Дилэс 12

О линдипэ тай о мукипэ э Пётарэско

1 Андэ адава вахыти о патишаи о Ирод линдярдяс сарсавэ манушэн андар кхангери, тэ керэл лэнги джюнгалипэ. 2 Ов пхэнляс тэ мударэл камаса э Яковес, э пхралэс э Иоаннескерэс. 3 Кана ов дикхляс, кай о иудея адалэски лошазэн, ов линдярдяс ли э Пётарэс. Адава уло андэ вахыти, кана сас о мисяфири э Писное Питэнго. 4 Э Пётарэс линдярдэ, пханлэ андэ пханли тай тхэдэ штар группэс по штар салдатя тэ дикхен пал лэстэ. О Ирод мангелас палки Пэсах тэ никалэл э Пётарэс ко дюняс. 5 О Пётар сас андэ пханли, ай э кхангери лачес мангелас андар лэстэ э Дэвлэс.

6 Рати ангал отхэ, кай о Ирод камэлас тэ никалэл лэс ко цындос, о Пётар суто сас машкарэ ко дуй салдатя, пханло до джянджирэнца, ай о барэ тэрдэ ангал удар тай дикхен пал пханли. 7 Бирдэн ало миляики э Сагбуско, тай э пханли тхабили ярэкеса. О миляики диняс бутуря э Пётарэс андэ риг тай джянгавдяс лэс.

— Ущи дэба! — пхэнляс ов, тай о джянджира пэлэ катар васта ко Пётар.

8 О миляики пхэнляс:

— Пхандэ кустик тай уряв минидэс.

О Пётар кердяс адава.

— Уряв тэ савутя тай джя пал мандэ, — пхэнляс о миляики.

9 О Пётар никлисто пал миляики андар пханли, на галёлас, кай алаи, со керэл о миляики, си чячес. Лэски сикавдёлас, кай ов дикхел дикхипэ. 10 Он накхлэ пашал ангалунэ барэ, дэчи пашал авэра тай пашылэ ки састурни бар, кай гелэл андэ диз. Э бар ой сам пхутэрдили ангал лэндэ, тай он никлистэ. Он накхлэ екх улица, тай бирдэн о миляики на уло. 11 Кана о Пётар галилопэс, ов пхэнляс:

— Акана мэ чячес джянав, кай о Сагбус бичялдяс Пэ миляикес тай кутарды ман катар вас ки Иродеско тай одолэ хурлукестар, саво мангелас манги о иудейски дюняс.

12 Галило, со уло, о Пётар гело андэ кхер ки Мария, ки дай ки Иоаннески, савэски генэ пхэнэнас Марк, катэ кидиндилэ тэ манген э Дэвлэс бут дюняс. 13 О Пётар мардяс э бар, тай гели тэ пхутрэл э иргатинка Рода. 14 Ой пэнджярдяс э Пётарэс катар сэси тай бристэрдяс катар лош тэ пхутрэл э бар, прастанили палэ тэ пхэнэл, кай о Пётар тэрдо ки бар.

15 — Ту дэнилилян! — пхэнлэ лаки.

Ай ой пхэнэлас, кай си адава чячипэ.

— Адава лэско миляики, — гиндэ он.

16 О Пётар озаман генэ марэлас, тай кана он пхутэрдэ э бар тай дикхлэ лэс, улэ шаштимэна. 17 О Пётар сикавдяс лэнги вастэса тэ тэныкизэн тай пхукавдяс, сар о Сагбус никалдяс лэс андар пханли.

— Пхукавэн адалэстар э Яковески тай аврэ пхралэнги, — пхэнляс ов лэнги тай гело отхар андэ аврэ тханэстэ.

18 Сабахтан машкарэ ко салдатя уло баро прастаипэ, никхон на джянэлас, со уло э Пётарэса. 19 О Ирод пхэнляс тэ родэн лэс, тай на аракхлэ. Ов зораса пхучляс ко барэ тай пхэнляс тэ мударэн лэн.

О мэрипэ э Иродеско

Дэчи о Ирод гело андар Иудея андэ Кесария тай ачило отхэ саво-то вахыти. 20 О Ирод сас холямэ опэр мануша андар Тир тай Сидон. Одола зборисаилэ машкарэ пэстэ, алэ лэстэ. Он динэ икос пумарэ ригатэ э Бластэс, саво дикхел палки патишаеско кхер. Он мангенас лачипэ тэ овэл машкарэ лэндэ, вай лэнги область лэлас о хапэ катар область ки патишаески. 21 Андэ пхэнло дес о Ирод урявдяс патишаитико мантия, бэшло опэр цындомаритико тхан тай пхэнляс лэнги. 22 О мануша лилэ тэ пхэнэн:

— Адава о сэси э дэвлэско, ами на мануш!

23 Тай озаман о миляики э Сагбуско мудардяс э Иродес, вай ов на махтады э Дэвлэс, тай о Ирод, хало э кермэнца, муло.

24 Э збора э Дэвлэски джялас дур тай дур. 25 О Варнава тай о Савл кердэ андэ Иерусалими о хэзмэти, саво тхэдо опэр лэндэ, лилэ пэса э Иоаннес, савэски генэ пхэнэнас Марк, тай гелэ палэ.

<- Дилэс 11 Дилэс 13 ->