1 Jekh drom kana o Isus ačhilo pašo Galilejsko jezero[~1~], ćidije pe paše leste but manuša, te šunen o Lafi e Devleso. 2 Tegani dikhlja duj čamcura kaj ačhen ko than. E manuša save dolen mačhe iklile lendar thaj thode e mreže. 3 O Isus dija ano čamco savo sasa e Simoneso thaj pučlja le te crden le zala ano paj. Thaj bešlo thaj sikada e manušen taro čamco.
4 Kana ačhilo te vaćarol e manušenđe, vaćarda e Simonese: “Dža ko duboko paj thaj čhude e mreže thaj dol mačhen.” 5 O Simon vaćarda lese: “Gospode! Celo rat dijam zor thaj khanči ni doldam, al tu te phendan, ka čhudav e mreže.” 6 Kana ćerde gova, dolde bute mačhen thaj e mreže lije te pharadon. 7 Tegani vastesa dije vika pe amalen save sesa ane aver čamco te ikalen e mreže thaj avile te pomožin lenđe. Von avile thaj pherde solduj čamcura gija so lije te pherdon paj taro pharipe e mačhengo.
8 Kana gova dikhlja o Simon Petar, pelo ke koča angle Isusese pingre thaj vaćarda: “Dža mandar, Gospode! Me sem grešno manuš.” 9 Golese kaj dolda le dar thaj savoren save sesa lesa tare but mačhe so dolde. 10 Gija dolda i dar e Jakove thaj e Jovane, e čhaven e Zevedejevese, so sesa amala e Simonesa. Tegani o Isus vaćarda e Simonese: “Ma dara, od akana ka dole e manušen.”[~2~]
11 Kana ikalde e čamcura ki obala, ačhade sa thaj đele pale leste.
12 Kana sasa o Isus ane jekh foro, avilo paše leste jekh manuš so sasa but gubavo. Kana dikhlja e Isuse pelo angle leste mujesa dži ki phuv thaj molisada le vaćarindoj: “Gospode! Ako manđe šaj te sastare man!”
13 O Isus vazdija po va, dolda le thaj phenda: “Mangav. Av thodo!” Thaj i guba tar lesi koža sigate crdija pe. 14 O Isus naredisada lese: “Ma vaćar gova khanikase. Al dža thaj sikav tut e sveštenikose thaj inđar kurbano sar so vaćarda o Mojsije ane po zakono, golese kaj sastiljan te bi avola tu svedočanstvo angle manuša.”
15 O lafi taro Isus sa pobut šundilo thaj e manuša sa pobut ćidije pe te šunen le thaj te sastarol len tare lengo nasvalipe. 16 Al vov đelo ko than kaj naj khoni thaj molisajlo.
17 Jekh đive o Isus sikada ano jekh čher thaj gothe bešle e fariseja thaj e učitelja taro Mojsijaso zakono save avile tare sa e gava andari Galileja thaj i Judeja thaj andaro Jerusalim. A i zor e Gospodesi sasa pe leste te bi vov sastarola. 18 Thaj dikh, e manuša ande ano than e pašljimaso e manuše savo naštine te phirol thaj rodije sar te anen le thaj te mučhen le anglo Isus. 19 Kana ni arakhlje kotar te anen le tare but manuša, uštile po čher thaj taro tavano mukhlje le sa e thanesa kaj pašlilo ko maškar anglo Isus.
20 Kana dikhlja lengo pačajipe, vaćarda lese: “Manušeja, oprostin pe će grehura!”
21 Thaj e fariseja thaj e učitelja taro Mojsijaso zakon lije ane peste te den gođi: “Savo si kava savo hulil po Dol? Ko šaj oprostil e grehura sem jekh Dol?”
22 Kana o Isus haljarda so von den gođi ane peste, vaćarda lenđe: “So den gođi ane tumare ile? 23 So si po ločhe te phenol pe: ‘Oprostin pe e grehura ćire’, il te phenol pe e manušese savo našti phirol: ‘Ušti thaj phir?’ 24 Al te džanen kaj isi man, me o Čhavo e manušeso[~3~], vlast ki phuv te oprostiv e grehura, me ka sikavav tumenđe mi zor.” Tegani irisajlo premalo manuš savo naštine te phirol thaj phenda: “Tuće phenav! Ušti thaj le ćo than e pašljimaso thaj dža ane ćo čher.”
25 Sigate uštilo angle lende thaj lija po than e pašljimaso thaj đelo pese čhere hvalindoj e Devle. 26 Savore sesa radosna thaj hvalisade e Devle. Pherdile dar thaj vaćarde: “Čudo dikhljam ađive!”
27 Pale gova iklilo thaj dikhlja e carinco[~4~] savo akhardola Levi sar bešol ki carina, thaj vaćarda lese: “Av pale mande.” 28 Thaj o Levi uštilo, ačhada sa thaj đelo pale leste.
29 E Isusese ćerda o Levi ano po čher baro xape. Sesa gothe but carincura thaj avera manuša bešle lesa ko astali. 30 E fariseja thaj e učitelja tare Mojsijaso zakon lije te den vika thaj te vaćaren lese sikadenđe: “Sose xan thaj pijen e carincurencar thaj e grešnikurencar?”
31 O Isus vaćarda lenđe: “Ni trubul e sastenđe doktora, nego e nasvalenđe. 32 Me ni aviljem te akharav e pravednikuren, nego aviljem te akharav e grešnikuren ko pokajipe.”
33 E fariseja thaj e učitelja tare Mojsijaso zakon pučlje le: “Sose e Jovanese sikade postin thaj molin pe e Devlese, gija ćeren thaj e farisejska sikade, al ćire xan thaj pijen?”
34 O Isus vaćarda lenđe: “Šaj li čhuve e gosturen save avile ko abav te postin dok slavin e mladoženjasa? 35 Ka avol o đive kana ka len lendar e mladoženja, tegani i von ka postin.”
36 Thaj vaćarda lenđe i paramič: “Khoni ni čhuvol kotor taro nevo fostano po purano fostano, golese kaj i o nevo ka pharadol thaj o kotor taro nevo fostano ni ačhol šukar ko purano. 37 Thaj khoni ni čhorol nevi mol ane purane morčha, golese kaj i nevi mol ka pharavol e morčha thaj ka čhordol i mol, a e morčha ka pharadon.[~5~] 38 Golese i nevi mol čhuvol pe ane neve morčha [thaj gija solduj ka arakhadon]. 39 Thaj khoni ko pilja i purani mol ni manđol nevi golese kaj phenol: ‘I purani si po šukar.’ ”
<- Luka 4Luka 6 ->*5,1 Galilejsko jezero aver alav pašo Genisaretsko jezero
†5,10 ka dole e manušen simbolično značil: o Petar te inđarol o Lafi e Devleso e manušenđe.
‡5,24 O Isus korkoro pes akharol “o Čhavo e manušeso”.
§5,27 E Jevreja mrzisade e poreznikuren golese so e poreznikura sesa Jevreja save ćerdile izdajice gijate so sarađujisade e Rimljanurencar save okupirisade o Izrael. Gothe i e poreznikura sesa nepoštena, čorena tare Izraelcura pare.
*5,37 I nevi mol našti čhuvol pe ani purani morčhi golese kaj i nevi mol šuvljol thaj buljol i tegani bi pharavola i purani morčhi.