1 Palo adava, o Gospod o Isus birinđa avere eftavardešuduje[~1~] učenikonen hem bičhalđa len duj po duj angla peste ko sa o dizja hem o thana ko save manglja te džal. 2 Angleder so te džan, o Isus phenđa lenđe: “I žetvai bari, a hari bućarne te čeden. Adalese, molinen e gospodare oti žetva te bičhali e bućarnen ki žetva pli.[~2~] 3 Džan! Ače, bičhalava tumen sar bakrorjen maškaro ruva. 4 Ma legaren tumencar kesa e lovencar, ni torba dromese, ni buderi obuća. I ma našalen tumaro vreme ađahar so ka terđoven te vaćeren nekasar odrumal.
5 I kad đerdinena ko nesavo čher, prvo vaćeren: ‘Mir akale čhereste!’ 6 Te adari bešela o manuš kova mangela mir, tegani o mir, savese tumen molinena, ka ačhol oleja; a te na manglja mir, tumaro mir ka irini pe tumenđe. 7 Kad avena ko nesavo čher, ma palo adava nakhen ko avera čhera. Ačhoven ko jekh than, han hem pijen adava so o čherutne ikalena angla tumende,[~3~] adalese soi o bućarno dostojno pla plataće.
8 I ki savi diz đerdinena, a o dizutne priminena tumen, han okova so ikalena angla tumende. 9 Sasljaren e nambormen adari hem vaćeren sarijenđe: ‘Akaleja mothovaja tumenđe dai paše o carstvo e Devlesoro!’ 10 A ki savi diz đerdinena, a o dizutne na priminena tumen, iklindoj ko glavna droma e dizjakere, vaćeren: 11 ‘Hem i prašina tumara dizjakiri, savi dolinđa pe ko amare pre, amen kosaja la[~4~] sar znako da o Devel ka sudini tumenđe.[~5~] Ali te džanen da o carstvo e Devlesoro alo paše!’ 12 Vaćerava tumenđe da ko dive kad o Devel ka sudini e manušenđe, po lokhe ka ovel zako manuša tari Sodoma[~6~] negoli zako manuša tari adaja diz.”
13 “Jao tumenđe, manušalen taro Horazin! Jao tumenđe, manušalen tari Vitsaida! Te oven ine čudesija maškaro manuša taro Tir hem taro Sidon[~7~] save ule maškara tumende, pana angleder ka kajinen pe ine, bešindoj ano šeja oto kanaj hem ano pepeo.[~8~] 14 Ali e manušenđe taro Tir hem taro Sidon ka ovel po lokhe ko Sudo negoli tumenđe. 15 A tumen, manušalen taro Kafarnaum, ma mislinen da o Devel ka povazdel tumen đi o nebo; đi o than e mulengoro[~9~] isi te peraj tumen.
16 Tegani phenđa e učenikonenđe: Kova šunela tumen, man šunela, a kova odbini tumen, man odbini. A kova odbini man, odbini e Devle kova bičhalđa man.”
17 Kad o eftavardešuduj učenici irinde pe oto drom radosna, phende e Isusese: “Gospode, hem o demonja šunena amen kad naredinaja lenđe ano to anav!”[~10~]
18 A o Isus ko adava phenđa lenđe: “Dikhljum e Sotone sar perela taro nebo sar munja.[~11~] 19 Eče, dinđum tumen vlast te gazinen upro sapa hem o škorpije[~12~] hem upro sa o zoralipe e neprijateljesoro e Sotonesoro hem ništa naka ovel tumenđe. 20 Ali ma edobor radujinen tumen zako adava so o bišukar duhija šunena tumen, nego više radujinen tumen adalese soi tumare anava zapisime ko lil e Devlesoro ano nebo.”[~13~]
21 I tegani o Isus radujinđa pe ano Sveto Duho hem phenđa: “Hvalinava tut, Dade, Gospode e nebosoro hem e phuvjakoro, so garavđan o čačipe okolendar kola pes dikhena sar mudronen hem džanden, a mothovđan okolenđe kolai sar čhavore.[~14~] Oja, Dade, džanav da ćerđan adava adalese so ađahar mangljan.”
22 Tegani o Isus phenđa okolenđe so inele adari: “Mlo Dad sa[~15~] muklja maje ko vasta. Niko na džanel e Čhave, sem o Dad; hem niko na džanel e Dade, sem o Čhavo hem okola kolenđe o Čhavo mangela te mothoj le.”
