APOSOLO 13

Banabasi Solo yaapo meata꞉ tapaemekeeki

1 Mo A꞉ndioko siosi tapake pa꞉ta꞉ mandane potopede haliweki make pi walo haemeke haliweki make haemekeme. Koda꞉na꞉ pi lao hayeke Banabasi make Simioni biki ma꞉nda꞉ Naidia make Saitini hali Lusiasi make hande you hali Hetodina꞉ yankeke hali homeke Maneini make Solo make haemekeme. 2 Kutupa Tekehali pa꞉ta꞉ ne na neke panda꞉puniaaso haena꞉ mo Holi Sipitidima꞉ alota꞉ Banabasi Solo yaapo yaka walo polo e pokaena꞉yeketa꞉ pa nane haena꞉ lape leekeme. 3 Kutupa pa ne na neke yeni peaata꞉ mo hali yaapona꞉ youna꞉ kiki wiata꞉ hande leeke e pokaena꞉ pena꞉ tapaemekeme.

Saipotasi haepekeeki

4 Koto ekina꞉ hande hali yaapota꞉ mo Holi Sipitidima꞉ tapaaso haena꞉ oni Selusia nane pepekeme. Koto pa꞉ta꞉ opolo pua Saipotasi nane palai kawaso tiekena꞉ pita pepekeme. 5 Kutupa Salamisa da nane opolo puaata꞉ Diu haliwekina꞉ pi hotu haemeke damanu pa꞉ta꞉ Koda꞉na꞉ pi ale waloendi pu haepekeme. Dioni Makama꞉ make ipiliki petoloendi pu hayekeme.

6 Mo hoki paeyao pa꞉ta꞉ waloendi pu haota꞉ mo Peiposi da nane puaata꞉ ti̱o̱ hali homeke bikita꞉ Ba Yesu handepekeme. Ipikita꞉ Diu hali hata꞉ pa yayapiki potopede hayekeme. 7 Koto halita꞉ mo hokina꞉ kapomani you hali Sesiasi Polasi yaapo ame̱le̱ hao hayeke halie. Mo Sesiasi Polasi ipikita꞉ hone wopu lenkena꞉ pea u hayeke halie. Mo kapomani you halima꞉ Koda꞉na꞉ pi opuluekema꞉ Banabasi Solo yaapo ipiki pa꞉ta꞉ epena꞉ wi leekeme. 8 Hali yaapo pepekepate mo ti̱o̱ hali Elimasima꞉ mo Kitiki pi laa koto ti̱o̱ halina꞉ bikita꞉ Elimasie ipikana꞉ma꞉ta꞉ Banabasi Solo yaapo sa꞉sa꞉ puluekema꞉ taapeekeme. Mo kapomanina꞉ you halima꞉ Tekehali pa꞉ta꞉ hone tulaasa꞉eki pao la꞉ka꞉la mina haena꞉ loluekema꞉ taapeekeme. 9 Kutu pieke handa Solo ipika꞉ biki ma꞉nda꞉ Polo ipikana꞉ma꞉ta꞉ Holi Sipitidima꞉ ipiki tumba pitina꞉ mo ti̱o̱ hali handaake wia alota꞉ 10 Neketa꞉ Sadanina꞉ halie. Epeke alemanu paeyao pa꞉ta꞉ a꞉nda꞉ lu halemee. Mo hoke hoke yayapiki haumanu pita꞉la꞉eki neke pa꞉ta꞉ tumba pila꞉me laata꞉ Tekehalina꞉ ota꞉ pimanu kone nakana꞉ma꞉ta꞉ yayapiki pimanu laa la꞉ka꞉laluekema꞉ taapo haleme. 11 Koto ekina꞉ ameta꞉ Tekehalima꞉ neke liekee. Kutupa neketa꞉ leke holupiki hali hao hata꞉ta꞉ nate pa̱a̱ a̱i̱ na handilipikie laa leekeme.

