Link to home pageLanguagesLink to all Bible versions on this site
19
1 Ejol ölɨsö ödöriö aku mönö aku yad pöröŋa nugwön nɨ bu gɨgɨ diba audiöx nuguma. Bu röŋ aku, nöbö mö mɨga akwör adöx yöd röul adö kau sö wahax pɨ gɨrön ajmöl aj halön yadmä,
“God ib nuŋwa yadɨŋ bɨl sö duaŋ!
God ana akwör nöbö mö kömö pɨmɨda.
God ana akwör mil wä keiryöbö alɨg mɨda.
God ana akwör Nöbö ölɨsö keiryöbö ödöriö mɨda.
2 [~1~]God ana mönö diba yadön, mönö pɨ nuöm nɨg ri abön,
nöbö mö akuyöbö ñɨgö paiŋö mör nöla.
Nöbö kib pɨb mö gwogwo ödöriö aku,
nöbö kib pön pɨsaŋ mag yönön rɨmɨn,
nöbö mö mögörɨb hörɨrör piakuyöbö hön,
nuŋ rɨmɨdöŋ aku nugwön, ñɨŋ kwo algör paŋ mag akwör rɨ gwogwam rɨmɨdmä.
Mö aku nuŋ God nöbö mö mabö rɨmɨdöi bla pɨl pal nɨgöŋ aku mɨ,
God nuŋ nugwo mönö diba yadön paiŋö ölɨŋ höb diba nölö,” rɨmä.

3 Aliö rön, iswob ajmöla aj halön yadmä,

“God ib nuŋwa yadɨŋ bɨl sö duaŋ!
Taun dib keiryöbö ödöriö Babilon yön hauba nɨgön,
hauba aku öim öim nɨgmɨjönɨŋö,” rɨmä.

4 Aliö rɨmɨn, yöj nöbö akuyöbö padokwo padök paŋyöbö i höuöiliö agñɨŋ bö (24) aipam, ap kömö mös mös piaku aipam, God hogw rol kiŋ rola römɨd gɨ mɨdöŋ il yöraku höxmax yuön ubɨlön yadmä,

“Mɨ ödöriö!
God ib nuŋwa yadɨŋ bɨl sö duaŋ!” me rɨmä.

5 Aliö rɨmɨn, mönö i hogw rol kiŋ mɨdöŋ yöra pisö yöbö yadön yadöŋa,

“Ñɨŋ nöbö mö mölyöbö bla aipam, nöbö mö rɨb bla aipam,
God ana mabö rɨ nölön nugwo ipöxmɨdöi bla
magalɨg ib nuŋwa yadɨŋ bɨl sö duaŋ,” me röŋa.
Krais nöbö mö nuŋ bla pön mögörɨb nuŋwa duaŋ, wahax pöña

6 [~2~]Makwam mag aku nɨ bu diba i, röbö höja pɨnön kɨka rɨ mag akuyöbö rɨmɨn, gunɨma gigu rɨmɨn pɨ mɨlkap nɨgɨm dumɨd mag akuyöbö rɨmɨn audiöx nuguma. Bu kɨka aku, nöbö mö mɨga ödöriö aj halön yadmä,

“God ib nuŋwa yadɨŋ bɨl sö duaŋ!
God Nöbö Dib ana aku Nöbö ölɨsö keiryöbö ödöriö.
Nuŋ Kiŋ mɨdön
nöbö mö akuyöbö magalɨg nugwidɨx mɨda.
7 [~3~]Makwam, wä raŋ nugugɨrön wahax pɨnɨm;
God nuŋ Nöbö ölɨsö keiryöbö ödöriö mɨd aku nugwön,
ib nuŋwa yadɨŋ bɨl duaŋ.
Aku agapɨm: Sipsip Ha aku mönɨŋ nuŋwa pɨb wop aku mödö hö makwam,
mö aku nöbö rama duba, ap rɨ pɨdɨlu gör mɨda.
8 Linɨn wölɨj wä lei cöröx cöröx gɨ mɨd i,
God mönɨŋ nuŋwa nugwo nölmɨn yömö,” rɨmä.
Linɨn wölɨj wä aku il aku, God nöbö mö nuŋwa rɨ ri abmɨdöi piaku maku pal.

9 [~4~]Makwam ejol aku nɨ yadöŋa, “God mönö mɨ ödöriö yadmɨd aku, mönö nuŋwa bli yadmön kai kɨtö. Nuŋ yada, ‘Sipsip Ha aku wö raŋ duön nuŋ pɨsaŋ ap diba nɨmöñ nöbö mö piaku mɨ ödöriö wahax pöñɨŋö,’ rɨ gö” me röŋa.

10 [~5~]Makwam ejol aku aliö rɨmɨn, nɨ yödpɨlö il nuŋ aku höxmax yuön, nugwo höjöpainö, rɨm aku, jɨ nɨ yadöŋa, “Wöhö. Naŋ almɨjɨnö! God paŋyöbö akwör nugwo höjöpalö. Naŋ aipam, haul nöbö mölöu nöbö naŋ bla aipam, Jisas mönö wä nuŋ aku nugw pön rɨg yadmɨd mag akuyöbö rɨmɨdöi aku, nɨ kwo algör God mabö rɨ nölɨb nöbö nuŋ i mɨdla. Jisas mönö ma yad wöxnö nɨgöŋ mönö wä akwör nugw pön, God mönö yadɨb nöbö nuŋ bla nöbö mö piaku mönö yad nölmɨdöiŋö,” röŋa.

