Zenɛze 49

Zakɔɓe tuya loo vai
ná-doun zunu puugɔ maazu felegɔiti (12) bɛ

1 Zakɔɓe ná-doun zunuiti tolini, é ɠɛ ti ma: «À ɠaalɛ ba, gè faiti bo wo ma, niiti ti ʋaazu ɠɛɛzu ga woye ʋelela ʋelei.»

2 À ɠaalɛ ba, wo woilo mà ga pagɔ, Zakɔɓe ná-doun zunuiti!

À woilo wo-ɠɛɛ Izelayɛle wooi ma!

3 Luɓɛn, ɗa ɠa è ga dòun mɔungi,

nà-zɛbɛi ta sùvikɛi ma mɔungiti,

è-losuʋɛ wɔɔlɔai ti pɛ ba,

è-zɛbɛi wɔɔlɔai ti pɛ ba.

4 È yeeɠaaɓaai eɠɛ ziɛvegi,

è la mɔ nu ɠitela losuʋɛ zɔlɔɔga,

mazɔlɔɔ è lɛɛʋɛ è-ɠɛɛ laa ʋetei zu,

è nà-betei ɠɔzɔʋɛ è lɛɛ vai zu ná.

5 Simiyɔn ta Leevi ta ga kɛɛɠɛlointi,

ta-woɠa zɔkpɔiti ta ga tooma aniiti.

6 Zìi mina ʋɔɔpɛɛ ta-yaava vai ʋa ɲɛgɛlɛin,

nà-kisiɛi mina ɠili ta-ɠaalɛbai ʋa!

Mazɔlɔɔ ti nu ʋaani ta-yiiɠulagi zu,

ti nikɛiti kɔɠɔʋolu ɲataiti teʋeni ta-unsuɲɔi zu.

7 Ta-yiiɠulagi ɠotoʋɛ, mazɔlɔɔ gola ɲɔuʋɛ,

ta-yiiɓadii ɠotoʋɛ!

Nà ti ɠaaɠwɛ Zakɔɓe nɔnɔiti saama,

nà ti vaza Izelayɛle zaama.

8 Zuda, ɗa ɠa è-ɠɛɛlointi ti ʋaazu è maamusɛzu.

È-yeei ɠa ɠɛ è zili nuiti kɔ poluʋɛ.

È-ɠɛɛ ná-doun zunuiti ta ɠɛ nɔkɔsu è wu.

9 Zuda, dòun zunu, ɗa ga zala zinɛ goi,

nii é zeɠezu paa wosuʋɛ!

É ɲiibiiti pɛɛ su, é ʋɛɛ, eɠɛ zalai,

eɠɛ zala zaai, ɓɛ ɠa a zoo é buzeɠe pɛɛzuʋɛ?

10 Kundiɠilai ma lukpɔi la ɠulaa Zuda ʋɛlɛyeɠei ʋa pɛ,

anɛɛ tɔgi maazuɓaa nui ná-poogi la ɠulaa kɔɠɔ yɔɠɔzuʋɛti,

eyɛsu nii tukpɔi ga nɔnɔ naama nui ʋa,

nuiti ti ɠolo bɛ.

11 Toɠa ná-soovalegi ɠili leezɛn lɔkulugi ʋa,

é ná-soovale saai ma yiʋoi ɠili ma lɔkulu pagɔi ʋa.

Toɠa ná-seɠei gba dɔɔ ɗɛi wu,

é ná-seɠe maazu zeɠei gba leezɛin ma ɲamai wu.

12 Gaazuɠɛzɛiti kpɔiʋɛ su ga dɔɔi,

nɔnɔi ɲiigaiti koleʋɛ.

13 Zaɓulɔn ɠa zei Kpoloɗɛ Wolai ɠobaʋɛ yooiti su,

toɠa zei ziɛlaʋɛ, ɓatoiti tosuʋɛ,

ná-zou ɠwɛpelemaʋɛti ta zeeli Sidɔn yooi ʋɔ pelei.

14 Isakaal ɠa ga soovale sinɛi suɓaai,

é laani togani makɛ zasa felegɔiti zɔɠɔzuʋɛ.

15 É ɗa ka ga ná-dooɠo bosuʋɛ ʋagɛ,

zooi wola ʋagɛ.

É ɗa ɓili kasɔi wu,

é ɗa ɓɔɠɔ lɔ duɔlai ma wotii zu.

16 Dan ɠa ná-nuɓusɛiti tukpɔɠaaleʋe,

eɠɛ Izelayɛle ná-bolodai gila.

