HEBREOS 3

Jesuska Moisesmanta astawan importante

1 Diospi creej hermanocuna, Dios wajasunquichis paypajta canayquichispaj. Cristo Jesusta allinta uyariychis, Diospaj cachamuskan apostolta, curaj sacerdoteta. Gracias payman cachun creeyninchista willaskanchismanta. 2 Jesuska fiel carkan, churajnin Diospaj mandaskanta junt'aj, imaynatachus Moisespas ruwananpi fiel junt'anan carkan Diospaj tucuy familianwan. 3 Imaynatachus wasi ruwajka astawan honrata jap'ekan ruwaskan wasimanta nejtenka, ajinallatataj Jesuska astawan honrata jap'ekan Moisesmanta nejtenka. 4 Sapa waseka runapaj ruwaskan, Dioscajtaj tucuy ima cachcajcunata ruwan. 5 Diospaj tucuy familianpi Moisés fielta sirverkan, imatachus Dios nin chayta willananpaj. 6 Diospaj Churin Cristocajtaj Diospaj munayninta fiel junt'aj Diospaj familian patapi. Chay familiaka nokanchis quiquin canchis, seguropuni cusicuywan Cristopi confiachcanchis chhicaka.

Creyentepaj samanan

7 Chayraycu Santo Espíritu Escriturapi nin:

“Cunan kancuna Diospaj niskanta

uyarinquichis chayka,

8 ama sonkoyquichista khoruyachinquichischu

sajra mana casucojcuna jinaka,

ch'usaj pampapi Diosta pruebaman churajcuna jinaka.

9 Dios nin: ‘Chaypi abueloyquichiscuna

pruebaman churawancu, tawa chunca watata

ruwaskaycunata ricorkancu chaywanpas.

10 Chayraycu phiñacorkani paycunawan,

nerkanitaj:

‘Sonkoncupi pantaskallapuni purincu,

mana munancuchu munaskayman jina causayta.’

11 Chayraycu phiñacuyniypi jurani mana

yaycunancupaj samana lugarniyman.”

12 Hermanocuna, cuidacuychis ama maykenniyquichispas sajra sonkoyoj canayquichispaj, causachcaj Diosmanta carunchacuspa paypi mana creeskayquichisraycu. 13 Astawanka Escriturapaj “cunan” niskan cachcajtin, sapa p'unchay uj ujcuna animanacuychis ama maykenniyquichispas juchapaj engañaskan canayquichispaj, sonkoyquichis mana sajrayananpaj. 14 Cristowan canapajka kallariypi confiaskanchiswan firme cananchis tucucuycama.

15 Chaymanta Escrituraka nin:

“Cunan kancuna Diospaj niskanta

uyarinquichis chayka,

ama sonkoyquichista khoruyachinquichischu

sajra mana casucojcuna jinaka.”

16 ¿Picunataj carkancu Diospaj niskanta uyarispa mana casucojcunari? Moisespaj Egiptomanta pusarkamuskan tucuy runacuna. 17 ¿Picunawantaj Diosri tawa chunca watata phiñaska cachcarkan? Jucha ruwajcunawan. Paycunataj ch'usaj pampapi wañurarkancu. 18 ¿Picunamantaj Diosri jurarkan, mana yaycunancupaj samana lugarninmanri? Mana casucojcunaman. 19 Jinamanta yachanchis manapuni yaycuyta atiskancuta mana creeskancuraycu.

<- HEBREOS 2 HEBREOS 4 ->