Poloma꞉ koto alo haena꞉ kone timba꞉la꞉ pambeke koama꞉ handeke alema꞉ Elimasina꞉ leke telipina꞉ holu peaeyekeme. Ma꞉nda꞉ma꞉ ipika꞉ kiki yola꞉ mea mina pena꞉yeke kikima꞉ hali weiya꞉tiki pomiekeme. 12 Mo kapomanina꞉ you halima꞉ta꞉ kutu piekeeki hando haota꞉ hone tulaeyekeme. Tekehalina꞉ pi waleekeeki opitolo hata꞉ penkilipa꞉tia pomiekeme.

Pisidia nane hayeke da A꞉ndioko da pa꞉ta꞉ pepekeeki

13 Polo ame̱le̱ mandakena꞉ pemeke haliwekita꞉ palai kawaso tiekena꞉ pitata꞉ mo Peiposi da mina꞉pa꞉lao mo Pa꞉mbilia nane hayeke da Peka pa꞉ta꞉ opolo pemekeme. Koto pa꞉ta꞉ opolo pemekepate Dioni Makata꞉ iki mina꞉pa꞉lao Diutuseleme nane pa la꞉ka꞉la peekeme. 14 Peka da mina꞉pa꞉lao puaata꞉ mo Pisidia da nane hayeke da A꞉ndioko da pa꞉ta꞉ opolo puaata꞉ mo Hoto Pila꞉ Natena꞉ mo haliwekita꞉ mo Diu haliwekina꞉ pi hotu haemeke da pa꞉ta꞉ honda꞉ pamba pua pitimikime. 15 Hali ma꞉nda꞉ma꞉ mo Mosesima꞉ wape pea ula꞉ Lo Pimanu make mo potopede haliwekima꞉ wape pea ula꞉ pimanu make yata꞉pa haena꞉ta꞉ mo pi hotu haemeke da you haliwekima꞉ Polo ameda pa꞉ta꞉ pi la꞉moneaaso alota꞉ Kame titio. Wanda꞉hali honkopu hao halo pa꞉la꞉ pi lapa꞉peke yea꞉ka꞉na꞉ta꞉ kota꞉ loa꞉mina꞉e hone witoloma꞉me lemekeme. 16 Koto lemeke Poloma꞉ tiao hata꞉ kiki mea a꞉meiyao pi dupa waleekeme.

Ya tapake Isulai wanda꞉hali iki make Koda꞉ pa꞉ta꞉ panda꞉puniao yeni pu haleme Diendaili wanda꞉hali paeyao iki make I̱ma꞉ alo pi opua꞉pe laata꞉ 17 Koto Isulai tapake wanda꞉halina꞉ Koda꞉ma꞉ nika꞉ apa꞉mei ameda mea haena꞉ laata꞉ mo Idiepi kenke nane da ma꞉nda꞉ wanda꞉hali hata꞉ kone tapake tieke wanda꞉hali hamina꞉ leekeme. Koda꞉ma꞉ ipika꞉ wele wotu pita꞉la꞉ ekima꞉ koto wanda꞉hali Idiepi nane mina꞉pa꞉lao hatuku puaata꞉ 18 mo hapu hayeke alena꞉ bapi 40 mo wanda꞉hali koto pa꞉ta꞉ hata꞉ ikita꞉ ka꞉nda꞉ma꞉ homo hatiki pimikipate Koda꞉ma꞉ handeteke hatiki pu hayekeme. 19 Mo Keinani kenke pa꞉ta꞉ haemeke tapake watake hata꞉ wanda꞉hali ipikana꞉ma꞉ hoeyaota꞉ ipika꞉ wanda꞉halita꞉ koto kenke teke wanda꞉hali haena꞉ leekeme. 20 Kutu pu paeyaasa꞉ ekina꞉ bapi manuta꞉ pa 450manu yapeekeme.

