Link to home pageLanguagesLink to all Bible versions on this site
8
Manetualain pake Kristus ela tao hehelu-barataa bebeuꞌ fo malole lena hehelu-barataa paraaꞌ

1 Penting au afada emi leo iaꞌ: besaꞌ ia ita tanuu malaka agama madema nan seli, kahereꞌ lena neme fai uluꞌ ara mai. Ria nana riꞌ Yesus. Fai a lu na, Ana natuuꞌ homu pareta nai nusatetu-ikutemaꞌ a, nai Manetualain Madema Nan Seli boboa ona Na.[~1~] 2 Ma Ana nalalaꞌo nonoi laka Na nai uma mamaso teaꞌ a. Manetualain riꞌ tao uma mamasoꞌ ria, ta lahenda dae-bafoꞌ a riꞌ tao fa.

3 Malaka agama madema nan seli biasa neni neneni-fefeeꞌ, ma tutunu-hohotuꞌ soaneuꞌ Manetualain. Huu ria na, de Yesus boe muste neni tutunu-hohotuꞌ. 4 Tehuu Yesus ta nalalaꞌo nonoi laka Na, nai dae-bafoꞌ a fa. Nana huu nai dae-bafoꞌ a hapu malaka agama, fo riꞌ fee neneni-fefeeꞌ ma tutunu-hohotuꞌ neuꞌ Manetualain, tuka baꞌi Musa atoran na. 5 Ara ralalaꞌo sira nonoi laka nara nai Laaꞌ Huhule-haradoiꞌ, fo rupa-lolen tuka uma mamaso teaꞌ a nai nusatetu-ikutemaꞌ a. Tepoꞌ fo baꞌi Musa nau tao Laaꞌ ria, Manetualain feen nafarereneꞌ nae, “Mafarereneꞌ matalolole! O muste tao tuka matetuꞌ rupa-loleꞌ, fo Au atudu neuꞌ o nai leteꞌ ria lain so a!”[~2~] 6 Tehuu Yesus nonoi laka Na kahereꞌ nan seli lena neme malaka agama rupa-lole paraaꞌ ara. Huu fo besaꞌ ia, Manetualain heke hehelu-barataa malole lena bali. Ana pake Yesus dadi neuꞌ lelete, ela lahenda dae-bafoꞌ a bisa mole-dame roo Manetualain.

7 Fai a ulu na, Ana heke hehelu-barataaꞌ noo baꞌi Musa, tepoꞌ fo Ana naonda atoran sira. Leo mae leoꞌ na, tehuu lahenda dae-bafoꞌ a ta bisa rasoda lalao-lalafuꞌ matetuꞌ tuka atoran sira. De, ara ta bisa malole roo Manetualain fa. Huu ria na, besaꞌ ia parluu hehelu-barataaꞌ fo malole lena bali. 8 Fai a ulu na, Manetualain nasaꞌai lahenda nara, nana huu ara ralena laka rasarerei Ria atoran paraa na. Tepoꞌ fo Ana ta nanenete soꞌ, boe ma namanasa, de Ana nafada nae,

“Nenene matalolole, huu fo Au ia, Ramatuaꞌ!
Tantu Au tao hehelu-barataa bebeuꞌ
o lahenda nusa Israel,
ma leo Yahuda.
9 Heheluꞌ fo riꞌ neuꞌ ko Au hekenee-barataa o si a,
ta sama noo hehelu fo fai a ulu na Au hekenee-barataan
o sira bei-baꞌi nara.
Fai a ulu na Au tai a lima nara,
de apipipi-alalaꞌo o si kalua reme dae Masir a mai.
Tehuu ara ta tao tuka
hata fo ara helu-barataa roo Au a.
Huu ria na, de Au ta nau tao daleꞌ neuꞌ asa soꞌ.
10 Heheluꞌ fo riꞌ Au hekenee-baratan o lahenda nusa Israel,
isi na leo iaꞌ:
“Neuꞌ ko Au peda atoran Ka neuꞌ sira duduꞌa-aafin daleꞌ.
Neuꞌ ko Au duiꞌ pareta Ka nai sira dale nara.
Boe ma, Au dadi uꞌ sira Ramatua na,
ma sira dadi reuꞌ Au lahenda kara.
11 Neuꞌ ko ta parlu ara ranori-rafada sira tia-lain,
ma sira toranoo nara rae,
‘Emi muste malelaꞌ Ramatuaꞌ a!’
fo ela sira basa ralelaꞌ Au,
mulai neme aanaꞌ a mai losa bauinaꞌ a.
12 Huu no Au nau atudu dale kasian Ka neuꞌ asa,
de Au afarene heni sira sala-sikon katemaꞌ.”[~3~]

13 Tepoꞌ fo Ramatuaꞌ a dedea nae, Ana nau heke hehelu-barataa bebeuꞌ noo si, ria sosoa na nae, hehelu-barataa paraaꞌ a mana dadi taaꞌ so. Ta dooꞌ a soꞌ te, mopo ni.

<- Ibrani 7Ibrani 9 ->