23 Tegani irinđa pe nakoro učenici hem samo olenđe phenđa: “Blago e manušenđe kola dikhena adava so tumen dikhena! 24 Vaćerava tumenđe da but proroci hem carija mangle te dikhen man, ali na dikhle man; hem mangle te šunen man, ali na šunde man!”
25 I dikh, jekh dive sar o Isus sikaj ine, nesavo učitelj e Zakonestar uštino[~16~] te pučel le nešto sar te iskušini le, i pučlja: “Učitelju, so valjani te ćerav te dobinav o večno dživdipe?”
26 A o Isus phenđa lese: “Soi pisime ano e Mojsijasoro zakoni? So čitineja adari?”
27 I ov phenđa e Isusese:
28 Tegani o Isus phenđa lese: “Šukar phenđan. Ćer ađahar hem ka ovel tut o večno dživdipe.”
29 Ali o učitelj e Zakonestar manglja te opravdini pe i pučlja e Isuse: “A kovai mlo pašutno?”[~19~]
30 A ko adava, o Isus phenđa lese akaja priča: “Nesave manuše, sar ine huljela tari diz Jerusalim ki diz Jerihon, dolinde o čora. On lelje lestar sa, đi o šeja. Edobor marde le da o manuš samo so na ine te merel. Tegani o čora cidinde pe olestar, a o manuš pašlilo ko drom hem na džanđa pese.
31 Na nakhlo but, i nekotar adale dromeja sar huljela ine nesavo svešteniko[~20~], dikhlja e manuše sar pašljola ko drom i nakhino avrethar. 32 Ađahar da nesavo levit:[~21~] alo đi adava than kote o manuš pašljola, dikhlja le i nakhino oti aver strana adale dromesiri.
33 A inele nesavo Samarijanco[~22~] savo džala ine adale dromeja. Kad reslja đi ko than kote o manuš pašljola, dikhlja le, i pelo lese žal olese. 34 Tegani o Samarijanco alo đi o manuš, čhorđa ulje hem mol upro lesere rane te kosel len[~23~] hem paćarđa len. I vazdinđa le upro plo her hem legarđa le ko čher kote lovenđe šaj te hal pe hem te sovel pe, i adari brininđa pe olestar. 35 Tejsato dive o Samarijanco ikalđa duj denarija[~24~] hem dinđa ko manuš kasoro inele o čher hem phenđa lese: ‘Brinin tut akale manušestar, i sa so ka trošine buderi, ka irinav će kad ka irinav oto drom.’ ”
36 Tegani o Isus pučlja e učitelje e Zakonestar: “So tu pheneja? Kova akale trinendar mothovđa pe sar pašutno okolese kole dolinde o čora?”
37 A ov phenđa: “Okova kova mothovđa lese milosrđe.”
38 I sar o Isus hem lesere učenici džana ine dromeja đi ko Jerusalim, đerdinde ko nesavo gav. Adari živinđa nesavi đuvli palo anav Marta. Oj vičinđa len kora peste ko čher hem lelja te ćerel lenđe hajbnase. 39 Ola inele phen palo anav Marija, koja beštini uzalo e Gospodesere e Isusesere pre hem šunđa lesoro lafi. 40 A i Marta sa ki sig dikhela ine te kandel, i ali uzalo Isus hem pučlja le: “Gospode, so tu pheneja? Šukar li adava so mli phen muklja man korkora te kandav? Phen laće te pomožini maje.”
41 A o Gospod phenđa laće: “Marto, Marto! Brinineja tut hem uznemirineja tut zako but so, 42 a samo jekh valjani. I Marija birinđa te ćerel šukar stvaro, adalese naka ačhavav la adalestar.”
<- Luka 9Luka 11 ->*10,1 eftavardešuduje Ano nesave grčka rukopisija terđola “eftavardeš.”
†10,2 O Isus vaćeri da isi but manuša kolai spremna te đerdinen ko carstvo e Devlesoro, ali da nane dovoljno učenici te sikaven hem te pomožinen e manušenđe.
‡10,7 O Isus na phenđa da on valjani te ačhoven ano adava čher sa adava dive, nego da valjani te soven ano isto čher đijekh rat đikotei adari; šaj te phenel pe hem ađahar: “Ma soven đijekh rat ano aver čher.”
