1 Tegani nesave manuša phende e Isusese so o Pilat, o upravniko e rimesoro, naredinđa nesave Galilejci te oven mudarde.[~1~] I on inele mudarde sar anena ine žrtve ano Hram e jerusalimesoro. 2 A o Isus phenđa lenđe: “Tumen li mislinena da adala Galilejci, adalese so ađahar mudardile, inele po grešna sa avere Galilejconendar? 3 Na! Ali te na obratinđen tumen taro tumare grehija, sarijen tumen ka adžićeri propast! 4 Ili okola dešofto upro kolende peli i kula ano Siloam hem mudarđa len, tumen li mislinena da on inele po bare grešnici sa e manušendar kola živinena ano Jerusalim? 5 Na! Ali te na obratinđen tumen taro tumare grehija, sarijen tumen ka adžićeri propast!”
6 Tegani o Isus vaćerđa lenđe akaja priča: “Inele nesave manuše smokva sadime pese ano vinograd. I alo te rodel o plod lakoro, ali na arakhlja le. 7 Tegani phenđa e manušese so ćerela buti lese ano vinograd: ‘Ače, trin berš sar avava te rodav plod upri akaja smokva, ali na arakhava le. Čhin la! Sose te šućari i phuv?’
8 A ov phenđa: ‘Gospodarona, ačhav la pana akava berš. Ka handav la hem ka frdav laće đubrivo, 9 i šaj ka bijani. A te na bijanđa, ka čhine la.’ ”
10 I jekh savato sar o Isus sikaj ine ani jekh sinagoga, 11 adari inele nesavi đuvli kola o bišukar duho ćerela ine te ovel banđardi dumeja. Oj inele banđardi dešofto berš hem nisar našti ine te ispravini pe. 12 Kad o Isus dikhlja la, vičinđa la kora peste hem phenđa laće: “Đuvlije, oslobodimi injan taro to nambormipe!” 13 I čhivđa ple vasta upro late, a oj otojekhvar ispravinđa pe hem lelja te slavini e Devle.
14 Tegani e sinagogakoro vođa, holjame so o Isus sasljarđa ko savato, phenđa e narodose: “Isi šov dive ano kurko ko save šaj te ćerel pe buti! Ko adala dive aven hem oven sasljarde, a na ko savato!”
15 A o Gospod o Isus phenđa lese: “Dujemujengere injen! I tumen ko savato phravena tumare guruve ili tumare here taro jasle te legaren le te pijel pani. 16 A akajai đuvli oto pleme e Avraamesoro kola o Sotoni phandlja ače dešofto berš. Oj li na valjani te ovel phravdi taro akala lancija e nambormipasere ko savato?” 17 Kad phenđa adava, lađandile sare kola inele protiv leste, a sa avera manuša radujinde pe zako sa o šukaripe savo o Isus ćerđa.
18 Tegani o Isus phenđa: “Te phenav tumenđe savesei slično o carstvo e Devlesoro. 19 Sličnoi e semese oti gorušica save o manuš lelja hem frdinđa pese ki bašta. Ov barilo hem ulo kaš, hem o čiriklja ćerde gnezdija upro lesere granke.”
20 Palem o Isus phenđa: “Te phenav tumenđe savesei slično o carstvo e Devlesoro. 21 Sličnoi e kvascose save i đuvli lelja hem čhivđa ano baro čaro vareja,[~2~] i ov ćerđa sa o humer te uštel.”
22 I sar o Isus džala ine ple dromeja đi ko Jerusalim, terđola ine ko dizja hem ko gava te sikaj e narodo. 23 I ko jekh than, neko pučlja le: “Gospode, samo li hari manuša ka oven spasime?”
