1 Koronikolo 12

Sari na Tie Varipera pu Lulidi koe Devita pa Tututi te Benisimane

1 Koa pa popoa Zikilaqi se Devita, vasina sapu govete la si asa totoso kanaia e Saula si asa. La somana koasa vasina soku rina tie varipera bokabokadi pu toka nia si asa pa vinaripera. 2 Sari na tie hire sina tie pa butubutu te Benisimane, na turaṉana Saula. Tie bokabokadi hola pa gona tupi, meke kurukuru paqala pa lima gede babe mataodi. 3-7 Sa dia palabatu si e Ahieza meke Zoasi tuna koreo e Semaha pa Qibea.

Hire sari na tie varipera:

E Zezieli meke Peleti tuna koreo e Azamaveti,

e Beraka meke Zehu pa Anatoti,

e Isimaea pa Qibione, keke tie varipera ta gilanana meke na koimata koasa “Toloṉavulu puta.”

E Zeremaea, Zahazieli, Zohanana, meke Zozabada pa Qedera,

e Eluzai, Zerimoti, Bealia, Semaria, meke e Sepatia pa Haripi,

e Elikana, Isia, Azareli, Zoeza meke e Zasobeami pa puku butubutu te Kora,

e Zoela, meke e Zebadaea, karua koreo te Zerohamu pa Qedoro.

Sari na Tie Varipera pu Luli koe Devita pa Butubutu Qadi

8 Hire sari pozadi sari na tie varipera bokabokadi pa butubutu te Qadi saripu la somana koasa puku tie te Devita koasa nana vasina ṉiṉirana pa qega. Tumatumae hola pa lave na hopere, kinehadi si guana na laione isumatadi, meke reregedi hola guana kurukuru. 9-13 Sari na pozadi si guahe vinarilulidi: E Ezera, Obadaea, Eliabi. Misimana, Zeremaea, Atai, Elieli, Zohanana, Elozabada, Zeremaea, meke e Makabanai.

14 Kaiqa ari kasa tie arini pa butubutu Qadi si na keke tina tie si kopuni arini, meke kaiqa koarini si keke gogoto tie. 15 Pa sidara kekenu pa keke vuaheni, totoso siṉi vura sa naqe koasa Ovuku Zodani si karovo si arini, meke hadu va rizu pani rini sari na tie saripu koa pa lolomo pa kali gasa rimata meke kali lodu rimata koasa ovuku.

Sari na Tie Benisimane meke Ziuda

16 Kaiqa tie pa Benisimane meke Ziuda si mae tugo koe Devita koasa nana vasina ṉiṉirana pa qega. 17 La tutuvi e Devita si arini meke zamai sa, “Be mae si gamu pa binule na binaere meke hiva toka nau gamu si leana hola. Va kamo gamu rau; mae somana koa rau. Ba be guana hiva mae sekesekei nau gamu meke la tozi au koari na qua kana, totoso loke qua tinavete sea atu koa gamu, si sa Tamasa tadi na tamada si kote gilania Nana meke kote va kilasa gamu Sa.”

18 Keke koari kasa si ta kamoe nia sa Maqomaqona sa Tamasa, e Amasai, sa koimata koari ka Toloṉavulu puta meke zama vura si asa,

“Devita tuna Zese, gami si hiva somana koa goi meke toka nigo.

Mu koa pa binule! Mu koa mataqara!

Madi koa pa binule, madi koa mataqara si arini pa kalimu goi!

Ura sa Tamasa tamugoi si toka nigo.”

Va kamoi Devita si arini meke evaṉae ni nana palabatu koari nana puku tie varipera.

