]
12 Oya ilküp nisa sab urzan baini waen anónde,
akó oya zirrgüpa sab gabülpli bairre kau mor anónde.
 
13 “Zebulun sab malu minggüpanandó ngyabene,
akó oya malu kabe sab morroal but aren gagat yarile.
Oya tüp ngarkwata sab wame kókóta Saedon wirri basirrdü.
 
14 “Isakarr wa donkizan arüng pama,
tóba mobobdó ne alóp nis ódódda, we kandó ngón ngagónda.
15 Wa sab tóba morroal ngón bagón bwób nóma esene,
akó tüp wa ia morroala,
wa sab arrngürre tóba müp ódódóm,
akó wa sab leba zaget yarile ngibürr pamkolpamabkü.
 
16 “Dan sab tóba pamkolpam nolngomólnórre zazzan.
I sab inzan kwarile, wamaka ngibürr Isrrael zitülzan.
17 Dan sab gwarzan yarile kwat kabedó,
wa büdülngalzan yarile, nótó utóda kwat minggüpanandó,
⌊osan⌋ wakub sab nótó arite.
Ene igósidi, ene osa tang nis sab kwit nine, da ne pam yarile osan mórr kwitüdü, sab kakota aupe.
 
18 “⌊Lodóe⌋, ka zid bainüm marü mókyala!
 
19 “Gadón sab molpokodó agóltagól gómól pama anin korale;
a wa ma sab ibü wirri arüngi kolatale tóba tüpdügab.
 
20 “Asyerran tüpdügab sab morroal mórrela tamle,
akó wa sab morroal misan alo nüliónórre ngibürr king.
 
21 “Naptali wa diazan agólda tebe püóran,
morroal kupo nótó basenda.
 
22 “Zosep wa küppükü syeporzana arób kabedó.
Oya syepor soloa gri malmandasko.[d]
23 Gazirr pama tibiób bügür kyabe gazirrüm ngürsilpükü togobórr.
I bügür numrrutóp kyab amanóm oyaka, oya alzizi amanikdi.
24 A oya bügür kyaba pam dümdüm amanine,
akó Zeikobón Arüng Goda oya tang nis arüng nókyene,
oya ngabkan pam nótóke, ingülküpzan nótóke Zeikobón adlangóm.
25 Marü aban[~5~] God marü sab tangmamtine.
Ene Wirrian Arüng God marü sab bles mine,
wa sab kwitüdügabi marü ngupi bles mine,
wa marü tüpdügabi ne naea tótókda, we klame bles mine,
akó wa marü abün olmale bles mine, akó abün ngabyón lare.
26 Marü aba ne morroal akyanda, wa wirriana.
Ngaep wirri pododógab ne morroala tótókda, wa karia oyakagab,
ngaep kari pododógab ne mórrela tótókda, wa karia oyakagab.
Blaman ene ne morroal kla, Zosepón tangdó ki kwarilün.
Wa tüób tebe-tebe amanikürrüna tóba zonaretaldógabi, ibü balngomólóm.
 
27 “Benzamin wa wirri nurr umezan[~6~] ngürsil pama.
Irrbi wa su akrranda akó almitóda,
akó simam wa gómól-gómól azebórrón elklaza arrgrratóda.”
 

28 Ene Isrrael pamkolpamab blaman 12 zitül kwarilürr. Ibü aban bóktan we kla kwarilürr, wa ibü dómdóm poko nóma nülinóp; wa blaman darrpan-darrpan tóba simanal olmal tibi-tibi dómdóm ngyaben bóktan nüliónónóp.

Zeikobón Büdül

29-30 Zeikob tóba simanal olmal arüng bóktan we nókyenóp wagó, “Ka kólba abalbobatal basen kari pokola. E sab kürü ene kugupi apórrón wirri ingülküpdü gapókdó küngrinamke, kürü abalbobatala nóla utódako. Ene gapók Makpela tüp pokodómase, abüsa nólgabi banikda Mamrre bwóbdügab, Keinan tüpdü. Eibrra-am ene ingülküpdü gapók akó tüp poko darrpan münüm nümiógürr Eprronkagab, Et pam nótó yarilürr, tibiób büdül arrbünüm.[~7~] 31 Ene kugupi apórrón wirri ingülküpdü gapókdó Eibrra-am akó tóba kol Serra we nüngrinóp. Aesak akó tóba kol Rrebeka ta we nüngrinóp, akó Lian ta ka küób ola ungrirrü.[~8~] 32 Ene ne tüp poko akó ingülküpdü gapók kürü bobata Eibrra-am wató nümiógürr Et pamkolpamdógab.”[~9~]

33 Zeikobón dómdóm ikik bókrran bóktana nóma blakónórr tóba olmaldó, wa tóba ut bwóbdü we umtulürr ó dómdóm ngón semanórr, da we nurrótókórr. Da wa tóba abalbobatal nómrrónóp, ngaen nidi nurrbarinóp.[~10~]

<- Bwób Zitül 48Bwób Zitül 50 ->