Ezechiel 29

O lav pro Egipt

1 Andre dešto berš, dešto čhon pro dešudujto džives ke ma avľa o lav le RAJESKRO: 2 „Manušeja, visar tut le mujeha ko faraonos, ko egiptsko kraľis, a prorokin pre leste the pre calo Egipt. 3 Phen: ‚Kada phenel o RAJ, o Adonaj:

Dikh, me džav pre tu,

faraonona, egiptsko kraľina,

tu bari obludo,

so tuke pašľos maškar tire Nilska paňa.

Phenes tuke: „O Nil hino miro,

me les kerďom prekal mande.“

4 Ale me tuke thovava o haki prekal o čhama

a kerava, hoj te priľepisaľon o ribi andral tire paňa pre tire šupini;

cirdava tut avri andral o Nilska paňa

savore ribenca, so hine pre tire šupini.

5 Čhivava tut avri pre pušťa,

tut the savore riben andral tire Nilska paňa.

Pereha pre maľa,

na skidena tut upre aňi tut na sthovena pre kopa.

Dava tut te chal

le dzive džvirenge the le čiriklenge.

6 Akor sprindžarena savore manuša, so bešen andro Egipt,

hoj me som o RAJ.

Bo o Egipt sas le Izraeloske ča sar e trsťinakri pacica,

pre savi pes mukelas.

7 Sar tut chudela andro vasta, phadžoha

a predemeha leske o vast telal e khak.

Sar pes pre tu oprinela, phadžoha

a slabisareha leske o pindre.‘ “

8 Vašoda kada phenel o RAJ, o Adonaj: „Dikh, anava pre tu e šabľa a murdarava andre tu avri le manušen the le džviren. 9 Le Egiptostar ačhela zamukľi pušťa. Akor sprindžarena, hoj me som o RAJ.

Bo tu phenes: ‚O Nil hino miro, me les kerďom prekal mande,‘ 10 vašoda džav pre tu the pre tire Nilska paňa. Kerava le Egiptostar zburaňiskos, e zamukľi pušťa le Migdolostar pro severos dži o Aswan pro juhos, dži paš e hraňica Kuš. 11 Na predžala prekal aňi manušeskro pindro aňi džviroskro pindro; ňiko ode na bešela saranda (40) berš. 12 Le Egiptostar kerava e pušťa maškar o rozburimen phuva; leskre fori ena sar pušťa maškar o rozburimen fori pro saranda berš. A rozčhivava le Egipťanen maškar o narodi a roztradava len maškar o phuva.“

13 Se kada phenel o RAJ, o Adonaj: „Pal o saranda berš skidava upre le Egipťanen le narodendar, maškar save len roztradňom. 14 Anava pale le Egipťanen, save sas zaile, a dava lenge pale te bešel andro južno Egipt, andre phuv lengre dadengri. Ode ela o Egipt slaboro kraľišagos. 15 Ela cikneder a slabeder savore okle kraľišagendar a imar pes na ľidžala upre upral o narodi. Kerava lestar ajso slaboro, hoj imar šoha na vladňinela upral o aver narodi. 16 O Izrael pes imar na mukela pro Egipt, hoj leske te pomožinel. Furt, sar dikhela pro Egipt, avela leske pre goďi, hoj oda sas binos te visarel pes ke leste vaš e pomoca. Akor o Izrael sprindžarela, hoj me som o RAJ, o Adonaj.“

O Egipt dino sar odmena prekal o babiloňiko kraľis

17 Andro bišueftato (27.) berš, andro ešebno čhon pro ešebno džives ke ma avľa o lav le RAJESKRO: 18 „Manušeja, o babiloňiko kraľis Nebukadnecar bičhaďa peskri armada, hoj pes te trapinel andro mariben le Tiroha. Dojekhe slugaďiske pele avri o bala a pal dojekh valos sas čuchimen tele e cipa. Ale aňi ov aňi leskri armada na chudle ňisavi odmena vaš odi phari buči, savaha pes trapinenas, sar kamenas te zňičinel o foros Tir. 19 ‚Vašoda kada phenel o RAJ, o Adonaj: Dikh, dava o Egipt le babiloňike kraľiske Nebukadnecaroske. Lela le Egiptoske o barvaľipena, kidela peske upre e korisť a občorarela e phuv. Kada ela e odmena prekal leskri armada. 20 Diňom leske o Egipt sar odmena vaš o trapišagos le Tiroha, bo ov the leskri armada oda kerde prekal mande, phenel o RAJ, o Adonaj.‘

21 Andre oda džives kerava, hoj o Izrael ela pale zoralo narodos, a tuke domukava te phundravel o muj maškar lende. Akor sprindžarena, hoj me som o RAJ.“

<- Ezechiel 28 Ezechiel 30 ->