Link to home pageLanguagesLink to all Bible versions on this site
3
Yeesu yɛ Moisi felɛ

1 Lɛ̃ nnyɑ pinɛ́mɑ́rɛcɔ, nɔ̃́ nɛ Uléécɑɑ yɛɛ nɔ́ n sée pikɔ́ lɛ. Lɛ̃ nnyɑ, ɑni Yeesu n nyɑ́ni. Uyɛ̃ kɑri nyu rɛ utumɛ nɛ Uléécɑɑ usinɑ. Uyɛɛ nfɑtɛnɛ nsímɛ́ kɑri n yóólɛ̃. 2 Pi Moisi kɛcɑ́ɑ́ wɔ́i rɛ: Moisi yɛ pɛɛ Uléécɑɑ kɛyɔ nnɛ́í kɛ́mɛɛ ɑsei ute lɛ. Limɛcɔ kɛ Yeesu pɔ́ɔ kɔ pɛɛ Uléécɑɑ kɛ́mɛɛ ɑsei ute, uu u pɑnsɛsɛ usínɑ. 3 Nkó yɛɛ kɛ́yɔ m mɔ̃́ yɛ ríyu mɑ́lɛ ɑi kɛ́yɔ kɛ̃ feriyɛ. Lɛ̃ nnyɑ kɛ Yeesu uu ríyu yɛ̃ ɑi Moisi rikɔ́ feriyɛ. 4 Unyinɛ yɛɛ yɛ kɛ́yɔ mɔ̃. Amɑ́ Uléécɑɑ yɛɛ yɛ ḿpɑ́ yo mɔ̃. 5 Moisi yɛ pɛɛ Uléécɑɑ kɛyɔ pikɔ́ nnɛ́í kɛcɔpɛ ukɛikɔ́ nɛ ɑsei ute lɛ yɛɛ yɛ́ mmɛ̃ kɛ Uléécɑɑ uu ḿ mɑɑnɛ kɛcɑ́ɑ́ ń símisi. 6 Amɑ́ Kirisi pɔ̃́ nɛ Kɛpipi lɛ kɛɛ Uléécɑɑ pikɔ́ kɛcɑ́ɑ́ ḿ pɑílɛ̃ ńsɔnɛ. Lɛ̃ kɛ́mɛɛ kuu ɑsei ute. Tɔ́ɔ nní lɛ̃ ukɛyɔ pikɔ́, in tɛ ɑ́ri iwɑmɛ mɑ́, tɔn kɔ tɑ́lɛ̃ in kɔ rɔ́ lɑ́ɑ́rú.

Uléécɑɑ pikɔ́ yɛ́ kɑm ɑpi wéntɛ

7 Lɛ̃ nnyɑ kɛ Uléécɑɑ Nfɑɑsɔnɛ nń mɑɑ rɛ:

Nɔn nɛni kɛyɑɑ nkɛ́ urinɔɔ n kõ,
8 ɑ́ni kɑpɛ nɔ́ɑnɛ́kíŋ tɑkɑɑsɛ yɑrɛ kumúŋɛ́ kpɛ-i kɛ nɔ́pinɛ́sɑ́ɑyɑhɑ ɑpí pɛɛ u n kɛ́si ɑpi kɔ kucɛsi kóimɑ-i u peikɛɛ mɛcɔ.
9 Likumúŋɛ́ kpɛ-i kɛ nɔ́pinɛ́sɑ́ɑyɑhɑ ɑpi rinɔ́ɔ nɛ́ wɛ́ɛsi ɑpi kucɛsi kóimɑ kɛ́mɛɛ nɛ́ peikɛɛ.
Pin kɔ nɛ pikɛi pɛ̃ kɑm ɑŋmɛ̃ ɑfɛɛnɑ kɛ́mɛɛ n wɑ yɛ̃.
10 Lɛ̃ nnyɑ kɑḿ pɛɛ́ nɛ kunɑi kpɛ̃ pikɔ́ wɔ́ɔsi ɑm tɛ
pi pikɛmúŋɛ́ kɛ́mɛɛ pɔlulɛ, ɑ́pi nnɛ́cée nyu.
11 Kei kɑi kuwɔ́i nɛ́ wɑ ɑm wééri rɛ ɑsei kɛcɑ́ɑ́, ɑ́pi píkɑi kɛwéntɛ kɛ̃ kɑm n yekeilɛ̃ kɛ́mɛɛ loninɛ.

