Link to home pageLanguagesLink to all Bible versions on this site
12
Detlot soljamob hubin bulurrum Deibid brom det Benjamin klen

1 Wal basdam wen Deibid bin jidan langa Siklag weya imbin go blanga ranawei brom King Sol det san blanga Kish, loda gudwan soljamob bin midap garram im, 2 en deibin ol kaman brom det klen blanga Benjamin, det seimwan klen weya Sol bin kaman. Deibin gudwan blanga bo en erro en tjakam spiya o ston, en deibin dum garram lefthen en raiden bingga. 3-7 Ahisa en Jowesh dubala bin boswan blanga olabat. Dubala bin san blanga Shemaya brom det kantri gulum Gibiya.

Dislot na ola neim blanga detlot solja.
Jesiyel en Pelet, hubin dubala san blanga Esmabeth,
Beraka en Jeihu bin brom det taun gulum Einathoth,
Ishmaiya brom det taun gulum Gibiyan, en imbin brabli gudwan solja en imbin boswan blanga Detlot 30 Solja,
Jeramaiya, Jahasiyel, Johanan en Josabed hubin brom det taun gulum Gedara,
en Elusai, Jerimath, Biyalaiya, Shemaraiya en Shefataiya, hubin brom det taun gulum Herif,
en Elkana, Ishaiya, Esarel, Jowesa en Jeishabim, hubin brom det femili blanga Kora,
en Jowala en Sebadaiya, hubin dubala san blanga Jeroham brom det taun gulum Gedowa.
Detlot soljamob hubin bulurrum Deibid brom det Ged klen

8 Dislot neim blanga ol detlot gudwan soljamob brom det Ged klen. Deibin joinap garram Deibid amimob wen deibin jidan langa det strongwan haus langa det deset kantri. Deibin yusumbat spiya en shild, en deibin luk wulijim jigiwan laiyan, en deibin brabli kwikbala wulijim det enimul gulum diya. 9-13 Dislot soljamob bin ola boswan. Nambawan bos bin Isa, namba 2 bos bin Obadaiya, namba 3 bos bin Eliyab, namba 4 bos bin Mishmana, namba 5 bos bin Jeramaiya, namba 6 bos bin Etai, namba 7 bos bin Eliyel, namba 8 bos bin Johanan, namba 9 bos bin Elsabed, namba 10 bos bin Jeramaiya, en det laswan bos bin Mekbanai.

14 Wal sambala brom det Ged klen bin boswan blanga 1,000 men, en najalot bin boswan blanga 100 men. 15 Langa det feswan manth blanga wanbala yiya, langa det taim wen det Jodan Riba bin fladwoda, deibin krosoba det riba en bin andimwei ol detlot pipul hubin jidan langa det beli kantri langa sanraiswei en sangodanwei langa det riba.

Detlot soljamob hubin bulurrum Deibid brom det Benjamin klen en det Juda klen

16 Wal sambala men brom det Benjamin klen en det Juda klen bin go langa det strongwan haus langa det deset kantri weya Deibid bin jidan. 17 Deibid bin go blanga midap langa olabat en imbin tok, “If yumob kaman blanga meigim fren garram mi en album mi, wal yumob gin kaman. En yumob gin joinap garram melabat. Bat if yumob kaman blanga dalim main enamimob, nomeda ai nomo bin ardimbat yumob, wal det God blanga melabat grengrenfatha olabat garra sabi en im na garra panishim yumob.” Lagijat na Deibid bin tok.

18 Wal det spirit blanga God bin jidan langa det wanbala solja gulum Amasai. Imbin jingat, “Deibid san blanga Jesi, melabat blanga yu wekinmen olabat, en melabat wandim yu blanga jidan brabli gudwan, en ol detlot hu albumbat yu du, dumaji God im jidan garram yu.” Lagijat na Amasai bin tok.

