MATEO 28

Jesu jaba chkeni gwade

1 Undege chuia jo tangle gire nagbietege chui domingoge ngabebitabi muinga gdaboke joni Jesu jaba ogle ngwadi, muinga e gdaite María-Magdalena kaire María na gdaite jo tienda keugadi Jesu ogle ngwadi. 2 Muinga e bebi joge chke ne ngwadi gire lle boanga Chube alin nga ngaña giti chku nga dba ai giti Jesu jaba ogle ngwadi, lle boanga Chube alin kechuga kweri gbaba keuga kage biunga siere, gire e kote nga jwliendu kweri, lle boanga toidu dba kechuga biabanga siere giti. 3 Lle boanga Chube alin e gwadenga no nga ko chrachienga kare, ama ñometralla jutre salengwli dagli kare. 4 Guardia donga ulita kledu Jesu jaba ogle ngwadi manadedi, ama ulita gwagedu lle boanga Chube alin edi gire guardia donga ulita gda jiredunga chru ole ama kira jonga nga jonga ama giti, ama chegu sugeti kwian jogebakeda kare. 5 María-Magdalena kaire María na jo chke ne ngwadi gire lle boanga Chube alin nga ngaña giti gerudu muinga e ole:

—Ba me kennga, uñale chage ba kle chage Jesu jinade nate. 6 Ama me kle aini dale. Ulia ama gbere kruge, ama jokeda agwa ama chkuni gwadeni ama gerudu kare. ¡Bai aini, gwagede ama jaba ogle ngwadi, ama me kle aini dale, nege ama kle gwadeni! 7 Joga blikare kwian geru jwannga Jesuge gdataboko giti gdaite kle ngwadi, ba geru ketadale ama ulitage Jesu giti, ba geru ai kete ama ulitage: “Jesu chkuni gwade, ama be joge nga Galileage ba ngeru, ba ulita jogedale ne ngwadige ten ama ngwange.” Ba geru kete ene ama ulitage cha kle gerule kare ba ole. ¡Joga, joga!

8 Lle boanga Chube alin gerudu ene ulita gire blikare muinga boke jo siere keuga Jesu ogle ngwadige kennga tanre kaire agwe nga suga no ole, ama jo jrite blikare geru kete kwian geru jwannga ulitage lle boanga Chube alin geru ketu amage kare. 9 Muinga boke kledu jrite geru kete kwian geru jwanngage gire Jesu chku mo kaite muinga ege jonke, Jesu gbi kadu muingage:

—¿Che kle mine?

Muinga boke jo Jesu gitigu ama jongnagwa skutu dba ko bliu Jesu seradi Jesu gai dage ama Jesu olladu. 10 Jesu gerudu muinga e ole:

—Ba me ta kennga gerule cha giti. Joga geru kete kwian geru jwannga chage ulitage ama jogedale nga Galileage ten cha ngwange, ne ngwadi ama be gwage chadige —Jesu gerudu ene ulita María-Magdalena ole kaire María na ole.

Guardia donga geru jinade ngwale Jesu jaba giti

11 María-Magdalena ule María na ole jo jrite geru Jesu giti kete kwian geru jwannga Jesuge ulitage gire kaire agwe guardia donga keuga Jesu jaba ogle ngwadi mananga gweale jo unaske, guardia e ulita geru ketu kwian gerunga Chube ole daba alin chugagwalla ulitage boidu mine ulita ama gwa giti Jesu jaba ogle ngwadige. 12 Kwian gerunga Chube ole daba alin chugagwalla e mo litu kwian israelita chugagwalla juma ulita ole, ama ulita mo teun boidu Jesu ole giti. Gire ama ulita mo ta gbu ule igi kete tanre guardia donga keuga Jesu jaba ogle ngwadi mananga ulitage. 13 Kwian gerunga Chube ole daba alin chugagwalla kaire kwian israelita chugagwalla juma ulita gerudu guardia donga e ulita ole ama ulita gerudale mine kwian ole Jesu jaba giti, ama ulita gerudu guardia ole:

—Ba gerule kwian geru jwannga Jesuge ulita kigedu Jesu jaba ole ngajrege ba kledu gbe gire. Ba geru tragadale ene kwian ulita ole Jesu jaba giti. 14 Chugagwalla Pilatoge be chke uñale ba ulita chegu gbe gire kigedre Jesu jaba ole, cha ulita be Pilato sko ñe, cha be gerule no trate ama ole ba ulita giti, ene ama mi ba gbe boi daga ngwale Jesu jaba gdale —kwian israelita chugagwalla gerudu ene ulita guardia keuga Jesu jaba ogle ngwadi mananga ole.

15 Guardia e igi gau gerule ngwale Jesu jaba giti ñanale gire ama agedu ulita kwian israelita chugagwalla gerudu kare.

E boidu ene e suiage tangle chui jo aige tangle kwian israelita kle gerule kaire kwian geru jwannga Jesuge ulita kigedu Jesu jaba ole ngajrege.

Jesu gerule kwian geru jwannga amage ole ama ulita jogedale Jesu gerua trage kwian na ulita ole

16 María-Magdalena ule María na ole jo chke kwian geru jwannga Jesuge gdataboko giti gdaite ngwadi, muinga e Jesu gerua ulita ketu ama ulitage gire geru jwannga ulita jo nga Galileage jwichuga Jesu nu geruba ama ole giti kare. 17 Kwian geru jwannga Jesuge jo chke jwichuga ege, ne ngwadi ama ulita gwagedu Jesudige gire ama gwealege sugedu e ulia Jesu, geru jwannga e Jesu olladu nga suga no ole, agwa gweale na tañachugu e me dale Jesu ulia. 18 Jesu jo kwian geru jwannga amage ulita gitigu gire Jesu gerudu:

—Chube cha gbu nga ngaña giti mauñale nga dba ai giti mauñale, cha ñage age ulita Chube kiralla giti cha takalin kare. 19 Malen cha gerule ba ulita ole, joga cha gerua trage kwian nga ulitamu ole, ba gerudale ama ole cha giti ene ama ñage cha gerua gai ulia ba kare, kwian ulita bai kaire cha gerua keruchuge ba giti gire mo ta gbe cha gai ulia, ba kwian ene ulita ñeadale chiske gai ngaña chigage cha Ñenua kalla giti cha Chube Kirolla kalla giti kaire Chube Oña kalla giti. 20 Kaire ba kwian e ulita tkale tangle cha gerua gai dage ulia age diali ulita cha gerudu ba ole kare. Ba ulita joge cha gerua dbe ene, gire cha be kle ba ole ule diali ba chudaboi chui tangle chui ulitage —Jesu gerudu ene ulita kwian geru jwannga amage ulita ole.