29 Tínti Isidɑyɛɛribɛ kɛ nɛ́ yíɛ́nɛ̀ ikuɔ́ nìùbɛ̀ sɔmbɛ nɛ̀ Defiibɛ nɛ̀ bɛ̀ɛ̀ bɑ̀ɑ yɛbòrɛ̀ nɛ̀ bɛdèmbɛ̀ nɛ̀ bɛ̀ɛ̀ pĩ nKuyie ncĩ́ɛ̃̀tɛ̀ miɛkɛ mutɔ̃mmú nɛ̀ bɛ̀ɛ̀ kó dimɑ̀ɑ̀ do yɑtɛnɛ̀ ibotí tɛì kɛ́ntũ nKuyie nkuɔ́ nɛ̀ bɛ pobɛ̀ nɛ̀ bɛ bí initidɑɑì nɛ̀ initipòì bɛ̀ɛ̀ kó dimɑ̀ɑ̀ dò nkɛ́ nɑ kɛ́keè. 30 Mɛm̀mɛ ti kɔbɛ bɛ̀ɛ̀ tu bɛkótíbɛ̀ kɛ̀ bɛ̀ɛ bɛ̀ wɛ̃nnɛ́nɛ̀ kɛ́dɔúnnɛ̀ Kuyie ndinùù kɛ́bɛ́i nkɛ́pɑrìkɛ̀ kɛ dɔ̀: Ti bo ntũ nku kuɔ́ nɛ̀ kù do duɔ́ nyì ku kóo tɔ̃ntì Mɔyiisi kòo ì wɑ̃̀ri kɛ́ndɔɔri ku tié nnɛ̀ ku kuɔ́ nɛ̀ ku tɑnnɔ̀ dɛ̀ yɛ̃mmɛ̀.

31 Kɛ̀ bɛ̀ɛ yíɛ́ kɛ́bɛ́i nkɛ dɔ̀: Ti í yóó duɔ́ nti bí di nhɛì kɔbɛ kɛ̀ bɛ̀ɛ puokɛ yoo tí túókɛ́ bɛ kó bɛsɑpɑ̀mbɛ̀ kɛ́puó nti bí. 32 Kɛ̀ dihɛì yɛmbɛ̀ mɛ ntɔní bɛ potɑntì tɛom̀pùtɛ̀ yiè kɛ fiiti yoo dibɑnni mɑrì yiè ti bɑ́ɑ́ tì dontɛ́. Dibenni yiénnì kɛ́soó mmukútímù, kɛ̀ bɛ̀ɛ̀ ti mɔkɛnɛ̀ yɛbɑ̀ɑ̀ nti yɛ̀ mbɛ̀ pɑ̃. 33 Kɛ̀ ti túótɛ́ mɛtɑ̃ɑ̃tímɛ̀ timɔ́mmɔmbɛ kɛ bo nduɔ̀ mmɛdítíbii mmɛ̀mɑ́ɑ̀ bɑ́ dìì benni Kuyie ntɔ̃mmú kpɛ́í. 34 Kɛ̀ bɛ̀ bo ndonnɛ̀ pɛ̃́ɛ̃̀bɛ̀ bɛ̀ pɑ̃ɑ̃ mbɛ̀ Kuyie mbɑ́ dìì yiè nɛ̀ dɛ kó tidiitì nɛ̀ bɛ̀ kù feu ìì wũɔ̃ yɛwe yɛmɔu kɛ cɔ́unko nɛ̀ bɛ̀ kù feu ì siom̀pùsi kó yɛwe nɛ̀ yɛbɑɑ nkó yɛwe nɛ̀ otɑ̃ɑ̃̀pɑ̀nwè kó dibɑnni nɛ̀ yɛbɑɑ ntɛyɛ̀ nɛ̀ dɛ̀ɛ̀ kó dimɑ̀ɑ̀ tu Kuyie nkpɛrɛ nɛ̀ bɛ̀ bo nkɔù ìì wũɔ̃ mɛyɛi ncĩ́ɛ̃́mmɛ̀ kpɛ́í Kuyie ncĩ́ɛ̃̀tɛ̀ miɛkɛ kó mutɔ̃mmú mumɔu. 