NAT JAX TƗ TƗƗ GU JUAN 19

1 Baꞌ miꞌ dhɨr muiꞌ dhɨt bhaiꞌ ji chum ñio gɇꞌ kɨꞌn bhammɨ dɨr jix dhaam, jup tum kaiꞌch:

¡Jaꞌp moor gɇꞌkam ji dhi Dios jich Gɨꞌkoraꞌ!

Gammɨjɨch tu daandaꞌ buiñor tuꞌ kaꞌm nɨiꞌdhat,

na guꞌr gɇꞌkam kat jir jix bhaiꞌkam.

Tɨɨꞌ nat jix bhaiꞌ duu nat tu ja uañ gu ja uaꞌtulhdharaꞌ gu jaꞌtkam mu jaꞌp oiꞌñgaꞌn bhaan,

puiꞌ kuch baꞌ dai dhiꞌ tuꞌ kaꞌm nɨidhat gɇꞌkamtuꞌndaꞌ gammɨjɨ.

2 Na guꞌ dhiꞌ nɨidhix kam ja tulhiiñchuꞌn gu jaꞌtkam nam jɨꞌk kuiñcha biaꞌ,

cham tuꞌ na sia guiꞌ nam jix bhaiꞌ tu jim.

Puiꞌ baꞌ nat jax ba ja dooda guiꞌ nam miꞌ oiꞌñkat gɇꞌ kiicham na paiꞌ Babiloonia tɨ tɨɨgich,

na mɨt guꞌ dhiꞌ maaxik gɇꞌkam kɨꞌn cham am bua buiñor,

na mɨt puiꞌ ja mamtux bɨɨx gu jaꞌtkam na jɨꞌk oiꞌñgaꞌn nam jax jaꞌk bɨɨx aixim tu buadaꞌ na tuꞌr uaꞌtulhdharaꞌ buiñor gu Dios,

gam nam tu daandaꞌ ja bui gu didios jup duñiixim,

gio na mɨt ja tulhiiñchudaimɨk ja koi guiꞌ nam mu jaꞌp tɨi pup tu ja aꞌgidhimɨk gu ñioꞌkiꞌñ gu Dios.

Puiꞌ kut baꞌ ja koi,

na mɨt guꞌ gɇꞌ bam uaꞌtulh.

3 Miꞌ dhɨr baꞌ moop kaiꞌch am ɨp gio gu muiꞌ nam bhammɨ dɨr bha ñiok jix dhaam:

―Gɇꞌkamtuꞌndaꞌ ich gu Dios jich Gɨꞌkoraꞌ, na guꞌx ioꞌm jir gɇꞌkam, gio na bɨxchuꞌx aichuꞌn na pu tu duñiaꞌ. Jaiñ nat jax ja dooda guiꞌ nam mu oiꞌñkat gɇꞌ kiicham Babiloonia tɨ tɨɨgim. Dhiꞌ gammɨjɨ miꞌ pup mɨɨjidhaꞌ am tai chɨr sia nar paiꞌ dhuuk kaꞌ gɨt.

4 Baꞌ gu maaꞌn ooꞌm daman maakob gu jaꞌtkam nam jir jagɨꞌgɨr paꞌ nam bɨɨx xikoolh dhɨr daraa miꞌ na paiꞌ daa gu Dios, gio baꞌ gu maakob sasoiꞌ nam bɨɨx xikoolh dhɨr jup guguuk, na mɨt jax ja oꞌlhia kɨꞌn guguu, naiꞌ ji mumgia mɨt, dɨɨrap xi chu sissap gu ja moom, bhaiꞌ ji chu daanɨ mɨt buiñor gu Dios, jup kaiꞌch am:

―Jɇɇꞌ, puiꞌ dho. Bɨɨx dhɨt jach dho gɇꞌkamtuꞌndaꞌ dhi Dios jich Gɨꞌkoraꞌ na yaꞌ daa.

5 Baꞌ jaꞌxpɨx bhaiꞌ dhɨr bhaiꞌp ji chum ñio sonpan na paiꞌ daa gu Dios, jup tum kaiꞌch:

Tu daandaꞌ pim buiñor gu Dios bɨɨx aapiꞌm na pim jɨꞌk mu jaꞌp oiꞌdhaꞌ dhi oiꞌñgaꞌn bhaan na pim jir tɇ gɇꞌgɇrkam,

gio aapiꞌm na pim jir jaꞌppɨx jaꞌtkam,

sia aapiꞌm na pim tuꞌ kaꞌm nɨidhat bhaankamuꞌn tu juan,

na guꞌx ioꞌm jir gɇꞌkam.

