Hibulu 2

Goti olu omude kami kala ya naba ona kula nemo ka

1 Etito ya ka mono kolonimo ya fa neta ne, loto keleutoto koli kopaitotenuwe, loto kawa moda auma wito kolife loto kolokele. 2 Moda kolafe? Gotikafo enisole wenido melaito ka logimato u ayalo wiyami ka ya koliti kolámoti fulo gegeka itado-itado ya lifima ka keinawa moda ayalo-ayalo efe loto itibito gimaima nenako, 3 yamu lamo olu omude kami mona lalo neta ona kula ya fa koitenumo, ya lifima ka keinawa ya egaidana oto koli wogeto lamodoka ámenami ne?

Olu omude kami kawa ya Wekolakafo komu apito lo oloto gimaito, kolamo wenena yate amo welaloti lolomamo ne. 4 Ido aya kawa yamu Goti yaki lakoina moda onale, loto aumala lilibami neta-mata ailo kofawa olu oloto piyami ya eleiginawae, loto ainala meleto, ido aimola lulakalauti ya Ouna Felegaga monala ailo-ailo iya mele lumumo wimo mona yakafo aya kawa ya olu auma wi edami ne.

Yesu lawoko ya olu omude kami mona aboga ka

5 Etito mika ma aiga oloto pinami ka lonimo ya enisole yate kiyaba enawae, loto ádaiye. 6 Eti ádaifa, ido we makafo ka auma wito eti limo,

Lamo fa wenena minoninako, nedito ya kaka ki lumu minane?

Ido fa wenena kede melonima nenako, nedito ya kiyaba o lede minane?

7 Kamena lina efema ya enisole diti minato, ido wenena ya lumuti minenagilae, loto fulo ledane.

Ido kokamu atetelo meleto kulite olu faka lo ledanimo, 8 ya neta-mata muki fulo kiyade feumau gedeto, kiyabani wenena bulu ledane,

loto ka mono lufuwau (Sng 8:4-6) ya nemo ne.

Ido neta-mata muki kiyabani wenena minenawae, loto lo mele ledaima nenako, neta lawoko ma kiyaba ámenumo ya ma minámaiye. Ma minámaifa, ido oiya ama ya neta-mata muki moda kiyabani wenena minone, loto ágone. 9 Etito ágoba, ido Yesu ya eyone. Goti nasafilila yamo wenena muki yamu kolito fulunaiye, loto kamena lina efema ya enisole diti minato, ido amo ya lumuto minenagoliye, loto fulo edaiye. Etito fulo edami, ya ogofu kolito folainako, yamu kokamu atelalo meleto, kuliya olu faka lo edami ne.

10 Moda kolafe? Goti yako neta-mata muki ya mona aboga ne. Ido amo yakafoko muki neta olu oloto piyami we ne. Aya we yakafo nomilipala mumudi lamedoka gilimito enae, loto olu omude kami mona aboga ya ufe-fe lenaiye, loto keinawa kolami mona olu umami ya moda efe liye. 11 Yamu kolalo. Wewa olu felegaga bulu ledami weki ido lamo felegaga o ledami wenenala yaki moda wenena lawoko minonimo, yamu amo ya ukanalo kolámoto moda kunanefomotale, loto lo ledami ne.

12 Eti loto lo ledami yamu ya eti limo,

Namo kunanefo-mota ya kulika lo oloto gimito, wenenaka monolo mau minagu yau keboka loto mono nema lenagolowe,

loto ka mono lufuwau (Sng 22:22) ya nemo ne. 13 Ido ka ma ya eti limo,

Koli kikine ya amodoka melenagolowe,

loto (Ais 8:17), ido ka ma ya eti limo,

Namoki nomilipane Gotikafo nomami yaki moda ama ya minone,

loto ka mono lufuwau (Ais 8:18) ya nemo ne.

Yesukafo ade olu faka lo ledenae, loto mikaleka ukana olami ka

14 Etito ya nomilipawa mikaleka ukani ya emilaki ido wanuki nemo yamu amo yaki ayaidana oto mikaleka ukana olami, ya fuluto kamade ki-ki imo we, fulu-fulu onimo mona aboga Satani olu fulo edeto, 15 ya wenenawa mikalo minamo kamenanina muki ya fulunawamo monawa koliya koliti nelalau minamo ya efili gedenae, loto mikaleka ukana oluto lamomu folaiye.

16 Eti imo, ya enisole ani olu faka ádaiye. E’e, Abalahamu ufa fiyami wenena ani olu faka lo gedaiye, loto kolone. 17 Eti o gedami, ya wenena lifimanina kilili oto, Gotiki itibito kutifi gedenae, loto Goti lonola, yokila ki umu-umu amo we kiyabani we wenaba lonola ya olaiye. Eti imo, ya wenena yamu siya-mulunau kolito, lonowa ya efe lotoko olunae, loto ya kunalafomota ukani monani muki yaidana oto mikaleka ukana wito monate yaki kolito ya moda efe loto iye. 18 Moda kolafe? Amo ya kepa mele umaito, keinawa kolitaima nenako, yamu wenena kepa mele gimaito, keinawa koli minamo ya ani olu faka lenami aumala moda mino edami ne.

<- Hibulu 1 Hibulu 3 ->