35 Tínti ikuɔ́ nìùbɛ̀ nɛ̀ Defiibɛ nɛ̀ kubotí kumɔu kɛ̀ tí tɑ̃ɑ̃́ tɛ́tɛ́ kɛ bo yɑ̀ ti yó nwɑɑ̀nní mɛ̀ɛ̀ botí idɛí bɛ̀ yó ntuɔ̀nnɛ̀ ì iwũɔ̃ diwũɔ̃tɔ̀nnì ĩ́nkɛ̀ bɑ́ dìì benni, bɑ́ tɛ̀ɛ̀ cĩ́ɛ̃̀tɛ̀ nɛ̀ tɛ kó mɛfíè tì wɑ̃̀ri Kuyie nkuɔ́ pɑ́tíri miɛkɛ kɛ yɛ̃ ndɛ̀ ndòmmɛ̀. 36 Kɛ̀ ti nɑ́kɛ́ kɛ dɔ̀: Ti dò nkɛ́ntɔuní Kuyie ncĩ́ɛ̃̀tɛ̀ miɛkɛ ti pɑɑ nkó tidiitì ketitì, dɛtie ndɛmɔu kó yɛtebɛ ketiyɛ̀ bɑ́ dìì benni, 37 nɛ̀ ti bí ìì tu Mpo nɛ̀ ti wũɔ̃ ketiyì. Tì wɑ̃̀rimu Kuyie nkuɔ́ pɑ́tíri miɛkɛ kɛ tú ti ntɔuní iwũɔ̃ diɛyì nɛ̀ isɑ́m̀pɔ́ì dɛ kó ibí ketiyì Kuyie ncĩ́ɛ̃̀tɛ̀ miɛkɛ, ikuɔ́ nìùbɛ̀ bɛ̀ɛ̀ pĩ mmutɔ̃mmú Kuyie ncĩ́ɛ̃̀tɛ̀ miɛkɛ bɛ kpɛ́í. 38 Kɛ̀ bɛ̀ dò nkɛ́nduɔ́ mmuyuo nsɑ̀ɑ̀mù nɛ̀ yɛtebɛ sɑ̀ɑ̀yɛ̀ nɛ̀ mɛnɑɑ̀ mpɑ̀mmɛ̀ nɛ̀ mɛkùɔ̀ kɛ dɛ̀ duɔ̀ nyikuɔ́ nìùbɛ̀ Kuyie ncĩ́ɛ̃̀tɛ̀ miɛkɛ. Kɛ̀ ti níí kùútí kɛ dɛ̀itɛ tidiitì ti túótɛ́ dɛ̀ɛ̀ tu dɛpíínnɛ̀ kɛ́duɔ́ nDefiibɛ, ti ɛkɛ̀ yɛmɔu ti yó mmɛ ndɔɔri. 39 Kɛ̀ ikuɔ́ nìùbɛ̀ Anɔɔ bí miɛkɛ kòò mɔù níí nnɛínɛ̀ Defiibɛ bɛ̀ yóó cuɔ́ dìì mɔ̀nnì bɛ̀ kùútí kɛ dɛ̀itɛ tìì diitì kó dɛpíínnɛ̀, kɛ̀ Defiibɛɛ dɛi dɛ kó dɛpíínnɛ̀ kó dɛpíínnɛ̀ kɛ́ dɛ̀ tɑnnɛ́ Kuyie ncĩ́ɛ̃̀tɛ̀ kó tidiitì kó kudieku. 40 Tɛɛ̀ cĩ́ɛ̃̀tɛ̀ miɛkɛ nkɛ Isidɑyɛɛribɛ nɛ̀ Defiibɛ nɔ́ɔ̀rì dɛ̀ bɛ diitì kó dɛpíínnɛ̀ ĩ́nkɛ̀ dɛ bomɛ̀ dɛ̀ɛ̀ tu: Tidiitì nɛ̀ mɛnɑɑ̀ nɛ̀ mɛkùɔ̀ nɛ̀ tinɛntì tìì pĩ̀ńnɛ̀ Kuyie ncĩ́ɛ̃̀tɛ̀ mutɔ̃mmú ikuɔ́ nìùbɛ̀ nɛ̀ bɛ̀ɛ̀ bɑ̀ɑ yɛbòrɛ̀ nɛ̀ bɛdèmbɛ̀ bɛ̀ pĩ̀ńnɛ̀ tì mutɔ̃mmú.