26 Tegani ka phenen: ‘Haljam hem piljam tuja, hem tu sikavđan ko amare dizjengere droma.’
27 A ov ka phenel: ‘Vaćerava tumenđe da na pendžarava tumen.[~4~] Ciden tumen mandar, sare tumen so ćerena bišukaripe!’
28 Tegani ka roven hem but ka holjanen[~5~] so ka dikhen e Avraame, e Isaake, e Jakove hem sa e prorokonen ano carstvo e Devlesoro, a tumen frdime avri. 29 O manuša ka aven taro istok hem taro zapad, taro sever hem taro jug hem ka čhiven pe uzalo astali ki gozba ano carstvo e Devlesoro.[~6~] 30 Ače, okola kolai akana prva tegani ka oven zadnja, a okola kolen akate dikhena sar zadnjonen adari ka oven prva.”[~7~]
31 I tegani nesave fariseja ale koro Isus hem phende lese: “Dža akatar, adalese so o caro o Irod mangela te mudari tut.”
32 O Isus phenđa lenđe: “Džan hem vaćeren adala lisicaće:[~8~] ‘Ka ispudinav e demonen hem ka sasljarav avdive hem tejsa, a ko trito dive završinava.’ 33 Ali avdive, tejsa hem prektejsa valjani te džav mle dromeja, adalese so izgledini dai o Jerusalim than kote sa o proroci valjani te oven mudarde.[~9~]
34 Jerusalime, Jerusalime, tu savo mudareja e prorokonen hem frdeja bara upro okolende kolen bičhalđa tumenđe o Devel! But puti mangljum te čedav te manušen sar i khani ple pilićken talo ple phaka,[~10~] ali tumen na mangljen! 35 Ače, to čher ka ovel napustime![~11~] I vaćerava tumenđe da čače naka dikhen man đikote na phenena: ‘Blagoslovimei okova kova avela ano anav e Gospodesoro!’ ”[~12~]
<- Luka 12Luka 14 ->*13,1 o Pilat, o upravniko e rimesoro, naredinđa nesave Galilejci te oven mudarde Ko original terđola: “o Pilat mešinđa lengoro rat lengere žrtvencar”.
†13,21 baro čaro vareja Ko original terđola: “trin mere oto varo” savoi đi ko 30 kilja.
‡13,25 Na džanav kola injen Ko original terđola: “Na džanav tumen kotar injen.”
§13,27 na pendžarava tumen Ko original terđola: “na džanav tumen kotar injen.” Averčhane: “Na injen mle amala ni mli familija i na injen vičime maje ki gozba.”
*13,28 but ka holjanen Ko original terđola: “krciba e dandengoro”.
†13,29 But Jevreja kola mislinde dai e Devlese ano carstvo, naka oven. Ali but okola kola nane Jevreja taro sa o strane e phuvjakere ka oven ano carstvo e Devlesoro.
‡13,30 Ko original terđola: “O prva ka oven zadnja, a o zadnja prva.” Kadi neko “prvo”, adava značinđa dai bitno hem da dela pe lese čast. Averčhane: “ka oven najbitnija … ka oven najhari bitna” ili “O Devel ka del čast … O Devel ka lađari.”
§13,32 lisicaće O Irod inele lukavo sar lisica.
*13,33 O Isus vaćerđa akava adalese so džanđa da e Jevrejengere vođe hem ole ka mudaren ano Jerusalim sar so lengere pradada mudarde bute averen kola inele proroci bičhalde taro Devel. Ko original terđola: “adalese so našti te ovel adava, o proroko te mudarđol avri taro Jerusalim.”
†13,34 sar i khani ple pilićken talo ple phaka Ađahar i khani štitini ple pilićken taro povrede.
‡13,35 E Jerusalimesere manuša na prihvatinde e Isuse sar Mesija. O Devel akana olen na prihvatini hem naka štitini len više. Posle e rimesiri vojska uništinđa o Jerusalim (70 berš palo Hrist).
§13,35 O Isus palem ka irini pe ki phuv. Tegani ka pendžaren e jerusalimesere manuša dai ov o Mesija.