Luka 13

Savore mora te iri amen e Devlese

1 Ane gova vreme odori sesa nesave save phende e Isusese tare Galilejcura kaso rat o Pilat mešisada lenđe kurbanurencar. 2 Thaj o Isus vaćarda lenđe: “Tumen li den gođi kaj gola Galilejcura so sesa mudarde si po grešna tare avera Galilejcura? 3 Na! Phenav tumenđe, i tumen gija ka mudardon ako ni irin tumen e Devlese. 4 Il, so si kole dešohtonecar pe kaste pelo o toranj o Siloamsko thaj mudarda len? Tumen li den gođi kaj von sesa po grešna tare avera Jerusalimcura? 5 Na! Phenav tumenđe, i tumen gija ka mudardon[~1~] ako ni irin tumen e Devlese.”

Paramič tari smokva savi našti bijanol

6 O Isus vaćarda lenđe kaja paramič: “Jekhe manuše sasa smokva sadime an po vinograd. Thaj avilo te dičhol dal anda bijandipe, al ni arakhlja pe late khanči. 7 Tegani vaćarda e manušese savo ćerda bući ko vinograd: ‘Ak trito berš sar avav thaj rodav bijandipe pi kaja smokva thaj ni arakhav. Čhin la! Sose te šućarol i phuv?’

8 A o manuš so ćerol bući ko vinograd vaćarda lese: ‘Gospodarona! Ačhav la vadži kava berš te hunav paše late thaj te čhudav laće gunoj. 9 Šaj ka bijanol aver berš. Ako na, ka čhine la.’ ”

O Isus sastarol ko savato

10 Thaj kana o Isus sikavola ani jekh sinagoga ko savato 11 thaj dikh, sasa gothe jekh džuvli savi sasa banđarde dumesa thaj sasa nasvali taro bilačho duxo dešohto berš thaj naštine te ačhol šukar. 12 Thaj kana dikhlja la, dija la vika o Isus thaj phenda laće: “Džuvlije! Oslobodimi san taro ćiro nasvalipe!” 13 Thaj čhuta pe late pe vasta. Thaj i džuvli sigate ispravisajli thaj hvalisada e Devle.

14 A o vođa tari sinagoga holajlo but sose o Isus sastarda ko savato thaj vaćarda e narodose: “Isi šov đive ano kurko ke save šaj ćerol pe bući! Aven ke gola đive te sastardon, a na ko savato!”

15 A o Gospod o Isus tegani vaćarda lenđe: “Dujemujenđe! I tumen ćeren bući ko savato. Tumen li ni putren tumare guruve il e here tari jasla thaj ni inđaren le te pijol paj? 16 A kala čheja tare Avraamesi kuštik sava o Satana phanglja ak dešohto berš, sose te na putrol pe ko savato?” 17 A kana kava šunde ladžajle savore save sesa protiv leste, a sa aver narodo sesa baxtale paše sa e šukar buća o Isus so ćerda.

E Devleso carstvo si sar cikno seme savo barol

(Mt 13,31–32; Mk 4,30–32)

18 A o Isus vaćarda lenđe: “Savo si o Carstvo e Devleso? Thaj sosa te uporediv le? 19 Vov si sar seme e gorušicako, savo lol o manuš thaj čhudol le ano po vrt. Thaj barol thaj ćerdol baro kaš thaj e čiriklja aven thaj ćeren pese gnjezdura.”

E Devleso carstvo si sar humer savo uštol

(Mt 13,33)

20 Thaj pale vaćarda: “Savo si o Carstvo e Devleso? Thaj sosa te uporediv le? 21 Vov si sar kvasaco savo i džuvli dospil ani bari vangla aresa,[~2~] sa dži kaj ni šukljol.”

Okola save si palal ka aven anglal

22 Thaj o Isus, dok phirda pe dromesa ano Jerusalim, nakhlo maškare forura thaj e gava thaj sikavola e manušen. 23 Thaj khoni pučlja le: “Gospode, dal samo zala ka aven spasime?”

Thaj o Isus vaćarda lenđe: 24 “Trudin tumen te den ko tesno vudar e neboso, golese kaj but džene ka manđen te den, al ni ka šaj. 25 Kana o čherutno phandol e vudara tare po čher, ka avol tumenđe but kasno. Ka ačhen avral, ka čalaven ko vudar thaj ka phenen: ‘Gospode! Putar amenđe e vudara!’ Thaj vov ka vaćarol tumenđe: ‘Ni pindžarav tumen, katar sen.’

26 Tegani ka vaćaren: ‘Amen xaljam thaj piljam tusa thaj pe amare droma sikadan!’

27 A vov ka vaćarol lenđe: ‘Vaćarav tumenđe: Ni pindžarav tumen katar sen.[~3~] Crden tumen mandar save bilačhipe ćeren!’

28 Gothe ka roven thaj ka aven but holjame,[~4~] kana ka dičhen e Avraame, e Isaako thaj e Jakove thaj sa e prorokuren ano Carstvo e Devleso, a tumen ka aven ikalde avral. 29 Thaj but džene ka aven taro istok thaj taro zapad thaj taro sever thaj taro jug thaj ka bešen pašo astali ano Carstvo e Devleso.[~5~] 30 Thaj dikh, kola so si akana anglal odori ka aven empalal, a okola save si empalal odori ka aven emanglal.”

O Isus rovol e Jerusalimese

(Mt 23,37–39)

31 Ane gova đive avile nesave fariseja te phenen e Isusese: “Iklji thaj dža akatar, golese so o caro o Irod manđol te mudarol tut!”

32 Thaj o Isus vaćarda lenđe: “Džan thaj vaćaren gole lisicaće:[~6~] ‘Ak ikalav e benđen thaj sastarav ađive thaj theara, a trito đive ka završiv.’ 33 Ađive thaj theara thaj prektheara trubul te džav, golese kaj o proroko našti mudardol avral taro Jerusalim.[~7~]

34 Jerusalime, Jerusalime, tu savo mudare e prorokuren thaj gađi barencar okolen manušen saven o Dol bičhalda! Kozom droma mangljem te garavav e čhavoren ćiren sar i khanji pe pujoren tari pi phak thaj ni mangljen! 35 Ak, ka avol tumaro čher pusto,[~8~] a me vaćarav tumenđe: Ni ka dičhen ma sa dok ni vaćaren: ‘Blagoslovimo si kova savo avol ano alav e Gospodeso.’ ”[~9~]

<- Luka 12 Luka 14 ->