Diutironomi 3

Va Kilasia Izireli se Oqo sa Baṉara

(Ninaedi rina Tinoni 21:31-35)

1 Beto asa si ele rizu la si gita pa siraṉa la pa popoa Basani, meke vura mae gua vasina se Oqo sa baṉara, meke gua tugo sari doduru nana tie varipera pude mae raza gita pa vasileana Ederei. 2 Ba zama se Zihova koa rau, ‘Lopu matagutu nia gamu si asa, sina ele luara vatua Rau koa gamu sa baṉara, meke sari nana tie, meke sa nana popoa. Mi taveti koasa gua sapu tavetia gamu koe Sihoni sa baṉara tadi na tie Amoraiti sapu koa pa vasileana Hesiboni,’ gua. 3 Gua asa ke, ele veko poni gita e Zihova se Oqo sa baṉara meke sari nana tie varipera pa ṉiniraṉira tadigita. Ele va mate betoi gita sari doduru. 4 Pa totoso tugo asa si vagi betoi gita sari doduru vasileana pa binaṉara te Oqo. Lopu keke popoa tadirini si lopu ta vagi. Vagi betoi gita si ka onomo ṉavulu puta vasileana, sa doduruna sa pinaqaha popoa Aqobi vasina sapu koa baṉara se Oqo pa popoa Basani. 5 Sari doduru vasileana nomadi arini si ta tavete bara patu sari na gobadi, sari na bara si ululudi hola pa vari likohaedi; meke koadia sari na sasada nomadi saripu koai na rorotoana roza pude tuku beto, meke koadia tugo soku vasileana si loketoṉa gobadi. 6 Huara betoi gita sari doduru arini, meke va matei gita sari na tie, na barikaleqe, meke na koburu, gua putaputa tugo sapu tavete guni gita koari na vasileana tanisa baṉara Sihoni pa Hesiboni. 7 Vagi betoi gita sari doduru sipi na bulumakao, rovana kurukuru, meke vagi betoi tugo gita sari doduru tiṉitoṉa tadirini.

8 Pa totoso tugo asa si vagia gita sa popoa koari karua baṉara Amoraiti pa kali gasa rimata pa Ovuku Zodani, podalae pa Ovuku Anoni meke la kamo pa toqere Hemoni,” gua se Mosese. 9 (Sa toqere Hemoni si ta pozae Sirione koari na tie pa Saedoni, meke Seni si na pozapoza koari na tie Amoraiti.) 10 Meke zama se Mosese, “Vagi betoi gita sari doduru popoa tanisa baṉara Oqo pa Basani: sapu sari na popoa koasa pezara panaulu, sari na popoa Qileadi meke Basani, meke kamo la koari na vasileana Saleka meke Ederei.” 11 (Sa baṉara Oqo si na tie mumudi hokara sapu na kineha malivi pa butubutu Repaimi. Sa kesi tanisa si ta tavetae patu[a] Made mita gelena meke karua mita labena si asa.[b] Korapa koa hola sa kesi meke boka ta dogoro koari na tie Amoni pa vasileana Raba.)

Sari na Butubutu pu Koa pa Kali Gasa Rimata pa Ovuku Zodani

(Ninaedi rina Tinoni 32:1-42)

12 Zama pule se Mosese, “Totoso vagi va karovi gita sari na pepeso tadirini, si va hia lani rau koari ka ṉeta butubutu tadigita. Sa kukuru pepeso nomana si ta vala koasa butubutu Rubeni meke Qadi podalae koasa volosona sa vasileana Aroere tata pa ovuku Anoni, meke kamo la pa kukuruna sa popoa toqetoqere pa Qileadi, meke sari doduru vasileana pa korapana sa popoa asa. 13 Sa kukuruna sa butubutu te Manase pa kali gasa rimata Zodani si tava hia la sa popoa pa Qileadi pule, meke sa popoa Basani sapu ta pozae popoa Aqobi, vasina sapu ele koa baṉara se Oqo,” gua.

