1 Ela otopa Osia ena natadea bedewe warerelen, me ipa Israelwa warereu, ita ena 3 wadedio Akas otopa Esekia warere ualene Iuda bolawa onien. 2 Tane Esekia enawa 25 wadeno bola debama Ierusalem bedewe warerelen ita enawa 29 diasan. Me inawa ipa Sakaria anoopa ebowa Abia. 3 Iawe God emawe Esekia dewa eubu dodomana dewamodie me nosiwa Dawid rua. 4 Me god lagawaau bolawa kadimon ita seu kakaila epatuiamon tane Asera kokoitauwa iawa toiamon. Mapo Moses kokoitau mota aleupa irama mampe dewasane itun.[a] Israel apanawa mota sa ebowa Neustan[b] wane ituiena, mo mota aleupa mampe antoie piupiu suie. Mo epe dewantoio baiwa Esekia mota aleupa sa epatuiamon.

5 Esekia Israel apanawa Godiu Iawe bedewe sumanailen. Iuda bolawa warereu uduudu bedeuwo mai mida da me rua. Mai warere da me danawe ba adiwe me ruawa wainipona, dia. 6 Me walama uduudu Iawe God mampe sumanaiwa itudie ita dima Iawe God wadia me ruawaleidie ita do Iawe God Moses anaana wanena me ruawalen. 7 Ita Iawe God ipa me do ita nolawa uduudu dewamodia ipa euda os. Me tawo Asaria warerewa adiananasane ita me nolawa mai dewasapona, dia. 8 Esekia Palistan apanawa uduudu ita Gasa tawowa uduudu osowe bola debama ita kerakera tane do mo bolau debama gonaalene panane, nanaumone aimon.