Matio 2

o Mpioniñeo

1 Ie toly e Betleheme e Iehodà ao t’i Iesoà, tañ’andro’ i Heroda mpanjaka, le inge totsak’ e Ierosaleme ty mpañandro[a] maro boak’ atiñanañe añe, 2 nanao ty hoe: Aia i Mpanjaka’ o Jiosio vaho samakey? Fa tinalake’ay atiñanañe eñe ty vasia’e[b], vaho pok’eo zahay an-dravoravom-piasiañe hitalaho ama’e. 3 Ie jinanji’ i Heroda mpanjaka le nitsiborehetoke reketse ze hene mpimone’ Ierosaleme[c]. 4 Aa le hene natonto’e o androanavi’eo, vaho nañontanea’e he fohi’ iareo ty hisamahañe i Norizañey. 5 Hoe ty natoi’ iareo: E Betleheme Iehodà ao, ty amy pinatetse amy mpitokiy ty hoe:

6 Ihe Betleheme Iehodà,

Efratà, tane’ Iehodà,

Inao toe pininite’e

amo fifokoa’ Iehodao rehe;

fe hirik’ ama’o te hionjom-bamako

ty ho Mpifehe e Israele ao.[d]

7 Le kinanji’ i Heroda i mpañandro rey naho natola’e vaho nitsikarahe’e am’iereo i andro niboaha’ i vasiañey[e]. 8 Nahitri’e mb’e Betleheme mb’eo iereo ami’ty hoe: Akia, hotsohotsò i Ajaja-lahiy, ie rendre’ areo, ampahafohino ahy, fa homb’ama’e mb’eo ka raho hitalaho.

9 Ie nahajanjiñe i mpanjakay le nienga; naho indroy i vasiañe niisa’ iereo atiñanañe añey niaolo iareo ampara’ te nipok’ amy toetsey, nijohañe ambone’ ty toe’ i ajajay ey. 10 Nifale iereo toe nirañorano an-kobay te nahaisake i vasiañey.

11 Aa ie nizilike an-traño ao le nitendreke aze naho i Marie rene’e; naho nitongaleke aolo’e eo, niambane ama’e, nanokake o horo’ iareoo naho nibanabana ravoravo ama’e: volamena naho mañi-dè [f]vaho rame[g]. 12 Hinatahata’ ty anjely ami’ty nofy iereo, nanoro t’ie tsy hibalike mb’amy Heroda mb’eo, aa le nimpoly mb’an-tane’ iareo añe nañorike lalan-kafa.

Nikatsakatsake

13 Ie añe, intoy, nisodeha amy Josefe ty Anjeli’ Iehovà, nanao ty hoe: Mitroara, rambeso i Ajajalahiy naho i rene’e, mibioña mb’e Mitsraime añe vaho itaveaño ampara’ te tohineko, amy te paiae’ i Heroda havetrake i Ajajalahiy. 14 Aa le nendese’e i Ajajay naho i rene’e, 15 vaho nitambatse añe ampara’ te niantantiritse t’i Heroda, hañenefañe ty nampisaontsieñe i mpitokiy ty hoe:

Boake Mitsraime añe ty nitokavako ty Anako.[h]

Fanjamanañ’Ajaja

16 Ie nifohi’ i Heroda ty nanoa’ i mpañandro rey, le tsy hay aia ty habose’e, toe niojeoje an-troke, vaho linili’e te hahitrike amo roandria’e iabio ty hanjamañe ze hene anak’ ajajalahy e Betleheme naho amparipari’e ao ze [i]nisamake ambane ty tao nisaontsie’ i mpañandro reiy te nisamaheñe i ajalahiy.

17 Niheneke amy zay ty nisaontsie’ i Jeremia mpitoky:

18 Jinanjiñe e Rama ao

ty fiarañanañañe;

fandalañe naho fangololoihañe mafaitse:

Mirovetse o ana’eo t’i Rahelie, ntt[j]

Noly Mb’e Naz’rete

Lke 2:39

19 Ie nihomake t’i Heroda, le nitoje amy Josefe e Mitsraime ao ama’ nofy ty anjeli’ Iehovà 20 nanao ty hoe: Mitroara, rambeso i Ajajalahiy naho i rene’e, le akia mb’an-tane’ Israele añe; fa mate o nipay hañoho-doza amy Ajajaio. 21 Aa le niongake re, ninday i Ajajay naho i rene’e, nimpoly mb’ an-tane Israele mb’eo. 22 Jinanji’e te nandimbe i Heroda rae’e nifeleke e Iehodà ao t’i Horkanose[k], le nimarimarike tsy te homb’eo. Aa le nirisihe’ i Anjeliy ami’ty nofy re ty hitsile mb’ an-tane Gilgale añe. 23 Ie nandoake ao le nimoneñe an-drova atao Nazareta, hañeneke i nisaontsie’ o mpitokio te: Hatao nte-Naz’rete re.[l][m]

<- Matio 1 Matio 3 ->