17 Dan ɠa ɠɛɛzu pelei zu ga kaalii,

é ɠɛ ga pɛɛɠaalii pele goi zu,

é sooi ɲi kɔɠɔ libiligi ʋa,

soo ɠɔma nui loo daazei.

18 Ee, Ɠɔoɠɔ GALAGI, kìtogɛ ɗa-ɠizo fai ʋa!

19 Toosu nuiti ta ʋa Gade laalɔɠɔma,

kɛlɛ toɠa wuzeɠe, é laalɛ ti wu, é ti ziɠa ga ɠɔɠɔi.

20 Asɛɛl ná-zooi zu ɠa daamianigi a ɠɛ ná ga bɔɔlɔa.

Toɠa masa daamiani pagɔi kpein kula.

21 Nɛfetali ɠa ga dopai, é ɓɔɠɔ yeema, é ɗa ʋili,

é ɗa ziʋo ʋagɔiti pu.

22 Zozɛfe ɠa ga gwaa wulu ʋagɔi ma ʋɔnɔbai,

gwaa wulu ʋagɔi ma ʋɔnɔbai, é ziɛungi ɠobaʋɛ.

Ma ɓekegiti buzeɠeʋɛ, ti zɛlɛ siɠigi maazu.

23 Ti ɓaaɠogɛ ma, ti kilɛgiti pili ma.

Kilɛ pili nuiti ti ɠɛni ga tɔun sili nuiti.

24 Kɛlɛ é ná-kilɛgi zogɛ kpaan tɔ ɓɔɠɔi,

zeeiti sulogɛ ga Zakɔɓe ná-Zɛbɛ-Su-ƓALAGI yeeiti,

nii é ga Izelayɛle makɛ nui ta ná-fasai.

25 È-ɠɛɛ ná-GALAGI zaalai zu, nii é ga ɗa-ɓɔba nui,

GALA Zɛbɛi-Pɛ-Maliɠii, nii a tuya loo è ʋɛ,

ɗa tuyaiti sɔlɔɔ, ti zeɠezu maazuʋɛ geeɠɔlɔgi zu,

ta tuyaiti ti ɠulazu ziɛ ɓomaʋɛ zooi wu,

ta doun mɔinmɔingiti ta togani ɓulugiti.

26 È-ɠɛɛ ná-tuyaiti zeeɠaaɓaaʋɛ,

ti leʋe sɔ̀lɔɔ nuiti tɔnɔiti ba,

eyɛsu é zeeli ɠɔoɠɔ gizeiti kwɛgi.

Tuyai naati ti yei Zozɛfe unma,

é yei, é la kɛɛɠɛlointi ta-ɠundiɠii losaamaʋɛ!

27 Ɓɛnzamɛn ɠa ga zuluɓui, nii é anii ʋalizu ga,

sobui é ná-ani zogai mi,

kpɔkɔi, é kɔɔzoganii ɠaaɠwɛ.

28 Naati kpein ka ti ga Izelayɛle ná-boloda puugɔ maazu felegɔiti (12), pele ɠana ti-ɠɛɛ naama ɓɔɛiti boni la ti ma, é ɗa tuya loo ti ʋɛ. É tuya looni ti ʋɛ, ɛsɛ gilagilagi ta nɔnɔ ma luyai.

Zakɔɓe zaa vai

29 Naa ʋolu é nii ma levei veeni ti ya ga: «Nà ga ʋa liizu kɛ̀ɛni pɔ, ti zaai. Wa màaɠulu mɛ̀mɛwolani kobaʋɛ, pugi zu, é Ɠɛte nui Efelon ná-kpalagi zu, 30 Makepeela ɓalagi ma ʋugi zu, Mamelee ɠobaʋɛ, Kanaan yooi zu. Kpalagi naa ɠa Aɓalaame geyani Ɠɛte nui Efelon ma, é ɠɛ bɛ ga maaɠulu bosuʋɛ. 31 Ná nɔ ɠa ti Aɓalaame ta anzai Sala maaɠuluni ná. Ná nɔ ɠa ti Izaake ta anzai Eleɓɛka maaɠuluni ná. Ná nɔ ɠa gè Lea maaɠuluni ná. 32 Kpalagi ta pugi é ɠɛni su, ti ɠeyaa ɠɛni de Ɠɛte nuiti ma.»

33 Siɛgi zu Zakɔɓe ɓeni da ga deveiti fe ná-doun zunuiti zea, é laani ʋolu betei zu, zii looni, é za, é li mɛmɛwolani pɔ ti zaai.

<- Zenɛze 48 Zenɛze 50 ->