Kutupa wetepe naneta꞉ ipikana꞉ma꞉ iki pa꞉ta꞉ pi yokaalu peao haemeke teke haliweki haena꞉ loma꞉ loma꞉ pua꞉tiki a꞉pa mo potopede hali Samuele ipiki a꞉pa hayekeme. 21 Mo wanda꞉halima꞉ Nika꞉ kini hali ma꞉nda꞉ haena꞉e laa honke lemeke handa Koda꞉ma꞉ iki pa꞉ta꞉ Solo mea haena꞉ leekeme. Ipikita꞉ Benisamini tapake hali Kisina꞉ eiyeke hata꞉ ika꞉ kini hali haena꞉ yapeeke bapi manuta꞉ 40e. 22 Kutu piekepate Koda꞉ma꞉ Solo yoka pa nane haena꞉ laa Deipidi meata꞉ kini hali haena꞉ leekeme. Koda꞉ma꞉ Deipidi hayekeeki handaata꞉ pi dupa leekeme. I̱ma꞉ handolo alota꞉ dupae. Diesina꞉ eiyeke Deipidita꞉ ipika꞉ hala꞉eki handolo hata꞉ I̱ma꞉ hone pa꞉la꞉me laata꞉ koto halima꞉ta꞉ I̱ma꞉ hone pa꞉la꞉eki paeyao ipikana꞉ma꞉ pilieke la leekeme. 23 Hande Deipidina꞉ tapake hali Yesuta꞉ Koda꞉ma꞉ la꞉ wieke tupa꞉ Isulai wanda꞉halina꞉ Da꞉taala꞉ Hali haena꞉ la꞉la꞉me. 24 Yesuma꞉ e a̱i̱ na kini pu mea pokeeke haena꞉ta꞉ Dionima꞉ Isulai wanda꞉hali paeyao pa꞉ta꞉ pi waleekeme. Ika꞉ hoke hau pimiki ekimanu mina꞉pa꞉laota꞉ bapitaisi pina꞉yeke pi waleekeme. 25 Kutupa Dionima꞉ ipika꞉ e poko paeyaaluekema꞉ hata꞉ wanda꞉hali pa꞉ta꞉ alota꞉ Ika꞉ honema꞉ I̱ halo ekita꞉ epi hone witelemepe. Ikana꞉ma꞉ yu wia haleme halita꞉ I̱ dia꞉ya꞉la꞉pate handa꞉pe. Yaka hoki nane ipula꞉me. Koto ipula꞉ halina꞉ anke daketa꞉ I̱ma꞉ holawaapeketa꞉ ana꞉ na pa꞉la꞉me laa leekeme.

26 Eipoloha꞉ma꞉ tapake haliweki ya kametitio. Koda꞉ pa꞉ta꞉ panda꞉puniao yeni pu haleme Diendaili wanda꞉hali paeyao iki make Koda꞉ma꞉ do hande niki da꞉taapeke ya꞉la꞉ pi niki pa꞉ta꞉ epena꞉ la꞉la꞉me. 27 Mo Diutuseleme da pa꞉ta꞉ haleme wanda꞉halima꞉ make ika꞉ you haliwekima꞉ make Yesuta꞉ wanda꞉hali Da꞉taasa꞉ Hali hala꞉ ekita꞉ hone na wimikime. Mo Hoto Pila꞉ Natemanu paeyaona꞉ mo hande potopede haliwekima꞉ wape pea ula꞉ ekimanu yata꞉po halemeeki make hone wopu na wilimime. Kutu pimikipate ikana꞉ma꞉ta꞉ Yesuta꞉ lia homaemeke ekima꞉ mo hande potopede haliwekima꞉ wape pea ula꞉eki kone yaemekeme. 28 Kutupa ikana꞉ma꞉ Yesu lia homaaluekema꞉ta꞉ pa꞉la꞉eki teke ma꞉nda꞉ na handa꞉ wiki kone Pailedi pa꞉ta꞉ pua honke alo alota꞉ Yesu homae laa honke lemekeme.

