Matio 13

O Karaza-taneo

Mar 4.1-20; Lke 8.4-15

1 Nienga i anjombay amy àndro zay t’i Iesoà, le niambesatse añ’olon-driake eo 2 vaho niropadropaha’ i lahialeñey ampara t’ie nipay lakañe hijoña’e; le nizorazora an-tamboho ey i lahialeñey, 3 vaho nitaroña’e raha maro am-pandrazañañe ami’ty hoe: Teo t’indaty nañampitso boak’ añ’ anjomba ao handrarake tabiry; 4 Ie nandrarake, nirarake añ’olon-dalañe ey ty ila’e, f’ie nitsimòhe’ o voroñeo. 5 Nirarake am-batovatoeñe ey ty ila’e, fe natify i taney, ie nipitsike le niforejeje amy te tsy nilaleke i taney, 6 ie nafana-voho i andro ambone eiy, le nimae naho maike amy t’ie tsy amam-bahatse. 7 Teo ty nirarake an-kisatse ao. Nitombo o hisatseo nañaloke aze. 8 Ty ila’e nipoke an-tane soa vaho namokatse naho nitombo, zato ty valoha’e, enem-polo ty faharoe, naho telo-polo ty fahatelo. 9 Ze aman-dravembia hijanjiña’e, Mijanjiña!

10 Nimb’eo o mpiama’eo nanao ty hoe ama’e: Akore te itaroña’o an-drazan-drehake? 11 Hoe re: Natolotse ama’areo ty hahafohiñe i Fifehean-dikerañey, fa tsy am’iareo. 12 Ze manañe, ty ho tompeañe; fa ze tsy manañe, le haloly ama’e ndra ty minjilite’e habohe’e[a]. 13 Zao ty itaroñako am-pandrazañañe: miisake iereo fe tsy mahaisake; mijanjiñe fe tsy mahajanjiñe, 14 hañenefañe i nampisaontsieñe Isaia mpitoky, ty hoe:

Ie hijanjiñe, le hahajanjiñe

fe tsy mb’ia haharendreke,

Ie misamba le hahaisake

fe le lia’e tsy hahaoniñe,

15 fa gañe ty arofo’ ondaty retoa,

naho giñe o ravembia’eo,

fa nikipeke o fihaino’eo;

ke hahaisake am-pihaino,

naho hahajanjiñ’ an-dravembia,

he hahatsikarake añ’arofo,

naho himpoly hijangañako.

16 Fe haha o fihaino’ areo mahaisakeo naho o ravembia’ areo mahajanjiñeo. 17 Eka! to t’itaroñako te maro ty mpitoky naho ty vañoñe nisalala hahaisake o trea’ areoo fe tsy nahaisake, vaho hijanjiñe o tsanoñe’ areoo, fe tsy nahajanjiñe. 18 Inao arè ty fampalangesañe i mpandrarakey. 19 I Ana’ Ondatiy ro mpandrarake. I tabiry nirarake añ’olon-dalañey le ze hene mijanjiñe ty tsara’ i fifehean-dikerañey fe tsy maharendreke; pok’ eo ty mpañinje mitavañe an-tro’e ze nararake ama’e ao iaby, zay i tabiry nipoke an-dalañe eo. 20 I nipoke am-batovatoeñey, le ty mijanjiñe i tsaray naho mandrambe aze an-kaehake aniany, 21 f’ie tsy amam-bahatse mbore aliheñe; naho ifetsaha’ ty hasotriañe tsy ampe vaho ty hasosorañe, le ampandikofe’ i mpañìnjey ty añ’arofo’e ao. 22 I nirarake amo hisatseoy le ty mahajanjiñe i tsaray, f’ie mipay hanontoñe vara bey, le ampañaliñoe’ i mpañinjey aze i tsaran’ Añaharey vaho tsy mamoa[b]. 23 I nirarake an-tane soay, le ty mahajanjiñe i tsaray naho maharendreke vaho mamoa, toe manao sata soa; hanombo zato ty valoha’e, naho enem-polo ty faharoe, vaho telo-polo ty faha-telo.

o Ahe-dRatio

24 Nitaroña’e oha-drehake tovo’e: Hambañe amy t’indaty mitongy doria soa an-tete’e ao i fifehean-dikerañey. 25 Ie nirotse ondatio, pok’eo i rafelahi’ey nandrarake vinda[c],[d] an-tetem-bare’e ao vaho nibioñe. 26 Ie nitovoañe vaho ho niterake i varey le niboake ka i vinday. 27 Niheo mb’amy tompo-tetekey o mpitoro’eo nanao ty hoe: O talè, tsy doria soa hao ty narara’o? Boak’ aia arè o vindao? 28 Hoe ty natoi’e: Satan-drafelahiko zay. Le hoe ty asa’ o mpitoro’eo: Ho vorote’ay o vindao! 29 Aiy! hoe re, hera hombota’ areo o vareo. 30 Angao hey hiharo hitiry ampara’ te toly ty sabo, ie amy fitatahañey le ho volañeko amo mpanatakeo, ty hoe, Atontono hey o vindao naho feheo am-pitoboroñañe horoañe, vaho atontoño an-driha ao o vareo.