§10,11 “Te kosel pe i prašina taro pre”: ani kultura e jevrejengiri adava značinđa nešto simbolično. Dikh i fusnota ko Lk 9,5
*10,11 Akavai simbolično ćeriba saveja mothovena da odbacinena adala dizjakere manušen; šaj te phenel pe hem ađahar: “Sar tumen amen so odbacinđen, i o Devel u potpunosti odbacini tumen.”
†10,12 O Devel e jagaja tharđa e manušen ani diz Sodoma adalese so inele but bišukar (dikh 1. Mojs 19,24–28).
‡10,13 O manuša kola živinde ano Horazin hem ani Vitsaida inele Jevreja i valjande te adžićeren e Mesija. O manuša kola živinde ano Tir hem ano Sidon na inele Jevreja adava značini da on na adžićerde te avel o Mesija. Okova so o Isus akate vaćeri adavai da čak hem okola kola nane Jevreja valjani te pendžaren dai ov o Mesija adalese so ćerđa sa adala čudesija.
§10,13 bešindoj ano šeja oto kanaj hem ano pepeo Ko adava vreme adeti saveja o manuša mothovena dai tužna hem dai lenđe žao zako pumare grehija inele te bešen ano šeja save inele hrapava hem neudobna hem te čhoren upra pumende pepeo.
*10,15 than e mulengoro Ko original terđola: “Had”. O anava “Had” hem “Šeol” ani Biblija koristinena pe zako meriba hem zako than kote o duše e manušengere džana kad merena.
†10,17 Akate kad phenela pe “anav”, mislini pe upro e Isusesoro zoralipe hem upro lesoro autoritet.
‡10,18 O Isus koristini akaja uporedba te phenel so o Devel pobedini ine e Sotone dok lesere 72 učenici propovedinde ano dizja. Ili avere lafencar, o Sotoni pelo sar so taro nebo i munja khuvela natele.
§10,19 sapa hem o škorpije O Isus verovatno uporedini e sapen hem e škorpijen e demonencar sar soi okola savendar o učenici vaćerena ko Lk 10,17. O demonjai sar o sapa hem o škorpije adalese soi opasna hem ćerena bišukaripe e manušenđe.
*10,20 anava zapisime ko lil e Devlesoro ano nebo. Ano nebo o Devel pisinđa ko lil o anava sarijengere kola ka dobinen o večno dživdipe. Akale lilestar vaćeri pe hem ko Ps 69,28; Fil 4,3; Jev 12,23; Pučar 3,5; 13,8; 17,8; 20,12; 20,15; 21,27.
†10,21 Akava odnosini pe upro okola kolen možda nane but obrazovanje, ali spremnai te prihvatinen e Isusesoro sikaviba ađahar sar o čhavore kad spremno šunena okolen kolenđe verujinena.
‡10,22 sa i vlast, o čačipe, o džandipe.
§10,25 uštino Ano Izrael ko adava vreme, o učitelj hem o učenici bešena ine dok ov ine sikaj len. Kad o učeniko mangela ine nešto te pučel, valjani te uštel ko pre.
*10,27 Mang ili “čumudin”
†10,27 I naredba ano 10,27a–b avela oto 5. Mojs 6,5. I naredba ano 10,27c avela oto 3. Mojs 19,18. Akalai duj lila (5. Mojs hem 3. Mojs) kotora oto Zakoni savo o Devel dinđa e Mojsijase. O duj naredbe šaj te arakhen pe hem ano Mt 22,37–39 hem ano Mk 12,30–31.
‡10,29 Akava manuš manglja te džanel kas valjani te volini, ili avere lafencar: “Kas valjani te dikhav sar mle pašutne hem te mangav le sar korkore man?”
§10,31 svešteniko Jevrejsko svešteniko inele manuš kova dinđa žrtve e Devlese ko than e manušengoro. Ov predstavinđa e manušen e Devlese.
*10,32 levit O Levitija inele manuša oto pleme e Levijesoro kola pomožinde e jevrejengere sveštenikonen ano Hram.
†10,33 Samarijanco O Samarijanci inele e jevrejengere potomci kola lelje pe avere narodoja. On na slavinde e Devle ko Jerusalim sar so o Jevreja. O Jevreja inele holjame upro Samarijanci hem na verujinde da o Samarijanci inele e Devlesoro narodo.
‡10,34 I mol koristinđa pe te kosel pe i rana, a o ulje verovatno koristinđa pe te na inficirini pe i rana.
§10,35 duj denarija Duj denarija inele duj srebrna kovanice. Ko adava vreme, zako duj denarija o bućarno valjanđa duj dive te ćerel buti.