Rom 10

Isrel arihobi God amane dime dire mongwo meri molkungwo ha

1 Ena girhobo, Isrel ari hobi piriga milna gul sungure God sigare kul tenama dire, na girungwo tangwo God ha di te moliwa. 2 Molgere yalhobi God grang wine onamna dire oli omba, ongwo hobo kuma di haniwa. 3 Kungwiwe, God pirari pare amane dime dire mongwo hol i doling bolia dipimba, ta bolkima. Nin amane dime dire molala di pungwo meri pire wine ole moli omua. 4 Ena Kraist grang wine ole yol e pir tongwo hobi God krehaman ha wine oli omingere God kina gumana pule ire u tani namna di pirikimua. Nan digan mominba, Kraist tani gol na tomia dire pir tere, God kina gumana pule ire u tani namna di pimua.

God ari para weni u wai nama di pungwo ha

5 Ena hongebe weni yal Moses God honagi yal momua. Molere ha ta yu di emiraya,

“Ari yal tau God krehaman ha para muru wine onaminga

hanere, amane dime dire mona di na tomua dimirawa.

Dimiraba, yal ta God krehaman ha para weni wine

onangwo ari ta molkimia, ha hobi oun de pamua.” Lev 18:5

6 Pamba, ha maing yu pamia, Yal ta Kraist ol wai ol na tongwo pamia dire yol e pir tere wine onangwo yal i God hanere, haya amane dime dire moma di hangure, sigare kule u wai omua. Omba yal ta Kraist aki di na tenama dire mole, “ara mo hamen bani name?” Diu 30:12 dinamia. Te yal ta Kraist mongwo wa dulala dire mole, “ara ari yulagi engwo bani name?” dinamia. Diu30:13

7 Dinangwo yal i nomani ta paikinangure du ha dinamua. 8 Ena ha maing yu dikimia, ha maing iwe, “nan mominga gauna bani dimia ebir si pire pire moli naminua.” Diu 30:14

Pire Yisas yol e pir tere grang wine onanga pire ha maing yu di ni teiwa. 9 Ena Yisas gongwo i God nin uling yungure hon airimia. Aire kene ol na tere hamen singaba momua dire, nomani si pir tere wanaminga, God aki di na tenangure sigare kule u wai naminua. 10 Yu naminga, Yisas haang dal yuwo ere singaba Kraist momua dire nomani si pir tenaminga, tal nigi dongwo ol waminga pring pai na tongwo i, God para wai simua dire, haya kri di ole na tenamia, nan God kina gumana pule ire u tani naminia. Te nan pir tominga maing di tibi olaminga, God aki di na tenangure sigare kule u wai naminua. 11 Ha maing buku ha ta yu di emia, “Yal ta yal i ol wai ol na tongwo pamia dire yol e pir tere pi tege ere moli nangiwe, pire gai ta gol tekinanua.” Ais 28:16

12 Ena Yuda ari God ta mongure, te wiyol hobi God ta mongure su momo? Ta molkimia, God tani weniga momua. Molere Yuda ari wiyol hobi kina ni hanega kunung kunung mona di hamua. Hanere Yuda ari mo, te wiyol hobi para gala dungwo meri pirari pare awai honagi aki di tere ol tomua. 13 Tongwo ha iwe, buku yu di emia, “Yal ta God aki di na tenama dire sirin bol tere gala dinangure, God aki di tenangure sigare kule u wai nangwo pamua.” Joel 2:32

14 Pamia, ena yal ta Yisas pir tekinangwo tal ongwo gala dire sirin bol tename? Te Yisas moma di pirikinangwo, talongwo pir tename? Te yal ta Yisas momua di tibi ol tekinangwo, yal i ara ditenangwo piname? 15 Te God honagi yal bai nu si olekinangwo, ara Yisas momua di tibi ol tenangwo piname? Ha maing buku ha ta yu dimia, “Yal ta grang hongwo bani ha ura pangwo ire u nan mominga bani di tibi ol na tenangwo pire, ha mining dinga wai piminua” Ais 52:7

dinaminua.

Isrel arihobi ha maing buku ha wai iwe, pir tekungwo ha

16 Dinaminba, ha ura pangwo i pir tekimia. Pir tekungwiwe, God hana togu yal Aisaia ha yu di emiraya, “Hamen Singaba monia, ha di tibi ol tominga ha i ara pir na tome?” Ais 53:1

17 Homa ha i pir po sire, emgi yol e pir tominua. Te homa Kraist ol wai ol na tongwo ha maing di na tekima, nan ari pir po sikimingere. 18 Sikinaminga pamba, ha i haya pir po siminue.

“God honagi ari ganba uling holo holo i pire nega dire

ari hobi di tibi ol tongure pai omua.” Sam 19:4

19 Ena na ha ta hon sirin bol ni tenaminia. Isrel ari hobi God haang pir po sikimo? Para pir po simia. Homa God honagi yal Moses ha yu dimia, “God yu dimia,

Na God molia. Wiyol tau aki di teralua. Teralgere

ni Isrel ari hobi hanere, nigi de pinanua. Te wiyol

tau ha maing pir po sikimba, aki di teralgere pir po

sinamua. Sinangwo hanere, yon ki e tenanua.” Diu 32:21

20 Yu dungure Aisaia ari moma pama di pirkire yu dimia,

“Wiyol ta na wa dukungwo hobi omaga na i tibi ole

hamua. Te ari tau na hana pirikungwo hobi omaga

na hana pimua.” Ais 65:1

21 Yu dimba, Isrel ari mongwo maing hanere yu dimia,

“Gobari weni na Isrel ari hobi nomani si kulu sinama

dire ana diri bole di te moliba, yalhobi kraung gi

yal taning pir gogo dale momua.” Ais 65:2

<- Rom 9 Rom 11 ->