Na bar piasta kaꞌ bhammɨx dhaam na paiꞌ jaꞌp ji buusniaꞌ na bam tɨɨmoꞌ guch Xoiꞌkam

6 Miꞌ dhɨr baꞌ panaas ku mɨt muiꞌ dhɨt bhaiꞌ ji ñio gu jaꞌtkam, pɨx jap tum kaiꞌch na jax paiꞌ noꞌ gɇꞌ mɨr gu suudaiꞌ na sasbakdaꞌ, piam jaꞌp na jax chum kaiꞌchdhaꞌ noꞌ tɨm tɨroon, jup kaiꞌch am:

Bɨɨx dhɨt jach tuꞌ kaꞌm nɨidhat gɇꞌkamtuꞌndaꞌ guch Gɨꞌkoraꞌ,

na guꞌr gɇꞌkam kat bɨxchuꞌx aichuꞌn na pu tu duñiaꞌ.

Xib yaꞌ dɨr jaꞌp jaꞌk bɨɨx kap sia bar gɇꞌkam kaꞌ na jɨꞌx oiꞌñgaꞌn gam sia nar pa jaꞌk.

7 Joidham jach bɨɨx jich jujur kɨꞌn jix bhaiꞌch chaatɨt buiñor gɇꞌkamtuꞌndaꞌ.

Gio na guꞌ xib yaꞌr bhooꞌn kaꞌ,

bam ai guꞌ na paiꞌ dhuuk jum tɨɨmoꞌ dhiꞌ na jaꞌp ji buusan na gux kɨɨꞌ kasnir.

Yaꞌ bap tuꞌiiꞌ guiꞌ na bɨɨmaꞌn jum tɨɨmoꞌ,

8 ba tɨtɨiꞌ mɨt gux chua jannulh na joidham jir jix kɨɨꞌ gio nar totbikdam.

Gux chua jannulh, dhiꞌ pɨx kat jup jum kaiꞌch na mɨt joidham jix bhaiꞌ tu jii na jax jix aaꞌ gu Dios nam duduakat gu ja tutkuꞌ bhaan guiꞌ nam jɨꞌk tɨ jɨɨꞌñ buiñor.

9 Baꞌ maadɨt gu nobiiꞌñ gu Dios jup jiñ chɨtda:

―Jaꞌpnip miꞌp xi chu daasaꞌ uꞌuan taꞌm: “¡Jaꞌp moo joidham jix bhaiꞌ tu ja jimiaꞌ guiꞌ nam jɨꞌk baidhix nam tu jugiaꞌ gu bhooꞌn, nam guꞌ bɨɨx dhɨt bɨɨmaꞌn jum tɨɨmoꞌ dhiꞌ na jaꞌp ji buusan na gux kɨɨꞌ kasnir! Baꞌ yaꞌ dɨr jaꞌp jaꞌk gammɨjɨx jɨjɨkgɨm bap tuiꞌkaꞌ am.”

Gio baꞌ moo jaꞌpnip xi chɨi:

―Dhiꞌ nañ jɨꞌk jax jum tɨtda, bhaankamuꞌn gu Dios jañ puiꞌm tɨtda, cham tuꞌ aañ dɨɨlh. Sɨlhkam jup kaiꞌch gu dhiꞌ puiꞌ na jax kaiꞌch.

10 Baꞌ aañ na ñich jax jiñ oꞌlhia kɨꞌn kɨkbo, ba ji chu daanɨ ñich buiñor gu nobiiꞌñ gu Dios na miꞌ tuñ aꞌgiꞌñ, guꞌ ji na guꞌ guiꞌp jiñ chɨtda:

―Chaꞌp tu daandaꞌ aañ jiñ bui, nañ guꞌ aañ pur cham tuꞌ. Jir tujuandam tugiꞌñ iñ pɨx gu Dios jaꞌp na jax aap jiñ jaduuñ gio gu jaiꞌ nam jɨꞌk tuꞌ kaꞌm nɨidhat miꞌ puiꞌ ba jiim na jax chum aꞌga gux bhaiꞌm kaiꞌchdham ñiꞌook na bhaan tu aꞌga guch Xoiꞌkam. Guiꞌ ji Dios nap xi dhañiaꞌ.