Afta na imbin jidan boswan blanga Detlot 30 Solja. En Deibid bin welkam detlot men en imbin meigim olabat boswan blanga ol im amimob.
Detlot soljamob hubin bulurrum Deibid brom det Manesa klen

19 Wal sambala solja brom det Manesa klen bin bulurrum Deibid wen imbin go garram detlot Filastainmob blanga fait langa King Sol. Bat im nomo bin album detlot Filastainmob, dumaji detlot lidamob bin reken maitbi im garra gobek en fait garram Sol, wulijim deibin jandimbek im langa Siklag. 20 Dislot na ola neim blanga detlot solja brom Manesa hubin go en bulurrum langa Deibid wen imbin gobek langa Siklag. Deibin, Edna, Josabed, Jedaiyel, Maikul, Josabed, Ilaihu en Silethai. Basdam deibin ol jidan boswan blanga ebri 1,000 men. 21 Deibin wekinmen blanga Deibid en bin jidan bos blanga im soljamob, dumaji deibin ol gudwan solja. En brom deya longtaim afta, deibin jidan boswan blanga det ami blanga Deibid. 22 Ebridei mowa en mowa men bin joinap garram Deibid. Wal lagijat na det ami bin gro brabli bigwan.

Ola neim blanga Deibid amimob

23-37 Wal wen Deibid bin jidan langa Hebran, loda solja hubin sabi hau blanga fait en hubin jidan brabli gudwan solja bin joinap garram im amimob. Deibin wandim album Deibid jidan king blanga olabat, en nomo Sol, jis laik YAWEI bin pramisim. Dijan ola namba blanga olabat.

Juda bin abum 6,800 solja garram loda ebrijing, en garram shild en spiya.
Simiyan bin abum 7,100 men hubin lenimbat miselp gudwei blanga faitfait.
Libai bin abum 4,600 men.
Detlot hubin bulurrum Jehoiyada, det femili lain blanga Eran bin abum 3,700 men.
Ol detlot rileishan blanga Seidok hubin gudwan yangboi solja bin abum 22 boswan men.
Benjamin, det ronwan klen blanga Sol bin abum 3,000 men. Bifo loda pipul blanga Benjamin bin jidan garram Sol.
Ifreiyim bin abum 20,800 men. Olabat bin brabli gudwan solja langa olabat ronwan femili.
Sangodanwei Manesa bin abum 18,000 men deibin pikimat blanga go en meigim Deibid jidan king.
Isaka bin abum 200 boswan lida, en detlot men hu jidan garram olabat. Ol dislot bin sabi wanim Isreil garra dum en wen det rait taim garra kaman.
Sebyulan bin abum 50,000 gudwan men redi blanga fait, en deibin sabi hau blanga yusum olkain faiting ting.
Neftali bin abum 1,000 boswan men, en 37,000 solja garram spiya en shild.
Den bin abum 28,600 men hubin sabi blanga fait.
Esha bin abum 40,000 men redi blanga fait.
Detlot klen sanraiswei brom det Jodan Riba gulum Rubin, Ged en Sanraiswei Manesa bin abum 120,000 men hubin sabi hau blanga yusum olkain ting blanga fait.

38 Wal ol dislot solja hubin redi blanga fait bin go langa Hebran. Deibin wandi meigim Deibid jidan king blanga ola Isreil pipul. Ola najalot Isreil pipul bin ol wandim tharran du. 39 Deibin jidan deya fo thribala dei garram King Deibid, en olabat kantrimen bin meigim redibala loda daga blanga olabat blanga dagat. 40 En detlot pipul brom Isaka, Sebyulan en det Neftali klen bin kaminap brom nowathwei, en deibin bringimap loda dongki, kemul, en buligi garram loda daga, flauwa, frut daga gulum fig en reisan, greip jus, en oliboil. Deibin bringimap ola buligi en ship blanga kilim en dagat. Dijan bin shoum ola gudbala filing olabat bin abum blanga Deibid oloba langa det kantri.

<- Fes Kranakuls 11Fes Kranakuls 13 ->