Namba 1 leta prom Pita 2

1 Yupla mas stap nau nomo peibaik, nomo lai ol pipol, yuze laiwei. No akt wase yupla gud o wase ol tupes pipol. Nomo zeles ane no kareyan. 2 Yupla mas prapa anggre po dat milk wea i da wod blo God, so yupla i go gro kam prapa gad sens baut wiswei God i seibe yupla. Yupla mas prapa anggre po dis wod wase niu beibi i anggre krai po milk, 3 nau yupla sabebaut wiskain prapa gudpasinwei da BosLod i gad.

Dem meinston blo aus blo God

4 Yupla kam klostu po da BosLod uda i da meinston blo da Tempol blo God ane em i mata stap laip. Em nau wea ol pipol i bin meke em rabis, bat God i bin suze em ane meke em impotant.

5 Lete God zoine yupla wase ston wea i gad laip, po kam tugeda wase tempol blo God. Ane zob blo yupla i po bi oli prist blo em ane po meke spesil opring prom spirit blo yupla po meke em api bikoz prom Zizas Kraist. 6 Seimkain wiskain Baibol i spik:

‘Ai pute wan timba insaid Zarusalem,

em da meintimba,

ane eniwan uda bilib lo em

i nogo pil nugud ane sem.’

7 Wa, em i prapa spesil po yupla uda bilib. Bat po demwan uda no bilib, em

‘Da timba wea dem bilda i bin sakwei,

i nau da meintimba.’

8 Ane Baibol i spik diskain tu:

‘Em i dat meintimba wea i meke ol pipol po bang wea dat timba ane dempla poldaun.’

Wa, dem pipol uda i bang ane poldaun i demkain bikoz dempla no mekem wanem da mesiz blo God i spik. So datwan i plan blo God po dempla uda no lisen po em.

9 Bat yupla no demkain wase dempla. Yupla i ol pipol wea God i bin suzem. Ane yupla i blo aus blo king ane prist, ol oli pipol blo God. Ane yupla i blo em, so yupla ken soe ol nada pipol da gudwei blo God, bikoz em bin singaut yupla kam ausaid prom dat dakples, kam po dat prapa nadakain gudlait blo em. 10 Baibol i spik diskain:

‘Wea wantaim yupla no bin ol pipol,

bat nau yupla i ol pipol blo God.

Wea wantaim God i no bin soe yupla sorewei blo em,

bat nau God i soe sorewei blo em po yupla.’

11 Mai bala ane sisi, yupla i streinza ane ausaid pipol. So ai wone yupla po stap longwei prom nugudwei bikoz demting i pait gense spirit blo yupla. 12 Prapa lugaut wiskain yupla i stap midel wea dem neiba uda i no bilib. Iben ip dempla i spik yupla i bin meke rong, dempla i go luk dem gudsamting wea yupla i mekem, ane dempla i go bilib ane gibe ona po God wen em go kam po zaze da wold.

Rispekt pipol uda kare lo

13 Mekem wanem da BosLod i wandem. Yupla mas pole demwan uda kare lo wase king uda i bos, 14 o dem gabana blo em. Da king i bin suze dem gabana ane em bin gibe dempla da rait po panis demwan uda i meke ol rongting ane ona demwan uda i meke ol raitting.

15 God i wande yupla po mata meke ol gudsamting solong i go stape demwan uda i meke laitok gense yupla. 16 Yupla i no sleib, yupla i pri. Bat da priwei blo yupla i mas no meke no nugudting. Yupla i pri po stap wase sleib blo God. 17 Yupla i mas soe rispekt po ebribodi. Lab yupla amenbala ane amensisi ane labe ol amenpamle tu. Yupla mas prait prom God ane mas soe rispekt po da king.

Ol sleib

18 Yupla uda i sleib mas mekem wanem bos blo yupla i wandem. Meke ebriting wanem dempla i spik yupla po mekem, nomata dempla i trite yupla wea gudwei o peawei o wea rapwei. 19 I gudting ip yupla no meke at blo yupla kamap wen ol pipol i meke trabol po yupla, bikoz yupla sabe yupla blo God. Wen yupla i mekem diskain yupla meke God prapa api. 20 Nobodi go preize yupla ip yupla meke rong ane i go panis yupla, God i nogo preize yupla tu. Bat ip yupla meke raitting ane trabol i kam po yupla, no meke at blo yupla kamap. Wen yu mekem diskain yupla meke God prapa api.

21 Kraist, i bin sapa po yupla, i piksa po yupla. Pole wei blo em. So dem trabol i pat blo plan blo God po yupla po go tru. 22 Baibol i spik:

‘Em i no bin meke no sin gense God,

ane nating laitok bin kamaut prom maut blo em.’

23 Wen ol pipol i bin spik ol nugudtok gense em,

em no bin ansabaik dempla.

Wen em bin sapa, em no bin meke seimkain baik po dem pipol.

Em bin mata libe demting lo an blo God, uda i ebritaim zaz lo peawei.

24 Wen Zizas Kraist i bin ded,

em bin kare ebridem sin blo yumpla wea oun bodi blo em lo da kros,

so yumpla i kan ded nau prom dem sin

bat mata stap wea rait wei.

Yupla i bin kamgud nau prom dem badting wea em i bin sapa.

25 Yupla i bin wase ol sip wea i bin gowei prom dat rait rod.

Bat nau yupla i bin kambaigen po pole da Bos blo lugaut sip,

da wan uda i lugaut laip blo yupla.

<- Namba 1 leta prom Pita 1 Namba 1 leta prom Pita 3 ->