Na guꞌ bɨɨx nam jɨꞌk bhaankamuꞌn tu aꞌga gu Dios, bɨɨx ja jujur kɨꞌn ba tɨ jɨɨgiꞌñ am na jax jum kaiꞌch gux bhaiꞌm kaiꞌchdham ñiꞌook na bhaan tu aꞌga guch Xoiꞌkam.

Na ba tu maiꞌchiaꞌ guiꞌ nax chua kabai chaꞌm jimdaꞌ

11 Baꞌ jaꞌxpɨx bhaiꞌ jim kupioꞌ gux dhaam, baꞌ bhammɨ bam maax maaꞌn gu maaꞌnkam jix chua kabai chaꞌm, na jaꞌpni tɨɨꞌ: Na puiꞌ tu kuugalhdhidhaꞌ jax noꞌt ba tɨi, gio na sɨlhkam jup kaiꞌchdhaꞌ. Na guꞌ guiꞌx bhaiꞌ ja sɨlhkaꞌn gu jaꞌtkam, gio na nɨidhix kam tulhiiñchudaꞌ gu jaroiꞌ noꞌt tuꞌ bhaan cham am bua buiñor. Piam noꞌt jaroiꞌ jax ba ji dhooda, tu kokdaꞌ ɨp buiñor. 12 Gu buupuiꞌñ gɇꞌgɇr mɨmɨim jaꞌp na tai, gio na muiꞌ ja tuttutuꞌ gu kukrun. Baꞌ bha kobtagiñ maaꞌn bhaiꞌ xi uaꞌñixchuꞌ gu ñiꞌook na pu cham jaroiꞌ maat na jax kaiꞌñkam jup jum kaiꞌch, dai guiꞌ dɨɨlh pɨx jix maat. 13 Baꞌ gu jannulh na tɨiꞌchuꞌ, ɨꞌɨɨr kɨꞌn mamxidhix, jix chukuum jix bɨꞌ. Gio baꞌ moo jaꞌpni jaꞌk jup tɨɨꞌ dhiꞌ jɨꞌ nax chua kabai chaꞌm jim: Gu ñioꞌkiꞌñ gu Dios. 14 Muiꞌ oiꞌñchuꞌ am ji guꞌ gu sandaaruiꞌx chugiꞌñ gu Dios puiꞌx chooto kakbai chaꞌm ɨp, gio baꞌ nam jix chooto tɨtɨiꞌchuꞌ, jix kɨkɨɨꞌx uꞌuañ gu ja jajannulh gio nar totbikdam. 15 Baꞌ maaꞌn chiñiꞌram dɨr busaak gu tɇb kuxiir na bɨxxik dɨr jix muꞌmuk. Dhiꞌ baꞌ kɨꞌn tu kokdaꞌ bɨɨx kap na jɨꞌx oiꞌñgaꞌn ja bui guiꞌ nam jix bhaamkiꞌñ. Miꞌ dhɨr jaꞌp jaꞌk baꞌ bar ja gɇꞌkam tuk kaꞌ bɨɨx na jɨꞌk jaꞌtkam, gio nax bhaiꞌ ja sɨlhkaꞌndaꞌ kɨꞌn gu baiñum oxiaꞌn, gio baꞌ na ja aagiꞌñdhaꞌ bɨɨx nam jɨꞌk tuꞌ jax buimɨk nam duduakat gu ja tutkuꞌ bhaan. Miꞌ dhɨr baꞌ dai na ba ja tulhiiñchudaꞌ guiꞌ nam jɨꞌk cham miꞌ puiꞌ jimiaꞌ na jax jix kɨɨꞌ kaꞌm nɨiꞌñ, jaꞌp ji buusniaꞌ na jax gu uubas noꞌt xi ba kɨiꞌ tootnaꞌn kɨꞌn, gio baꞌ na bha ja iꞌchdhaꞌ gu biiñ guiꞌ na giilhim jix xibuꞌ gio nax maimdaꞌ, na jax chuꞌm kɨꞌn tu tulhiiñchuꞌn gu Gɇꞌkam Dios na bɨxchuꞌx aichuꞌn na pu tu duñiaꞌ. 16 Baꞌ bha jaꞌp jannulhiram gio toonaram bhaiꞌ xi uaꞌñixchuꞌ na jax chɨɨꞌ, jup jum kaiꞌch: Gu ja gɇꞌkam tuk guiꞌ nam bɨɨx kap jir gɇꞌgɇrkam sia nar pa jaꞌk.

