Efesosy 5

1 Aa le mitsikombea an’ Andrianañahare hoe anakisoke; 2 naho mañaveloa am-pikokoañe, hambañe amy fikokoa’ Iesoà antikañey, ie namoea’e aiñe ho enga naho soroñe mandrifondrifoñe aman’ Añahare.

3 Le asoao tsy ho toñoneñe ama’ areo ze atao fiolorañe tsy mañeva; naho ze haleorañe ndra fihañañe, amy t’ie tsy mañeva o noro’eo; 4 apoho ka ze timbo, naho hakanìfoke naho sole maràñe, fa fonga tsy mete; vaho mañandriàña. 5 Mahafohina an-katò te tsy aman-anjara amy fifehea’ i Norizañey naho aman’ Añahare ty mpiolotse ami’ty tsy evà’e naho ty mpanao haloloañe, vaho ty mihàñe (ie fiatoañe am-bara).

6 Ko mete fañahieñe an-tsaontsy kòake[a]; ie mikaike ty haviñeran’ Añahare amo anam-panjeharañeo. 7 Le ko ireketañe.

8 Ni-hamoromoroñañe[b] nahareo te taolo, fe hazavàñe amy Talè ao henaneo. Mañaveloa hoe anan-kazavàñe, 9 (Ty voka’ o Hazavàñeo[c] le ze hene hasoa naho havantañañe vaho hatò), 10 mamente ze mahafale’ i Talè. 11 Ko mitrao-baoñe amo satan-kaieñe tsy vokatseo, fa aboaho[d] ambatraike, 12 toe manalatse, tsy talilieñe o anoe’ iereo añ’etakeo.

Mañaveloa mañeva Anan-Kazavañe

13 Malange ze he’e aborake an-kazavàñe eo, naho toe mazava ze nampidodeañe; 14 zay ty nampisaontsie’e ty hoe:

Mivañona ry mirotseo[e],

mitroara an-kavilasy,

hitsavavàha’ i Norizañey.

15 Itaò arè ty fañaveloa’ areo tsy hanahake o tsy aman-kilalao, fe tsikombeo o mahihitseo, 16 rombaho o nifotoañañeo, fa raty o androo. 17 Aa le ko misare gege, fa arendreho ze satri’ i Talè.

Milifora amy Arofoy

18 Ko manao jike an-divay ie minday haloloañe; fa mihalifora amy Arofoy, 19 mifampisaontsia an-jejo naho sabo, naho an-takasy miavake, bekò naho titihò añ’arofo ao t’i Talè, 20 kila raha ro andriañeñe nainai’e aman’ Añahare Rae, amy tahina’ i Talèntika Iesoà Norizañeiy, 21 vaho mifampiambanea am-pañeveñañe[f] i Norizañey.

Rakemba: Miandalia ami’ty Vali’o

22 O roakembao, miandalia amo vali’ areoo, hoe amy Talè. 23 Toe lohà’ i vali’ey ty lahilahy, hambañe ami’ty maha lohà’ i Fivoriy i Norizañe mpandrombak’ i Fañòvaiy. 24 Aa le hambañe ami’ty fiambanea’ o Fivorio amy Norizañey, ty rakemba amy vali’ey amy ze he’e.

Lahilahy: Ikoko ty Vali’o

25 O ry lahilahio, kokò ty vali’ areo, hambañe ami’ty nikokoa’ i Norizañey i Fivoriy naho namoea’e aiñe, 26 ie navahe’e naho nikotriñe’e amy fampandroañe rano añamy tsaray[g], 27 hampiatrefa’e ho Fivory lifots’ engeñe, tsy amam-pepo ndra komake ndra loli’e hoe izay, f’ie hiavake tsy aman-kila. 28 Ehe mikokoa valy manahake ty vata’o ry lahilahio; mikoko vatañe ty mikoko valy. 29 Toe tsy eo ty malaim-batañe, fa fahana’e naho beize’e hambañe amy Norizañey o Fivorio, 30 amy t’ie mpitraok’ am-pañova’e ao:

31 Zay ty isitaha’ ondaty aman-drae’e naho rene hipiteke ami’ty vali’e, vaho ho fañova raike i roroey.[h]

32 Tafatoño jabajaba zay, fa i Norizañey naho i Fivoriy ro ivolañako. 33 F’ie, sindre mikokoa tañanjomba manahake ty vata’e, vaho miasia valy ry rakembao.

<- Efesosy 4 Efesosy 6 ->