12 Lɛ̃ nnyɑ, ɑni nɔ́mɛnɛ́círɛ tĩ, pimɑ́rɛcɔ, ɑ́i kɑpɛ wɑ rɛ nɔ́ unyinɛ yɛ rikíŋ kópɛ mɑ́ úu yɛ kɔ Uléécɑɑ pɑkɑrɛ, ɑi tíyɛsɛ uú nɛ Uléécɑɑ yɛɛ nfɑ́ɑ n te kɛpirɛ tɔ. 13 Lɛ̃ nnyɑ, ɑni ikɑri n kpɑriisɛnɛ ḿpɑ́ kɛyɑ́ɑ kɛ́ye kɑpi yɛ́ n fe ɑpi séi rɛ: Nɛni kɛkɔ́, ɑkópɛ ɑ́ɑ kɑpɛ nɛ nɔ́kɛnɛ́cɔpɛ úkɑ rintíkíí urikiŋ tikɛ́ tɑ́kɑsi nnyɑ. 14 Asei kɛcɑ́ɑ́, in tɛ tɔ nfɑtɛnɛ kɑri hɑ́i kɛ́korɑɑnɛ-mɛ m mɑ́ ńsɔnɛ múílɛ̃ nɛ kɛyɑ́ɑ tɔrɔɔ-pɔ, tɔ́ nɛ Kirisi yɛ pɛɛ lɛ̃ pɛ́nɛlɛnlɛ tɔn nɛ we.

15 Li wɔlɑɑlɛ̃ tɛ:

Nɔn nɛni kɛyɑɑ nkɛ́ urinɔɔ n kõ, ɑ́ni kɑpɛ nɔ́ɑnɛ́kíŋ tɑkɑɑsɛ yɑrɛ
kumúŋɛ́ kpɛ-i kɛ nɔ́pinɛ́sɑ́ɑyɑhɑ ɑpí pɛɛ u n kɛ́si ɑpi kucɛsi kóimɑ-i u peikɛɛ mɛcɔ. 16 Píye pɛɛ Uléécɑɑ rinɔɔ kõ ɑpi kɔ pɛɛ rinɔ́ɔ u wɛ́ɛ́si? Píye picɔ, insɑ́ pɛ̃ nnɛ́í kɛ Moisi uú nɛ Esipiti kɛtẽ-pɔ n léemɛ? 17 Píye kɛ Uléécɑɑ uú nɛ wɔ́ɔsi ɑŋmɛ̃ ɑfɛɛnɑ? Píye picɔ, insɑ́ pɛpɛɛ ɑkópɛ n wɑ ɑpi kucɛsi kóimɑ-i kpíni? 18 Píye kuú nɛ wéeri rɛ: Asei kɛcɑ́ɑ́, ɑ́pi píkɑi kɛwéntɛ kɛ̃ kɑm n yekeilɛ̃ kɛ́mɛɛ loninɛ? Píye picɔ, insɑ́ pɛpɛɛ kupɑkɑrɛcirɛ́ u n nyísɛ. 19 Lɛ̃ nnyɑ, tɔ yɛ̃ tɛ nfɑtɛnɛ kɑ́pi m mɑ́ nnyɑ kɑ́pi fe pikɛ́ kɛwéntɛ kɛ-i lompɔ.

<- Epireeyɛ 2Epireeyɛ 4 ->