Hebreo 2

Hatahata Valoha’e: Mitaoa

1 Ie amy zay, tsy mahay tsy tomiren-tika am-pininihañe o jinanjin-tikañeo, tsy mone handifike. 2 Aa kanao niventeñe te soa oreñe i tsara nisaontsie’ anjeliy, naho fonga nandilovañe ami’ty evae’e o fiolàñe naho fanjeharañeo, 3 le aia ty hipolitiran-tika naho amoean-tikañe i rombake jabajaba zay? ie tam-pifotora’e añe ty namotora’ i Talè fitaroñe, naho niventè’ o nahajanjiñeo; 4 mbore nitaroñen’ Añahare am-biloñe naho halatsàñe naho sata tsitantane ankafankafa, vaho amo falalàn’ Arofo Masiñeo an-satri’ey.

Onjoneñe am-Pirekeañe[a]

5 Tsy o anjelio ty nampiambaneañe i voatse ho avy isaontsian-tikañey 6 fa teo ty nitsaraeñe ty hoe:

Ino ondatio, te ahoa’o, naho ty ana’ ondaty te tilihe’o?

7 Nanoe’o ambanevanen’Añahare[b] heike, mbore sinabaka’o engeñe naho hasiñe

naho tinendre’o ambone’ o satam-pità’oo,

8 vaho nampivohore’o

ambanem-pandia’e eo ze he’e.[c]

Aa kanao kila nampiambaneañe ama’e, le tsy ao ty napo’e tsy hivohotse ama’e. F’ie henanekeo mbe tsy onin-tika te hene nampiambaneañe. 9 Fe fohin-tikañe i nanoeñe ambanevane’ o anjelio heikey, toe Iesoà, ie nalovilovin-kavilasy ro sinabakan’ engeñe naho hasiñe, soa t’ie ami’ty fatarihan’ Añahare ro hitsope-kavilasy ho a ze he’e.

10 Amy t’ie nañeva, le nanoañe ze he’e, naho toe ie ty talim-pisia’ ze haliforañe, ie minday anake maro mb’an-drenge, ro nifonireñe an-kaloviloviañe ho Talèm-pandrombahañe iareo. 11 Aa kanao songa boak’ amy Raikey i mpañamasiñey naho o nefera’eo, le tsy manalatse aze te anoa’e longo, 12 ami’ty hoe

Ho taroñeko amo rolongokoo

ty tahina’o[d];

ho bangoeko añivo’ o fivorio.[e]

13 tovo’e: Hatokisako re.

vaho indraike: Intoy raho, naho o amory natolon’ Añahare ahikoo.[f]

14 Aa kanao itraofa’ o anakeo ty nofotse aman-dio, le rinambe’e ty hifanahake am’ iereo, handrotsake amy havilasi’ey i mpanandily amy havilasiy—toe i mpañìnjey; 15 vaho ho haha’e ze nondevoze’ ty fihembañañe amo havilasio amo hene andro niveloma’eo. 16 Toe tsy nandrambe anjely, fa o tarira’ i Abraàmeo ty nandrambesa’e[g]. 17 Aa le tsy mete tsy nihambañeñe amo longo’eo amy ze he’e re, soa te ho mpisorom-bey miferenaiñe naho migahiñe aman’ Añahare, hañefetse o tahi’ ondatioo. 18 Aa kanao nitsoheñe an-kalovilovian-dre le lefe’e ty mañìmba o tsoheñeo.

<- Hebreo 1 Hebreo 3 ->