LUUKA 3

Yowaana Omubatiisi alonga engira

(Math 3:1–12; Mari 1:1–8; Yowa 1:19–28)

1 Gwawanga omwaka ogwa ikumi ni itaanu mu owukangasi owua *Kaisaari Tiberiasi. Pontias Pilaato yawanga omukangasi owa ekitemo ekia Yudeea, ne *Eroode yawanga omukangasi owa ekitemo ekia Galiili. Wamwawu waae Piliipo nio owawanga omukangasi owa Iturea ni Trakonitiisi, ni Lisaania yawanga omukangasi owa Abileene. 2 Anaasi ni Kaifa niwo awaawanga awakangasi awa *awoozia. Amiire ago amangʼana aga Katonda gaazra Yowaana omuzia owa Zakaria na ari mu ekeewa.[~1~] 3 Yagia mu ewialo wiona ewiri ampi no oluuzi olwa Yordaani, na alanzizia awantu mbwe wagaluke wareke amawi, wabatiiswe kugere Katonda awarekere owuoni wuawu.[~2~] 4 Kiomo Katonda yawoola mu amangʼana agari mu ebuuki eya *Omugambi Isaaya otino:

“Omwoyo ogwa omuntu oetana mu ekeewa otino,

‘Mulongre Omwami engira,

mumugololre engira ewe enyigolovu.

5 Amiina goona gawugrwe,

ewigiri wiona wirimwe wiike ansi.

Engira eziigodre zigololwe,

kandi anyenyeevu aterereziwue.

6 Kandi awantu woona waaza okuwona owuinunuzi owua Katonda.’ ”[~3~]

7 Yowaana yalaga omuganda ogwa awantu awamuuzako kugere awabatiise otino, “Inywe awaana awa enzoka wano! Owasiagiizie mbwe mumizule okuswawukwa no okusu okungi okuuza naanu?[~4~] 8 Muamie ensaafu ezia mu enkola, ezilagana geeza mbwe omuntu agaluuke arekere amawi. Ni mutaaza mwaingirizia mbwe muuza mwamizuka ku okuwoola-uwoola mbwe, ‘Turi geeza aeniki turi awaana awa Abraamu.’ Mbalaga mbwe Katonda aesa okugalusia amawaale gano gawe awaana awa Abraamu![~5~] 9 Namba nyingeeno, embasa emiire okuteewua ku isina eria omuti; kandi omuti ki omuti oguta-amia ensaafu endootu guuza okutemwao nikwo gurigizwe mu omurro.”[~6~] 10 Omurima ogwo gwamuwuuzia otino, “Katio tusugaane tukoleki?” 11 Yowaana yawairania otino, “Omuntu ori ne enguwo iwiri asugaane agawire omwina waae owula nayo, kandi ori no okuria oona asugaane akole otio.” 12 Awasolozi awa *omusolo awaaza okubatiiswa woona waamuwuuzia watino, “Omugerezi, ifwe tusugaane tukoleki?” 13 Yawalaga otino, “Mutasolozia amangi okukira kiomo kuagalana.” 14 Nikuemao awa-iiye wandi woona waamuwuuzia watino, “Ni ifwe, tusugaane tukoleki?”

Yowaana yawairania otino, “Mutatoola amasendi ku awantu na amaani kandi mutata amangʼana aga owuweeyi ku omuntu. Mureke emisaara giinyu giwasuge!”

15 Awantu awaarindranga okuuza okwa Omununuzi waaingirizianga mu emioyo giawu mbwe Yowaana oyo nio owawanga *Meesia. 16 Yowaana yawairania woona otino, “Inze mbabatiisa na amanzi. Na ario amuntu omukaate okunkira ooza, omuntu owa ngʼasugre namba okusiwula engoe ezia ewiraato wiae. Iye aaza okuwabatiisa no *Omwoyo Omweru ogwa Katonda kandi no omurro.[~7~] 17 Ari ne ekiseeso kiae mu amakono, ekia aaza okuseesra amaemba mu olwanyi lwae. Emere aaza okuta mu ekiagi, na amakunzo aaza okusamba no omurro ogutazima.” 18 Na amangʼana gandi amangi, Yowaana yaiyemba awantu na awalanzizia amangʼana amalootu. 19 No olwa Yowaana yagaania Omwami Eroode ku amangʼana aga Erodiasi muka wamwawu owa yatoola okuwa omukazi waae, kandi ku amawi gandi amangi aga Eroode yakolanga, 20 Eroode yasonga owuwi ku amawi goona aga yakola ago olwa yaingizia Yowaana mu owusiwe.[~8~]

Yesu abatiisrwe na amanzi kandi no Omwoyo Omweru

(Math 3:13–17; Mari 1:9–11)

21 Kwawa mbwe, na awantu woona waamala okubatiiswa kandi Yesu oona yaaza abatiiswa, kandi ni yasawanga igulu riaigukao.[~9~] 22 Omwoyo Omweru yaika ku iye mu embonekano eya iemba-emba kandi omwoyo gwaemera ku igulu ogwawoola gutino, “Iwue ni iwue omuzia wange owa ngonziizie, kandi owa nsangaarre nae.”[~10~] 23 Yesu yawanga ne emiaka egiera amakumi asatu na atanika emirimo giae.[~11~]

Owuiwulane owua Yesu

(Math 1:1–17)

Awantu waingirizianga mbwe yawanga omuzia owa Yoseefu,

ni kuwuene yasimuka mu owuiwulane owua Eeli.

