Repelesin 7

Isrel nöbö mö mɨga akwör God ib kɨtɨb nuŋwa pɨmä

1 [~1~]Makwam iswob nugumön, ejol mös mös ñɨŋ mögörɨb rɨb adadö mös mös hörɨrör öbɨl gɨ mɨdön, hödal mös mös pɨ gɨ mɨdön, mögörɨb, ban yuö dib, bɨ bla, gwogwo rölaŋ, me rön, rɨba ñɨŋ keir paŋ paŋ pɨ gɨ mɨdmä. 2 Makwam nɨ nugumön, ejol i naiö wölmɨd möl sebö, God Öim Kömö Mɨd Nöbö aku ap kai kɨt nɨgɨb nuŋ aku rag duön, ejol mös mös God yadmɨn igöp mögörɨb aipam ban yuö dib aipam rɨ gwogwam rɨba rim ejol piaku ñɨgö yadöŋa, 3 [~2~]“Gö nɨgi! God an mabö nuŋwa rɨ nölmɨdöi nöbö mö bla ib kɨtɨb nuŋwa möigw ñɨŋ sö kɨjnɨŋa; mai ñɨŋ hödal abɨŋ, duön mögörɨb, ban yuö dib, bɨ ap bla mɨ rɨ ajö nɨgönɨŋö,” röŋa.

4 [~3~]Makwam mönö i yadmɨn nugumön, nöbö mö God ib kɨtɨb nuŋwa möigw sö kɨtim piaku, Isrel nöbö mö ila hörɨrör akuyöbö nɨgliu pɨn nölmɨn wan hadred poti po tausan (144,000) duöŋa.

5 Nöbö mö piaku, Juda ila aku ñɨŋ 12,000;

Ruben ila aku ñɨŋ 12,000;

Gad ila aku ñɨŋ 12,000;

6 Asa ila aku ñɨŋ 12,000;

Naptalai ila aku ñɨŋ 12,000;

Manasa ila aku ñɨŋ 12,000;

7 Simion ila aku ñɨŋ 12,000;

Lipai ila aku ñɨŋ 12,000;

Isaka ila aku ñɨŋ 12,000;

8 Sebiulan ila aku ñɨŋ 12,000;

Josep ila aku ñɨŋ 12,000;

Benjamin ila aku ñɨŋ 12,000;

aku mɨ, nɨgliu pɨn nölmɨn wan hadred poti po tausan duöŋa.

9 Makwam mönö kai kɨtmɨdɨl kɨ rɨba nugup dumɨdön, iswob rɨba nugwön nugumön, hogw rol kiŋ rola römɨdöŋ Nöbö aku aipam, Sipsip Ha aku aipam mɨdɨm nugugɨrön, nöbö mö mɨga akwör mämäg il rol ñɨŋ yöra öbɨl gɨ mɨdmä. Nöbö mö piaku, mögörɨb adadö rɨg mɨdöi akuyöbö, ila hörɨrör rɨg mɨdöi akuyöbö, mɨxɨña hörɨrör rɨg mɨdöi akuyöbö, mönö yöbö hörɨrör rɨg yadmɨdöi akuyöbö, mögörɨb adadö piaku piaku hörɨrör hön röb gɨ mɨdmä. Nöbö mö iŋ wödɨb maga mɨdölöŋ akuyöbö, magalɨg wölɨj leia akwör yömön, albad panö pɨ gɨ mɨdön, 10 [~4~]God ib nuŋwa yadmɨn bɨl sö dumɨn nugugɨrön, wö diba rön yadmä,

“God ana hogw rol kiŋa römɨd gɨ mɨd aku aipam,

Sipsip Ha aku aipam anɨŋ me rön rɨ ri abim aku mɨ,

kömö dinɨŋö,” rɨmä.

11 Ejol bla magalɨg ñɨŋ Nöbö hogw rol kiŋa römɨd gɨ mɨdöŋ Nöbö aku aipam, yöj nöbö bla aipam, ap kömö mös mös bla aipam, ñɨgö wob yuab gɨ mɨdmä. Ñɨŋ hö pɨn höxmax yuön, iröpa ubɨlön, God ib nuŋwa pɨrag wölön, 12 [~5~]yadmä,

“Mɨ ödöriö!

God ana mɨ ib keiryöbö alɨg mɨdö, rön,

ib nuŋwa yadɨŋ bɨl sö duaŋ.

Nuŋ mil wä keiryöbö alɨg mɨdö, rön,

ib nuŋwa yadɨŋ bɨl sö duaŋ.

Nuŋ rɨb wä keiryöbö ödöriö mɨdö, rön,

ib nuŋwa yadɨŋ bɨl sö duaŋ.

Nuŋ röŋ aku, nugwo ri ablaŋe, rön,

ib nuŋwa yadɨŋ bɨl sö duaŋ.

Nuŋ mɨ wä keiryöbö mɨdö, rön,

ib nuŋwa yadɨŋ bɨl sö duaŋ.

Nuŋ ap agapɨm cɨnö cön aku, cönɨŋö, rön,

ib nuŋwa yadɨŋ bɨl sö duaŋ.

Nuŋ Nöbö ölɨsö keiryöbö ödöriö mɨdö, rön,

ib nuŋwa yadɨŋ bɨl sö duaŋ.

God ana ib nuŋ aku öim öim yadɨŋ bɨl sö duaŋ.

Mɨ ödöriö!” me rɨmä.

Yörbö ölɨŋ höb peñɨm

13 Makwam yöj nöbö piaku nöbö i, nɨ yad nugwön yadöŋa, “Nöbö mö wölɨj leia röböi piaku agö nöbö bɨlɨm? Ñɨŋ pikai yöbö höi?” röŋa.

14 [~6~]Aliö rɨmɨn yadma, “Nöbö dib. Nɨ nugwöi; jɨ nagö nugulaŋö,” rɨma. Aliö rɨmön, nɨ yadöŋa, “Nöbö mö bɨlɨk ñɨgö ömörö nölmön, pɨmɨd öliöxön kömö höia. Ñɨŋ Sipsip Ha hañ nuŋwa pön, wölɨj ñɨŋ bla nɨgön pɨl patɨm lei röda. 15 Makwam,

“Ñɨŋ God hogw rol kiŋa il yöra mɨdön, mil pɨxmag yuö,

höjöpalɨb ram möl nuŋ aku mabö nuŋwa rɨ gɨrön, mɨdöia.

Nöbö hogw rol kiŋa römɨd gɨ mɨd aku

ñɨgö nugwidɨx mɨd ri aböna.

16 [~7~]Ñɨgö kiö iswob pɨlen, röbö de iswob pɨlen,

naiö ölɨsö iswob nɨgön ölɨŋ höb pɨ nölen.

17 [~8~]Aku agapɨm: Sipsip Ha hogw rol kiŋa mibɨl yöra mɨd aku,

sipsip nugwidib nöbö ñɨŋa mɨdön,

ñɨgö yölɨŋön röbö ilam rödmɨd möla duaŋ,

röbö kömö mag nölɨb aku nɨmöña.

Makwam God nuŋ imöñ mäp röbö ñɨŋ aku

magalɨg örɨx abönɨŋö,” röŋa.

<- Repelesin 6 Repelesin 8 ->