Ari na Tie pa Manase

19 Kaiqa tie varipera pa butubutu te Manase, si karovo la pa kalina te Devita sipu korapa topue ene vura turaṉi sa sari na tinoni Pilisitia pude la raza ia sa baṉara Saula. Ba lopu tokani sa sari na tinoni Pilisitia, sina matagutu sari na baṉara, sapu meke gua meke sekesekei ni sa si arini meke karovo la pa kalina te Saula, ke garunu pule la nia rini si asa pa Zikilaqi. 20 Hire sari na tie varipera mae guadi pa Manase saripu karovo la pa kalina koe Devita totoso pule si asa: E Adana, Zozabada, Zediale, Maekolo, Zozabada, Elihu, meke e Ziletai. Hopeke arini sina koimatadi pa keke tina tie varipera koasa dia butubutu Manase. 21 Toka nia rini se Devita koari na hopeke puku tie varipera pu mae hikohiko likakalae[a], sina na tie varipera bokabokadi si arini. Hola soku rane si ta evaṉae na palabatu pa vinaripera si arini koari na tie Izireli. 22 Tata doduru rane mo si mae sari na tie pude somana koe Devita osolae nomana hola sa nana qeto minate varipera, guana qeto minate varipera te Tamasa.

Sari na Pozadi rina Tie Varipera te Devita

23-37 Totoso korapa koa se Devita pa popoa Heboroni, si soku hola sari na tie varipera sapu mae somana koasa nana puku tie varipera, pude toka nia pude vagi hobea sa binaṉara koe Saula, gua sapu ele va tatara veko nia e Zihova.

Ziuda: ka onomo tina vesu gogoto tie varipera nabudi, tuqe lave na hopere,

Simione: zuapa tina keke gogoto tie namadi pude varipera.

Livae: made tina onomo gogoto tie varipera;

Somana koarini si e Zehoiada, na tie tuturaṉa pa puku butubutu te Eroni, ṉeta tina zuapa gogoto tie;

Somana tugo se Zedoki, na tie varane vaqurana, pu ari hiokona rua tie turaṉana saripu na koimata pa vinaripera;

Benisimane, sa butubutu soti te Saula: ṉeta tina tie. Soku ari na tie te Benisimane si korapa pamaṉa meke koa hola koe Saula.

Iparemi: Hiokona puta tina vesu gogoto tie varane pa vinaripera ta avosaedi pa dia puku tuti.

Kukuruna sa butubutu te Manase: Manege vesu tina tinoni ta vinizatadi pude la va baṉaria se Devita.

Isaka: Karua gogoto koimata, turaṉae sari dia puku tie varipera. Sari na koimata arini si tumae ni rini gua sapu goto pa butubutu Izireli meke sa totoso garona.

Zeboloni: Lima ṉavulu puta tina tie ta ronudi meke ta raṉedi pude varipera. Tava tumatumaedi pude tavetavete ni sari doduru likakalae tana varipera.

Napitalai: Keke tina koimata turaṉae sari ka toloṉavulu zuapa tina tie varipera pu tuqe lave meke na hopere;

Dani: Hiokona vesu tina onomo gogoto tie tava namadi pude somana pa vinaripera.

Asa: Made ṉavulu puta tina tie namadi pude la varipera;

Sari na butubutu pa kali gasa rimata pa Zodani, ari pa Rubeni, Qadi, meke kukuruna Manase: Keke gogoto hiokona puta tina tie tava tumatumaedi pude tavetavete ni sari doduru likakalae tana varipera.

38 Sari doduru tie varipera hire, sapu tava namadi pude varipera, si taluarae la pa Heboroni pude va turua se Devita pude na baṉara pa doduruna sa popoa Izireli. Sari doduru tinoni pa Izireli si koa keke hiniva beto pude va baṉaria. 39 Koa turaṉia rini se Devita, ka ṉeta rane, hena na napo koari na ginani na kolo pu va namanama ni rina turaṉadia pa Izireli. 40 Seu kamo la gua tu pa butubutu Isaka, Zeboloni, meke Napitalai, ba suraṉa mae ginani: palava, kata qurepi d na piqi tava popadi, vaeni, oela olive, koari na doṉ'ki, kameli, na miulu meke na bulumakao, meke turaṉa maeni rina tinoni. Turaṉi tugo rini sari kaiqa bulumakao na sipi pude va matei pude henahena. Sari doduru ginugua arini si pude na dia qinetuqetu sapu vura mae koasa popoa lavata.

<- 1 Koronikolo 11 1 Koronikolo 13 ->