Krais hön hos age rola römɨdön yönmɨdöŋa

11 [~6~]Makwam mag aku nugumön, adöx yöd röul adö kau sö möla rödɨm, nöbö i hön hos age i rola römɨd gɨ mɨdöŋa. Nöbö hön hos rola römɨd gɨ mɨdöŋ aku, ib nuŋ mös: ib i Cɨr, ib i Mɨ. Nuŋ nöbö mö bla ñɨgö mönö diba yadön, mönö pɨ nuöm nɨg ri abön, paiŋö ölɨŋ höb pɨ nölmɨd aku, amnɨmab pɨ nölöl; rɨg rɨmɨdöi mag akwör nugwön pɨ nölmɨda. Aliö alön, nöbö mö bla pɨsaŋ nuö nuö rön pɨl rɨbɨx abmɨd aku, rɨbyöx nugw ri abön, mönö nuöm nɨg ri abön, nuö nuö rön pɨl rɨbɨx abmɨda. 12 [~7~]Mämäg nuŋ aku rɨn pin röxgɨb. Kiŋ nɨgmɨdöi usaŋ mea akuyöbö, mɨga yöcmac nuŋ sö nɨgmɨn mɨdöŋa. Mɨxɨñ nuŋ aku ib i mɨdöŋa. Jɨ ib aku, nöbö mö bli nugwölöi; nuŋ keir ör nugwa. 13 [~8~]Wölɨj röb gɨ mɨd aku, haña unön nɨgmɨn haña alɨg mɨda. Makwam ib nuŋwa, “God Mönö.” 14 Ami Nöbö adöx yöd röul adö kau sö piaku, wölɨj age, wölɨj lei mɨda hörɨrör röbön, hön hos age rola hörɨrör römɨdön, nugwo mai dumä. 15 [~9~]Ajmöl nuŋ bö, yu mɨxɨl ölɨsö mei höröpɨnöŋa. Yu mɨxɨl ölɨsö mei aku pön, nöbö mö mögörɨb hörɨrör piaku pɨsaŋ nuö nuö rön pɨl pal nɨgön, ain yöd mɨxɨl i pön, ñɨgö nugwidɨx mɨjöna. Makwam God yad nɨgöŋ wop aku, God Nöbö Diba, Nöbö ölɨsö keiryöbö ödöriö aku, nöbö mö mag gwogwo rön nugwo höj nugwöñ akuyöbö nugwaŋ, mɨ ölɨsö wölaŋ yadaŋ, ñɨgö wain mag akuyöbö röxg pön, God wain maga röb caku rɨb möla abön, hön hos age rola römɨd gɨ mɨd Nöbö aku ñɨgö röb caku cöna. 16 [~10~]Makwam wölɨj mɨxɨl nuŋ aipam, mabim nuŋ aipam, ib i mɨda:

KIŊ PIAKU KIŊ ÑƗŊA MAKU NÖBÖ DIB PIAKU NÖBÖ DIB ÑƗŊA MAKU

17 [~11~]Makwam nɨ nugumön, ejol i naiö mibɨl yöraku pisö öbɨl gɨ mɨdɨm nugugɨrön, yöur adöx mibɨl yör sö höd nɨg yönmɨdim akuyöbö ñɨgö wö diba rön yadöŋa, “God ñɨgö ap mag diba nölɨba rɨmɨd aku, magalɨg hön mögum ri! 18 Ñɨŋ hön, kiŋ bla mɨxɨña nɨmön, ami nöbö nugwidɨx mɨdɨb nöbö dib bla mɨxɨña nɨmön, ami nöbö ölɨsö bla mɨxɨña nɨmön, hön hos bla mɨxɨña nɨmön, nöbö hön hos pön yönmɨdöi bla mɨxɨña nɨmöña. Nöbö mö nag mabö rɨmɨdöi bla, nöbö mö rɨb ñɨŋa keir yöx nugwön mabö rɨmɨdöi bla, nöbö mö ib diba mɨd bla, nöbö mö ib mɨdöl bla, mɨxɨñ nɨgö bla magalɨg nɨmöñɨŋö,” röŋa.

19 Makwam mag aku nugumön, ap höpebö aku aipam, kiŋ mögörɨb adadö piaku piaku hörɨrör piaku aipam, ñɨŋ duön, hön hos age pɨ yönmɨd Nöbö aku aipam, ami nöbö nuŋ bla aipam pɨsaŋ nuö nuö rɨba, ami nöbö ñɨŋ bla pön hö mögum rɨmä. 20 [~12~]Aliö almɨdmɨn, hön hos age pön yönmɨdöŋ Nöbö aku, ap höpebö aku aipam, nöbö nuŋwa nöbö mö akuyöbö ñɨgö inakmönö hörön ap rölɨbä akuyöbö röŋ nöbö aku aipam, ñɨgö pɨ cɨcɨ nɨgön, ban yuö rɨn salpa pina wödö painö suba alɨg pɨmɨd möl bö aböŋa. Ap höpebö nöbö nuŋ aku, nuŋ höd nöbö mö mɨga akwör inakmönö hörmɨn, ñɨŋ ap höpebö ib kɨtɨb aku pön, nuŋ rɨg mɨdöŋa nugwön anau nuŋwa tatal rɨ nɨgim ap aku höjöpalmɨdmä.

21 Makwam hön hos age pɨ yönmɨdöŋ Nöbö aku, yu mɨxɨl ölɨsö ajmöl nuŋ bebö höröpɨnöŋ aku, ami nöbö akuyöbö ñɨgö magalɨg pɨl pal nɨgmɨn, yöur bla hön mɨxɨñ ñɨŋ bla nɨm nöi nugwön röböxmä.

<- Repelesin 18Repelesin 20 ->