1 Ɠɔoɠɔ GALAGI ɓɔɛni Moize ʋɔ, é ɠɛ ma: 2 «Ɓɔɛ Aalɔn ʋɔ, è ɠɛ ma: Siɛgi zu è fitina lɔfelaiti seizu la ti-zeizuʋɛti, ɗa ti zei ga pagɔ, nii a kɛ ti-ma zezei ɗa ɠula fitina zei anii ɠakala, ʋelela ʋelei.»
3 Aalɔn kɛɛni ɠana. É fitinaiti seini, fitina zei anii ɠa ʋelela ʋelei, eɠɛʋelei Ɠɔoɠɔ GALAGI ma levei veeni la Moize ya. 4 Pɛtɛ ʋelei fitina zei anii ɓɛtɛni la, é ɠɛni ga zanu doɠai, é zo kɔɠɔi ma, é lɛ ma wulu ʋuaiti pɔ. Ti fitina zei anii ɓɛtɛni, é zoloo naama ɠazaʋigi ma, nii Ɠɔoɠɔ GALAGI dɛɛni ga Moize.
5 Ɠɔoɠɔ GALAGI ɓɔɛni Moize ʋɔ, é ɠɛ ma: 6 «Leevi nuiti seɠe Izelayɛle nuiti saama, è ti ɲade. 7 Wɛlɛ ʋelegi ɗa ti ɲade da. Ɗa ziɛi vaza ti ma, nii é ga ɲade ɗɛi, ti kpekai zeɠe, ti ti-ɓusɛi maaʋɛ pɛ bo da, ti ta-zeɠeiti gba. Tɔgi letemazu ti ɲadegai ɠana. 8 Ta nikɛ zinɛ ɓokpa gila seɠe, é ʋɛɛ vebɛanii ʋa, nii soloogai ma, naa ɠa é ga ɓulu vukɔ ʋagɔi, gaayɔgai ga gulɔi. Ɗɔun ɗa nikɛ zinɛ ɓokpagi velesiɛi zeɠe, é ɠɛ ga koto gba zalaɠai. 9 Ɗa li ga Leevi nuiti GALA daaɠomi seɠe ʋɛlɛi laaʋɛ, è Izelayɛle nuɓusɛiti kpein toli. 10 Ɗa Leevi nuiti maaɓuɠa Ɠɔoɠɔ GALAGI ʋa, Izelayɛle nuiti ti yeei la ti ma. 11 Aalɔn ɠa Leevi nuiti fe nɔ̀un bɛ, Ɠɔoɠɔ GALAGI, Izelayɛle nuiti bɛ, ta lɔ niina nà-botii zu. 12 Leevi nuiti ta yeei ʋɛɛ nikɛ zinɛ felegɔiti unmaʋɛ. Ɗa ti ɠula ga zalaɠai, gilagi ɠɛ ga koto gba zalaɠai, zɔi ɠɛ ga gala zalaɠai, naa ɠa a kɛ koto gba zalaɠai ɠula Leevi nuiti bɛ, eɠɛʋelei tɔgi la. 13 Ɗa Leevi nuiti to Aalɔn ta ná-doun zunuiti kakala, è ti ve Ɠɔoɠɔ GALAGI ʋɛ. 14 Pele ɠana, ɗa Leevi nuiti sei la yɛ, Izelayɛle nuiti saama, ta ɠɛ ga nɔ̀nɔiti. 15 É zo názu ma niina, ta lɔ botii zu, ti ɗa kɛ GALA daaɠomi seɠe ʋɛlɛi wu.
20 Moize ta Aalɔn, ta Izelayɛle nu ʋɛbɛi kpein, ti naa ɠɛɛni Leevi nuiti ta-vaa zu, nii kpein Ɠɔoɠɔ GALAGI ma levei veeni Moize ya, é ʋilɛ ti ʋa. 21 Leevi nuiti ti ɓɔɠɔ ɲadeni, ti ta-zeɠeiti gba. Aalɔn ti veeni Ɠɔoɠɔ GALAGI ʋɛ, é tɔgi ma ɲade fai laazeeli koto gba vai zu ti ʋɛ, nii a kɛ ti ɲade. 22 Naa ʋoluma, Leevi nuiti ti lɔɔni botii zu, GALA daaɠomi seɠe ʋɛlɛi wu, Aalɔn ta ná-doun zunuiti zeezu. Ti kɛɛni ta-vaa zu, eɠɛʋelei nɔ Ɠɔoɠɔ GALAGI ma levei veeni la Moize ya.
23 Ɠɔoɠɔ GALAGI ɓɔɛni mɔnɔ Moize ʋɔ, é ɠɛ ma: 24 «Leevi nuiti ti kona ʋuufelegɔ maazu lɔɔlugɔi (25) zɔlɔɔgai, eyɛsu é lɛ zeemaazu, ta lɔ botii zu, ti ɗa kɛ GALA daaɠomi seɠe ʋɛlɛi wu. 25 Zɔi a kona ʋuulɔɔlugɔ (50) zɔlɔɔna, naa ná-botii ɠa ɠwɛ niina, é la mɔ botii ɠɛa. 26 Toɠa zoo é ɗa ɓɔ kɛɛɠɛleaiti ba GALA daaɠomi seɠe ʋɛlɛi wu, naati ta-wotiiti su, kɛlɛ tɔ ɓɔɠɔi la mɔ botii ɠɛa. Pele ɠana ɗa Leevi nuiti ta-boti vaiti so da.»
<- Gaalu Sɛʋɛi 7Gaalu Sɛʋɛi 9 ->