Bumpaida 50

1 Tane Iosep mamba boleno ewene alene mamba osowe itulene kekesadie ita isuruwasadie. 2 Ita Iosep bunama nolawa dewalala apanawa diamona me mamba bolena etepa osowe bunama itupu. Ita mo me etepa osowe bunama ituiena etepa badowa winompa baiwa. 3 Tane me boleno mo wimone etepa badolepia baiwa simbiasaie bunamantoio walama 40 dialen. Ema aupe Isibt apanawa kakontoio walama 70 dialen.

4 Ita mo bo kakowa waio dialeno aupe Iosep alene warere nolawa dewalala debamawa diene wanase, “Rua ba dia e aite ne baina warere diee waase,

5 ‘Ne mamana dianeno mampe sauanten, me wanase, “Ne bonteapa baiwantedina ita bonteapo etena wade leuite aite Kanaan bolawa bedewe bo nagawa ne imaasana bedewe dobosanea.”[a] Sa baiwa me ne waaubanepio anteape mamana dobontape leuntape wimpa.’ ”

6 Ita warere Iosep gagalowa etene wanase, “Ide e saua ituana rua mamaa bolena etepa wadee aite doboite leute wina.” 7 Tane Iosep a baiwaleidio warere sauwa apanawa mo eiau ita Isibt apanawa debamau uduudu enane Iosep sausane do anton bo dobontopua baiwa. 8 Ita Iosep duwa bedewe wanwanlala, me tatatawa, wamba ita me mamba duwa bedewe wanwanlala uduudu mo do antoiena. Tane otooto kerakera, pue sipsip, gote ita kau os emoieno bola Gosen bedewe wankasanton. 9 Tane turaka teiteinalala ita oas osowe wanwanlala apanawa eneieno Iosep ita apana sa uaraia do antoiena.

10 Ita mo antone esa Ioadan tampe bola debama Atad bedewe nana wit ipawa ita sewa empuiasaiawo wimoiena. Ita sape mo nuapare kakowa debamaia waie. Tane Iosep nuaparepare dewawa rua dewasadie mamba kewa wadio walama 7 dianton. 11 Tane Isibt apanawa bola debama Atad bedewe waine nuaparepare kewa debamaia waie. Ita Kanaan apanawa mo ewamone waienase, “Isibt apanawa ke debamaia wai.” Sa baiwa Kanaan bolawa sa ebowa Abel Misraim[~2~] wane ituiena.

12 Ita Iakob obampa diamona rua, aiawa ruawantone dewasaiena. 13 Mo Iakob awanene antone Kanaan tawowa bedewe bola Mamre tampe Mapelawo bo nagawa imaasaienawo dobontoiena. Tane bo teamompa bolawa sa bauta Abraam apana ebowa Epron Itai apanawa mampe gimaralena.[~3~] 14 Sape Iosep mamba dobolene ene aupe me tatatawa, wamba ita do mo mida me warorosane wimoiena uduudu leuntone Isibtiwa anton.

Iosep aiawa obasa aiaisiwa mampe tatatawa diamode

15 Ita mo mambu boleno aupe Iosep tatatawa me mampe kadiwa dewasaiena insene santone waienase, “Tauma dauwa no wainimba mampe kadiwa dewasatana sipoa nuawa kadilepio kadinepi.”

16 Mo epe insene Iosep mampe gagalo wanaaubene waienase, “No mamamba muriwa bolen, e no do dodomanantata umanawa wanase, 17 E Iosep ema epe diana, ‘E tatataa kadiwa debama manawo dewasaiena, tane ne menanedia e mo kadiu inseadabuasa.’

Sa baiwa no e mamaa Godiwa nolawa dewasaitana apanawa iririeitana kadimba inseadabuasaa.” Tane Iosep tatatawa gagalou etene ke debamaia wan. 18 Tauma me sosowa antone me mampe wimone danawe dunentone waienase, “No ipa tauma e nolaa dewalala os atoawontate simbiaente wainenta.”

19 Tane Iosep aiawa aiaisiwa obasa mampe wadewasamone wanase, “Ne mai God ita matangelalepa insene saitana, dia. 20 Mapo e ne mainawo kadiwa dewasalana, tane God kadiwa leusane euwa mainawo dewasan, ita apana uara mai bontopu, dia, tane inawaa wampu ande eweitana rua. 21 Sa baiwa e mai saitana, ne e ita obanla do onialepa.” Me epe wane wasaumone nuau badosan.

Iosep bowa gagalowa

22 Tane Iosep mamba damba do Isibtiwa waimoio ita me enawa odene alene 110 waden. 23 Ita me wandio danawe Eparaim obampa me atatawa muntoiena ita do Manase otopa Maki obampa munton ita mo otene antono Iosep otene danawe teene mebaawa wanamon.

24 Tane Iosep tatatawa ita wamba diamone wanase, “Ne bo baiwantedina, God e oniadewasalepie bola emawo wainilana enee leutane bola Abraam, Aisak ita Iakob Godiu sauamonawo tealepi.”

25 Ita Iosep Iakob bedewea diamona badowa sauantopu ita me wanase, “God e oniadewasalepio bola emawo ne neaina winedia ideita otene aitana.”[~4~] 26 Ita Iosep enawa 110 wadeno bolen. Tane mo Isibt bedewe bunama me etepa eusampa baiwa simbiasane etepe itune ita kopin bedewe aine eiena.

<- Bumpaida 49