29 Kutupa hande Baibolo bukana꞉ Yesu pa꞉ta꞉ pulu piekeeki wape pea ula꞉eki kone ikana꞉ma꞉ pu paeyaemekeme. Mandane haliwekima꞉ta꞉ Yesu toko mo a꞉ka꞉tei wapepiki tina꞉ endiaemekeme alena꞉ pua honda꞉ mea pua lapa꞉ pimikime. 30 Kutu pimikipate Koda꞉ma꞉ mo lapa꞉ wieke alena꞉ Yesu pa mea tiaeyekeme. 31 Kutupa ipikita꞉ ipiki ame̱le̱ mandakena꞉ Ka꞉lili nane hao Diutuseleme da pa꞉ta꞉ pemeke wanda꞉hali pa꞉ta꞉ ipiki handena꞉ hoto elekeeleke peneme yao ipika꞉ leke mineke wala꞉tiki piekeme. Ameta꞉ koto wanda꞉halita꞉ ika꞉ Yesu handemeeki Isulai wanda꞉hali pa꞉ta꞉ la halele wanda꞉hali halememe. 32-33 Kutupa dikana꞉ma꞉ make koto hande Pi Seliapo iki pa꞉ta꞉ la kuluekema꞉ a꞉pa halopa꞉me. Koda꞉ma꞉ make nika꞉ apa꞉mei ameda pa꞉ta꞉ pi la꞉ wiekeeki ameta꞉ ika꞉ wekiwandiki titi niki pa꞉ta꞉ peaowala꞉me. Yesu da꞉taala꞉ ekima꞉ta꞉ nika꞉eki peaowala꞉me. Hande hoto yaapo peao wape pieke Emeli pa꞉ta꞉ wape pa꞉la꞉ tupa꞉ dupae.

Neketa꞉ yaka Wekie. Ame do natena꞉ I̱ta꞉ naka꞉ Apa꞉ halome

laa wape pa꞉la꞉me. 34 Kutupa Koda꞉ma꞉ Yesu lapa꞉ wieke alena꞉ mea tiao pa hoto ma꞉nda꞉ a꞉nda꞉ paa na homolo pieke ekina꞉ Koda꞉ma꞉ pi dupa leekeme.

Hande Deipidi pa꞉ta꞉ I̱ma꞉ pi la꞉ ulueki kone I̱ma꞉ epeke yakopiki hauma꞉ neke ota꞉ epeaalueke

laa wape pa꞉la꞉me. 35 Kutupa make mo Baibolo bukana꞉ pa ma꞉nda꞉ma꞉ Koda꞉ pa꞉ta꞉ pi alo hata꞉ dupa wape pa꞉la꞉me.

Naka꞉ Yakopiki Halina꞉ loke na tandepena꞉ lelipikie

laa wape pa꞉la꞉me. 36 Deipidi ipika꞉ hayeke pita꞉ta꞉ Koda꞉na꞉ hone pa꞉la꞉ ekimanu pia꞉tiki pu hao wetepena꞉ homeekeme. Ipika꞉ apa꞉mei ameda lapa꞉ pimiki alena꞉ ipiki make koto pa꞉ta꞉ lapa꞉ pimikipate ipika꞉ loke make tandepeekeme. 37 Kutu piekepate Koda꞉ma꞉ lapa꞉ wieke alena꞉ paa mea tiaeyeke halita꞉ ipika꞉ loke na tandepeekeme. 38-39 Ya kametitio. Iki paeyaoma꞉ doeki ota꞉ hone wia꞉pa꞉peke. Yesu ipikana꞉ma꞉ pa꞉la꞉ ekima꞉ kone ika꞉ hoke hau pimiki ekimanu pa hameke paeyaapeke pi iki pa꞉ta꞉ waloloma꞉me. Wanda꞉hali epi amedama꞉ ipiki pa꞉ta꞉ hone tulaeya꞉ka꞉na꞉ta꞉ kota꞉ ipika꞉ hoke hau piekeeki manuta꞉ Mosesima꞉ wape pea ula꞉ Lo Pi manuma꞉ ka꞉la꞉pa꞉ tapaapeke na ya꞉la꞉pate Yesuma꞉ ka꞉la꞉pa꞉ tapawalieke. 40 Koto pa꞉la꞉ ekina꞉ wotu handeteke hapa꞉peke. Mo hande potopede haliwekima꞉ leeke ekimanu iki pa꞉ta꞉ a꞉paama꞉na꞉ loa꞉me. Dupa

41 Koda꞉ma꞉ la꞉la꞉ pimanu pa꞉ta꞉ pi la la pu haleme wanda꞉halio. Handa꞉pe.

Kutupa handolo hata꞉ penkilipa꞉tia pomua ota꞉ homa꞉pa꞉pekee.

Iki haleme dina꞉ta꞉ I̱ma꞉ pokolo polo eta꞉ ikana꞉ma꞉ hone na wilimikie.