17 Baꞌ jaꞌxpɨx maadɨt gu nobiiꞌñ gu Dios bhammɨ ji kɨkbok bhaan gu tanoolh jup ja tɨtda bɨɨx gu uꞌjiꞌ nam bha jaꞌp nɨnɨꞌx dhaam:

―Bhaiꞌ gor sap jiim na pim tu jugiaꞌ gu koiꞌ na tu jam makiaꞌ gu Dios. 18 Na guꞌ gɇꞌ jaiꞌchdhɨlhiaꞌ gux kɨɨꞌ bakaax na pim tu jugiaꞌ, nar ja tutkuꞌ guiꞌ nam bɨɨx kap jir gɇꞌgɇrkam na jɨꞌx oiꞌñgaꞌn, gio gu ja gɇꞌgɇrkam tuk gu ja sandaaruiꞌx chuk, gam jaiꞌ guiꞌ nam jix oꞌjoꞌ nam giilhim jix maatɨt tu kokda, gio gu ja tutkuꞌ gu jaꞌtkam guiꞌ nam kakbai chaꞌm jiim gam gu ja bakxiꞌ gu ja kakbaiꞌ, gio baꞌ gu ja tutkuꞌ guiꞌ nam jir tujuandam gio baꞌ guiꞌ nam cham, gam guiꞌ nam palhɨɨp gɇꞌgɇrkam kɨꞌn dalhxix, gio baꞌ guiꞌ nam jir jaꞌppɨx jaꞌtkam.

19 Baꞌ gu nobiiꞌñ gu jaꞌook na giilhim tuꞌm tu tuukuꞌ gio nax xijum gook tu moom, ja bɨɨm guiꞌ nam jir gɇꞌgɇrkam bɨɨx kap na jɨꞌx oiꞌñgaꞌn, gio gu ja sandaaruiꞌx chuk, maap bam jumaap jamɨt nam ba tu kokdaꞌ buiñor guiꞌ nax chua kabai chaꞌm jim ja bɨɨm gu sandaaruiꞌx chugiꞌñ. 20 Guꞌ ji nat guꞌ cham tuꞌ maꞌiich gu nobiiꞌñ gu jaꞌook, nat guꞌ tuꞌ pɨx dooda guiꞌ nax chua kabai chaꞌm jim. Baꞌ pu daa mɨt gu nobiiꞌñ gu jaꞌook bɨɨmaꞌn guiꞌ na bhaankamuꞌn ja iatgidhimɨk gu jaꞌtkam na bɨɨx aixim jix bhaiꞌm duukam jup tu buimɨk ja nɨiꞌñchudat nat bhaan pɨx ja iatgi nam baꞌ aagaꞌ nam jum matgilhdhaꞌ ja kokobtaiꞌ am na bhaan jix maatɨꞌ kaꞌ nam ba kaichuꞌ gu jaꞌook, gio nam baꞌ tu dañiaꞌ buiñor guiꞌ nar jup duiñxim na puiꞌp tuꞌm na gu nobiiꞌñ gu jaꞌook. Baꞌ ja uꞌuuk mummu xi ja iabu mɨt puiꞌ dudua kam na paiꞌ gɇꞌ mɨim gu tai, na giilhim jix mɨim nax ioꞌm jix choiñ. 21 Gu jaiꞌ baꞌ nam kaichgɨt gam gu sandaaruiꞌx chugiꞌñ, ja koi dɨɨlh guiꞌ nax chua kabai chaꞌm jim kɨꞌn gu tɇb kuxiir na bɨxxik dɨr jix muꞌmuk na chiñiꞌram dɨr busaak. Baꞌ bɨɨx gu uꞌjiꞌ bhaiꞌ ji chu juu mɨt gu ja tutkuꞌ, tu koiꞌmɨk am jum juꞌ mɨt.

<- NAT JAX TƗ TƗƗ GU JUAN 18 NAT JAX TƗ TƗƗ GU JUAN 20 ->