24 Eeli yawanga omuzia owa Mataat,

Mataat yawanga omuzia owa Laawi,

Laawi yawanga omuzia owa Melki,

Melki yawanga omuzia owa Janaai,

Janaai yawanga omuzia owa Yoseefu.

25 Yoseefu yawanga omuzia owa Matathiasi,

Matathiasi yawanga omuzia owa Amoos,

Amoos yawanga omuzia owa Naumi,

Naumi yawanga omuzia owa Esli,

Esli yawanga omuzia owa Nagaai.

26 Nagaai yawanga omuzia owa Maathi,

Maathi yawanga omuzia owa Matathiasi,

Matathiasi yawanga omuzia owa Semeeni,

Semeeni yawanga omuzia owa Yoseeki,

Yoseeki yawanga omuzia owa Yooda.

27 Yooda yawanga omuzia owa Yoanan,

Yoanan yawanga omuzia owa Reesa,

Reesa yawanga omuzia owa Zerubabeeli,

Zerubabeeli yawanga omuzia owa Seltieli,

Seltieli yawanga omuzia owa Neeri.

28 Neeri yawanga omuzia owa Melki,

Melki yawanga omuzia owa Aadi,

Aadi yawanga omuzia owa Kosaam,

Kosaam yawanga omuzia owa Elmadaam,

Elamdaam yawanga omuzia owa Eeri.

29 Eeri yawanga omuzia owa Yoswa,

Yoswa yawanga omuzia owa Eliazaari,

Eliazaari yawanga omuzia owa Yoriimu,

Yoriimu yawanga omuzia owa Mattaat,

Mattaat yawanga omuzia owa Laawi.

30 Laawi yawanga omuzia owa Simoni,

Simoni yawanga omuzia owa Yuuda,

Yuuda yawanga omuzia owa Yoseefu,

Yoseefu yawanga omuzia owa Yoanaamu,

Yoanaamu yawanga omuzia owa Eliakiimu.

31 Eliakiimu yawanga omuzia owa Melea,

Melea yawanga omuzia owa Meena,

Meena yawanga omuzia owa Mataatha,

Mataatha yawanga omuzia owa Nathaani,

Nathaani yawanga omuzia owa Daudi.[~12~]

32 Daudi yawanga omuzia owa Yeese,

Yeese yawanga omuzia owa Obeedi,

Obeedi yawanga omuzia owa Boazi,

Boazi yawanga omuzia owa Salmooni,

Salmooni yawanga omuzia owa Nasooni.

33 Nasooni yawanga omuzia owa Aminadaabu,

Aminadaabu yawanga omuzia owa Raamu,

Raamu yawanga omuzia owa Ezrooni,

Ezrooni yawanga omuzia owa Pereezi,

Pereezi yawanga omuzia owa Yuuda.[~13~]

34 Yuuda yawanga omuzia owa Yakoobo,

Yakoobo yawanga omuzia owa Isaaka,

Isaaka yawanga omuzia owa Abraamu,

Abraamu yawanga omuzia owa Teera,

Teera yawanga omuzia owa Naori.

35 Naori yawanga omuzia owa Seruugi,

Seruugi yawanga omuzia owa Reeu,

Reeu yawanga omuzia owa Peleegi,

Peleegi yawanga omuzia owa Ebeer,

Ebeer yawanga omuzia owa Seela.

36 Seela yawanga omuzia owa Kainaani,

Kainaani yawanga omuzia owa Alfaksaadi,

Alfaksaadi yawanga omuzia owa Seem,

Seem yawanga omuzia owa Noowa,

Noowa yawanga omuzia owa Lameeki.

37 Lameeki yawanga omuzia owa Methuseela,

Methuseela yawanga omuzia owa Enooka,

Enooka yawanga omuzia owa Yareedi,

Yareedi yawanga omuzia owa Maalaleeli,

Maalaleeli yawanga omuzia owa Kainaani.

38 Kainaani yawanga omuzia owa Enoosi,

Enoosi yawanga omuzia owa Seeth,

Seeth yawanga omuzia owa Adaamu,

ni Adaamu yawanga omuzia owa Katonda.[~14~]

<- LUUKA 2 LUUKA 4 ->