1 JON 3

Itəmat u nenətɨ Uhgɨn mɨn

1 !Oteplan-tu! !Nolkeikeən itəm tepət mahgoau kəm kitat,[a] itəm Tata Uhgɨn təmos-ipa, inun, məmə tətaun-in kitat məmə nenətɨn mɨn![b] Kən nɨpahrienən məmə kitat əh. Netəmim rəha nətueintən kəsotɨtunən kitat, məto-inun ilat kotəruru Uhgɨn.[c] 2 Nɨkik mɨn, kitat nenətɨ Uhgɨn mɨn u-roiu. Kitat kəsotɨtunən məmə okotəhrol nulan motol pɨsɨn nian Kristo otɨtəlɨg-pa. Məto kitat kotɨtun məmə nian otɨtəlɨg-pa,[d] kitat okotahmen lan,[e] məto-inu e nian əh, okotəplan əsas məmə in tol nəhlan.[f] 3 Kən etəmim itəm tatagɨle məmə otahmen e Kristo, in tətaruətuəh rəkɨs[g] in atɨp nolən mɨn rəhan,[h] məto-inu Kristo in mɨn in tətuatɨp wɨr agɨn.

4 Etəmim itəm tatol nolən rat, in tatətgəhl mɨn lou rəha Uhgɨn, məto-inu nəghatən u nolən rat, nɨpətɨn u, nətgəhlən lou rəha Uhgɨn. 5 Kən itəmat nəkotɨtun məmə Kristo təmuwa məmə otos-irəkɨs rəhatat nolən rat mɨn,[i] məto-inu nolən rat tɨkə lan.[j] 6 Tol nəhlan, okəmə kitat koatəper-ipən lan, tol-pən okol kəsotəkəikeən e nolən rat mɨn. Məto netəm mɨn un itəm koatəkəike əh e nolən rat mɨn, tol-pən kotəruru agɨn-əh in, məsotəplanən in.[k]

7 Nɨsualkələh, sotətəlɨg-inən suah kit teiuə-in itəmat o nat u. Etəm tatol nat ətuatɨp, nɨpətɨn u məmə in etəm ətuatɨp, tahmen əm e Kristo in etəm ətuatɨp. 8 Məto etəmim itəm tatəkəike əh e nolən rat mɨn, tatəgətun məmə in rəha Setan u, etəm təmatol nolən rat e nətuounən.[l] Məto Nətɨ Uhgɨn təmuwa o nərəkɨnən wək mɨn əh rəha Setan.[m] 9 Netəm mɨn u itəm kəmotaiir wi mɨn motuwa nenətɨ Uhgɨn mɨn,[n] ilat okol kəsotəkəikeən e nolən rat,[o] məto-inu ilat koatos niamɨtə rəha Uhgɨn. Kən o nat u, okol ilat kəsotəkəikeən e nolən rat, məto-inu ilat nenətɨ Uhgɨn mɨn.[p] 10 Tol mə, kotɨtun nənən məmə pah mɨn u nenətɨ Uhgɨn,[q] kənu pah mɨn u nenətɨ Setan.[r] Etəmim u itəm təsol ətuatɨpən, kən in məsolkeikeən pian kit,[s] in sənəmə nətɨ Uhgɨn kit.

Kitat kotəike motolkeike kitat mɨn

11 Nəghatən u inu, nəmotəto e nətuounən e namnusən təwɨr,[t] məmə kitat okotəike motolkeike itat mɨn.[u] 12 Sotolən tɨkɨrɨ Ken, itəm in etəmim rəha Setan kən tohamnu pian.[v] ?Kən təmohamnu pian o naka? Təmohamnu məto-inun rəhan nolən mɨn tərat kənu rəha pian, nolən mɨn in tətuatɨp.[w] 13 Piak mɨn, narmɨtəmat təsiwɨg pɨkən okəmə netəmim rəha nətueintən u koatetəhau itəmat.[x] 14 Okəmə kitat kotolkeike piatat mɨn, tatəgətun məmə kitat kɨnotaprəkɨs-in rəkɨs nɨmɨsən, mɨnotegu-pən e nəmegəhən.[y] Məto etəm un nolkeikeən tɨkə lan, in tətatɨg əh e nɨmɨsən.[z] 15 Etəmim un itəm tatetəhau pian[aa] in tahmen e etəm tatohamnu itəm,[bb] kən itəmat nəkotɨtun məmə iohamnu itəm, in təsosən nəmegəhən lilɨn.[cc]

16 O nat u kitat kotɨtun wɨr məmə nolkeikeən in tol nulan, məto-inun Iesu təmos-ipa rəhan nəmegəhən otat.[dd] Kən e nolən kitiəh əm, təwɨr mə kitat mɨn kotos-ipən nəmegəhən rəhatat o piatat mɨn.[ee] 17 ?Okəmə suah kit rəhan natɨmnat tepət kən pian kit rəhan nat kit tɨkə, məto in təsasəkitunən pian,[ff] məsolən nat agɨn lan, nolkeikeən rəha Uhgɨn otəhrol nulan matɨg e suah u?[gg] 18 Nenətɨk mɨn, pəs kitat kəsotənən nolkeikeən e nohlɨtat əm, məto okotol əp nolkeikeən pahrien e nolən mɨn rəhatat.[hh] 19-20 Okəmə kotol nəhlan, kən nat əpnapɨn okəmə kotəto-pən e nɨkitat məmə okotos nalpɨnən, məto kitat okotɨtun məmə kotatɨg e nɨpahrienən, kən mem məha-məha nɨkitat e nɨganəmtɨn. Məto-inu Uhgɨn in ilɨs maprəkɨs-in nɨkitat, kən in tɨtun natɨmnat rafin.

21 Piak mɨn, okəmə kotəto-pən e nɨkitat məmə okəsotosən nalpɨnən, kitat okəsotagɨnən e nɨganəmtɨ Uhgɨn,[ii] 22 kən motos natɨmnat rafin ron itəm koatətapəhin-pən,[jj] məto-inu kitat koatol nəwian[kk] kən moatol nolən itəm in tolkeike.[ll] 23 Kənu nəghatən u rəhan tatən məmə kotəkəike motahatətə e Nətɨn,[mm] Iesu Kristo,[nn] kən motolkeike kitat mɨn, tahmen məmə inu in təmən mihin kəm itat.[oo] 24 Netəm mɨn u itəm koatol nəwian,[pp] ilat koatəper-ipən lan,[qq] kən in tatəper-ipən elat. Kən kitat kotɨtun məmə in tətatɨg e nɨkitat, məto-inun Narmɨn Rəha Uhgɨn itəm in təmos-ipa, in tatəgətun kəm kitat.[rr]

<- 1 JON 2 1 JON 4 ->