Voa Nonoke

Mar 4.30-32; Lke 13.18, 19

31 Intoy ka ty nandrazaña’e: I fifehean-dikerañey le añoharañe ami’ ty voa-nonoke nindese’ t’indaty vaho narara’e an-tete’e ao. 32 Ie ty kede amy ze hene añañe an-kodoboñe ao, fa ie mitiry, ro jabajaba amo rongoñeo vaho mbe mionjoñe ho hatae abo, kanao mitsoloke amo tsampa’eo o voron-dikerañeo.

Lalivay[e]

Lke 13.20,21

33 Nitaroñe’e añ’ohatse ka ty hoe: I fifehean-dikerañey, le manahake ty lalivay19 najo’ ty rakemba ami’ty bom-bare telo fañaranañe[f] ao vaho hene niazom-pamoà’e.

34 Nanoe’ Iesoà amy lahialeñey añ’ ohatse iaby izay; fa naho tsy am-pandrazañañe le tsy nitsarae’e, 35 hañenefañe i nampisaontsieñe i mpitokiy, ty hoe:

Ho sokafeko am-pandrazañañe ty vavako; le ho taroñeko tafatòño boak’an-kaehae’e.[g]

i Ahe-dratiy

36 Nifampiria amy lahialeñey amy zao t’i Iesoà le nizilike añ’anjomba ao. Nimb’ama’e ao o mpiama’eo nihalaly ama’e te habejañe i fandrazañañe i vindaiy.

37 Nitoiña’e ty hoe: Ondatio ty mandrarake i doria soay; 38 ty voatse toy i tonday; o vantañeo i doria soay; vaho o tsivokatseo o vindao, 39 i mpañìnjey i rafelahy nandrarake irezay; i vare rifo mizorazora ey ro figadoña’ i sa ho aviy; vaho o anjelio ro mpanatake. 40 Manahake ty fanontona’ o mpanatakeo i vinday horoañe, ty ho fanamperañe ty sa toy. 41 Hirahe’ i Ana’ Ondatiy o anjeli’eo hañombotse amy fifehea’ey ze atao raty naho o mitolon-katserehañeo, 42 le hafetsake an-toñake mirebareba ao; fangololoihañe naho ali-vazañe ty ho ao. 43 Ie amy zay, hireandreañe manahake i àndroy[h], am-Pifehean-dRae’e ao, o vañoñeo[i]. Ze aman-dravembia mahajanjiñe, Mijanjiña.

Vara Naetake

44 Hoe ka t’i Iesoà amo mpiama’eo: I Fifehean-dikerañey le manahake t’indaty mahatrea vara mikafitse le ami’ty hafalea’e ty amy hasaro’ey, fonga aleta’e o fanaña’eo vaho mivily i taney.

Hange[j]

45 Tovo’e, Hambañe ami’ty mpanao balike mpipay vatosoa i fifehean-dikerañey. 46 Ie mahatrea ty soa, hene aleta’e o vara’eo le mipeake aze.

Harato

47 Razañeñe an-karato an-driake ao i fifehean-dikerañey; mitontoñe ama’e ao ze volom-piañe iaby. 48 Ie mirotrarotra le kororohe’ iereo boak’ao, le miheo mb’ama’e o mpañaratoo mijoboñe ty soa ho an-karo’ iareo, vaho aria’ iereo o ratio. 49 Zay ty ho ie am-panampera’ o androo; Homb’eo o anjelio, hameve o tsivokatseo amo vañoñeo, 50 vaho havokovoko’ iareo an-toñake mirehetse ao. Lako tañy naho ali-vazañe ty ho ao.

Ty Talèn’ anjomba

51 Hoe re am’iereo: Nirendre’ areo hao zay? Eka, hoe iareo: 52 Aa le, ze fonga mahihitse amy fifehean-dikerañey ro hambañe ami’ty raen-keleiañe mañakatse ty vao naho ty haehae amo vara’eo.

Falai’ o nte Nazaretao

Mar 6.1-6

53 Ie nagado’ Iesoà i tsara rezay, le nienga, 54 vaho nigodañe mb’an-tane’e mb’eo le nañoke ondaty am-pitontonañ’ ao. Nilatsa iareo nanao ty hoe añ’arofo: Aia ty nahazoa’ itiañe ty hihitse naho haozarañe ra’elahy zao? 55 Tsy ie ty ana’ i mpandrafitsey? tsy atao Marie hao ty rene’e? naho ty rahalahi’e: Iakobe, i Josefa, i Simona, naho i Jodà, 56 vaho o rahavavi’eo? tsy amantika iaby v’irezay? Taia arè ty nahazoa’ itia o raha iaby zao? 57 Aa le nialik’ ama’e iereo, vaho hoe t’i Iesoà tam’iereo: Tsy po-ènge ty mpitoky naho tsy an-tane’e vaho añ’akiba’e ao avao. 58 Le tsy nisatri’e[k] ty hanao raha tsitantane ao ty amy haminjikitam-patokisa’ iareo.

<- Matio 12 Matio 14 ->