Ma꞉nda꞉ma꞉ iki pa꞉ta꞉ la kina꞉ kone opua hone na tulaalimikie laa wape pa꞉la꞉me.

42 Solo Banabasi yaapota꞉ hama꞉ nane pulu haena꞉ wanda꞉halima꞉ ipiliki pa꞉ta꞉ alota꞉ Hande lepe pi mo Hoto Pila꞉ Nate ma꞉nda꞉na꞉ make pa lopena꞉e laa honke lemekeme. 43 Kutupa mo pi hotu haemeke da pa꞉ta꞉ pi hotia paeyeketa꞉ Diu haliweki wopu make Koda꞉ pa꞉ta꞉ hone wopu u haemeke Diendaili haliweki wopu make Polo Banabasi yaapo teli mea pemekeme. Kutupa ipilikana꞉ma꞉ mo haliweki pa꞉ta꞉ pi laata꞉ Koda꞉na꞉ pa a꞉ta꞉ma꞉ homa꞉la꞉eki honkopu hao wotu miniki hao haena꞉ pi walepekeme.

44 Kutupa mo hande Hoto Pila꞉ Nate ma꞉nda꞉na꞉ mo daoni nane wanda꞉hali paeyao Koda꞉na꞉ pi opuluekema꞉ mombelemekeme. 45 Kutu pimikipate mo Diu haliwekima꞉ mo wanda꞉hali paeyao handaata꞉ honditi pitolo hata꞉ Poloma꞉ leeke pita꞉ Ya pi ala꞉me laa ipiki pa꞉ta꞉ pi la la pimikime. 46 Kutupa Solo pita꞉ Banabasi yaapoma꞉ paala꞉ma꞉ na homeke hata꞉ pi alo alota꞉ Iki pa꞉ta꞉ amba꞉la Koda꞉na꞉ pi ale wala꞉peke ya꞉la꞉pateo. Ikana꞉ma꞉ kiaaso hata꞉ Nikita꞉ deto hala꞉eki mea꞉peke na ya꞉la꞉me alemeke handaata꞉ kota꞉ handa꞉pe. Mo Diendaili wanda꞉hali pa꞉ta꞉ walo pulupa꞉me lepekeme. 47 Pa ekipeke Koda꞉ma꞉ dupape laa niki pa꞉ta꞉ leeke ekita꞉ dupae.

Ikita꞉ mo Diendaili wanda꞉halina꞉ pa̱a̱ pita꞉la꞉eki hamina꞉ la꞉la꞉me leekeme.

Ikana꞉ma꞉ mo kenke honiki nane pa꞉ta꞉manu da꞉taasa꞉eki mea pomina꞉ la꞉la꞉me leekeme.

48 Kutupa mo Diendaili wanda꞉halima꞉ koto pi opuaata꞉ ta꞉na꞉ma꞉ homolo hata꞉ mo Koda꞉na꞉ pi laemekeme. Kutupa deto hala꞉eki mulu pimiki wanda꞉halima꞉ pi mimikime.

49 Kutupa Tekehalina꞉ pi aleta꞉ da paeyao pa꞉ta꞉ kende tia wiekeme. 50 Kutu piekepate hande Diu haliwekima꞉ mo Koda꞉ pa꞉ta꞉ hone wopu u haemeke wanda꞉ tieke tieke mandaneeki manuma꞉ make mo daonina꞉ you haliwekima꞉ make Polo Banabasi yaapo ame̱le̱ a꞉nda꞉ lina꞉yeke sutiaemekeme. Kutupa koto da nane mina꞉pa꞉lao pena꞉yeke tolu limikime. 51 Kutu pimikipate mo hali yaapoma꞉ ipilika꞉ ankena꞉ taleeke dokolota꞉ koto A꞉ndioko wanda꞉hali pa꞉ta꞉ tandelaata꞉ Aikoniomo da nane pepekeme. 52 Kutupa mo disaipolo wanda꞉halima꞉ Holi Sipitidima꞉ tumba pita꞉ ta꞉na꞉ma꞉ homa꞉ tiaaso haena꞉ haemekeme.

<- APOSOLO 12 APOSOLO 14 ->