(Basani si ta gilana sapu na pepeso tadi na butubutu malivi pu ta pozae Repaimi. 14 Zaira sapu keke tie pa butubutu te Manase si vagia sa popoa Aqobi sapu ta pozae Basani kamo la koasa volosona sa popoa tadi na tie pa popoa Qesura, meke Ma'aka. Poza luli nia pozana soti Zaira sa popoa Basani, meke kamo pa rane ṉinoroi si ta pozae vasileana te Zaira si arini.) 15 “Sa kukuruna sa pepeso pa popoa Qileadi si va hia la nia rau koe Makiri pa butubutu te Manase. 16 Koari na butubutu Rubeni meke Qadi, si tava hia la sa popoa podalae pa korapa popoa Qileadi meke kamo koasa voloso pa Ovuku Anoni. Sa Ovuku Zaboki si na voloso pa kali gasa rimata koari na tie Amoni. 17 Pa kali lodu rimata, sa voloso si na Ovuku Zodani, podalae pa kopi Qaleli meke gore la koasa Kolo Matena, meke kamo pa hubina sa Toqere Pisiqa. 18 Koasa totosona tugo asa si valani tugo rau sari na tinarae hire: E Zihova sa mia Tamasa si ele poni gamu sa pepeso pa kali gasa rimata pa Ovuku Zodani pude koa ia gamu. Ba kamahire, mi va namanama pude garunu lani sari na mia tie varipera, pude karovo la pa Ovuku Zodani pa kenudi rina tasimia pa butubutu Izireli, pude tokani pude vagi sari na pepeso.[~3~] 19 Ba sari na mia barikaleqe, na koburu, meke sari na sipi na bulumakao saripu ele gilani rau sapu soku hola si arini, si kaqu koa hola si arini koari na popoa arini sapu ele va hia atuni rau koa gamu. 20 Mamu tokani sari na tasimia, sari tie Izireli, osolae vagi tu rini sari na pepeso sapu poni ni e Zihova koarini pa kali lodu rimata pa Ovuku Zodani. Mamu tokani osolae poni ni e Zihova sa binule koari na dia kana koasa vasina asa, gua sapu ele evaṉia Sa koa gamu. Beto asa si kote tiqe pule la pa mia popoa soti sapu ele va hia vatuni rau koa gamu. 21 Beto asa si tozi nia rau se Zosua: ‘Ele dogoro betoi goi gua sapu tavetia e Zihova, sa mua Tamasa koari karua baṉara, Sihoni meke Oqo, meke kote ta evaṉa gua tugo asa koari doduru tie saripu koa pa kali karovona sa Ovuku Zodani vasina korapa la ia gamu. 22 Mamu lopu matagutu ni si arini; e Zihova, sa mua Tamasa si kote varipera poni igo.’

Lopu Tava Malumu se Mosese pude Kamoa sa Popoa Kenani

23 Pa totosona asa si tepa sisigiti si rau koe Zihova,[~4~] 24 ‘Ke Baṉara, Tamasa, gilania rau sapu tiqe podalae va dogoro nau Goi sa doduruna sa Mua linavata na ṉiniraṉira. Loke tamasa pule pa maṉauru babe pa pepeso sapu boka evaṉi sari na tinavete variva magasadi saripu evaṉi Goi! 25 Baṉara, va malumau, maqu karovia sa Ovuku Zodani, maqu dogoria sa popoa masuruna pa kali karovona sa Ovuku Zodani, meke sa popoa toqetoqere na tolavaena, meke sari na toqere pa Lebanoni.’ 26 Ba koa gua koa gamu, si bugoro nau e Zihova si rau, meke korona va avosau. Ke zama si Asa, ‘Ele pada mo! Lopu zama pule nia sa tinepa hie! 27 La pa batuna sa toqere Pisiqa, mamu doṉo la pa kali gasa rimata, pa kali mataomu na gedemu, meke pa kali lodu rimata. Mamu doṉo valeana la. Mamu dogoria goi, sina lopu kaqu boka karovia goi sa Zodani. 28 Mamu garunia se Zosua; mamu sovutu va ṉiṉira ia, sina asa kote turaṉi sari na tinoni hire pude karovo la meke vagia sa popoa sapu dogoria goi.’ 29 Ke koa mo si gita pa lolomo pa pezara tata pa Betipeoro.

<- Diutironomi 2 Diutironomi 4 ->