1 KORINITO 2

Riba Tabuna se hemasarahama nige tatao edi sonoga eai i laoma.

1 Egu tataoyao e, nabada ea laowa wa, nige ea laowa ma mana‐amnagu, eo egu riba nige se sonoga, Eaubada ena riba ea heriheribamiu. 2 Paana nuagu i adidiri taba nige ginauri esau ea nuatui omi boeamiu eai, ginauri esega mo Iesu Keriso, eo ia se hesatauro. 3 Ea miamia arimiu eai wa ma‐beruberugu, ma‐matausigu, eo ma‐tabutabubuaririgu. 4 Arinagu, eo egu guguia nige ma‐ribaamnadi, doha tatao edi sonoga, na Earua aba hemasarahana mo, eo gigiborina eai, 5 bena emi sunuma taba nige i ota tatao edi sonoga eai, na Eaubada ena gigibori mo arinai.

6 Taiede taunuasibasiba aridi eai ema riba sonoga taba ai ribaei, tanoubu ta sonogana nige’e, eo tanoubu ta wasawasadi edi sonoga nige’e, isi abo se tauyamui. 7 Na ai Eaubada ena sonoga ai ribaei, ribayamuyamui eai, sonoga wa se toreyamui, iaede Eaubada i nuatuiyao, huia ne tanoubu sorana, ita eda abahedebasae. 8 Tanoubu wasawasadi nige esau ina abina se ata. Ena abina se ata namanamarina Guiauna taba nige se hesatauro.

Earua ribadi taba nige tau ena sonoga eai ta italobaidi, na Eaubada i hemasarahadio tatao headi aridi eai, isi nuadi se nonohao.

9 na doha se uriyao,

“Mata nige se ita, bea nige se ataiei,

tau nuana eai nige se nuanuatui,

ginauri wa Eaubada i abinonohaidio ia taugadosisiena enadi.” (Is. 64.4; 65.17.)

10 Na Eaubada ginauri wa ia Earuana arinai i hemasarahadima arida eai. Paana Earua ginauri i itasipoidi, mamohoi Eaubada ena ginauri gabogabotumdi hinage. 11 Eai tau ena nuatu abidi i ata, na tau iabom mo earuana nuaboeana eai wa? Hinage doha nei Eaubada ena nuatu nige tau esau abidi i ata, na Eaubada Earuana iabom mo. 12 Tanoubu earuana ita nige ta aabi, na Earuana Eaubada arinai i laoma mo ta aabi; ginauri gamagamagari arinai Eaubada i aiainauianapaida, ita bena abidi ta ata. 13 Ginauri wa riba arinai ai ribaedi, nige tatao edi sonoga eai aie abi, na Earua ede i heatamai, ena nuatu mamohoi i hemasaraha isi Earua tauabina aridi eai.

14 Na tau buluma dobilana eai sorana Eaubada ena earua ginauridi taba nige i abidi, ia i ene ginauri eauyaure: ta ene nige abidi i ata paana earuada eai mo se masamasaraha. 15 Na ia earua ribana nuana eai, ginauri gamagaridi i nuatuheduduraidi, ia mo taba nige tau esau i hedudurai. 16 “Guiau nuana, eai i nuatulobai, ia bena i lauheata?” (Is. 40.13; Rom. 11.34.) Na ita Keriso nuana ta abi.

<- 1 KORINITO 1 1 KORINITO 3 ->