Hibru 2

Vara biibiina tavotekatekei.

1 Tuna kubiine vara biibiina tavi yanei na tanota kamowi ma tavokikini da ke tasiwana. 2 Rorova mara katamanina na vonaviyoyovana aneya ivi damani ita kaekiki mau kurisi, tuna na sisiya bagibagisi. Ma iyavo kava sisiyisi ivi yanei ma ke ita vovotekatekei ma ikiigiiyei na kovogha berona ina panani. 3 Ma tota na vara biibiina tabarei na ikikava kovogha taveruvuvurei? Ke kovokovoghina. Bada Yesu tuna mani ivi yonayonei da ini yawasita, tuna na bera ghamana. Ma bera aroba ivi mamatara kurita da varana biibiina na vonavaghata. Sago na iyavo kava ti mani ivi yanei na ivi mamatarei kurita. 4 Ma bade God ivi mamatarei, iyamna ina rewapanai bera notakavakavasi ma matakira ghamaghamasi itupuwa. Ma kana viaroba na Kanuma Vovokaravina ina puyo ivi mamatarei kurita, puyosi na God ina kayowanai wawaya sago sago duma kurisi ivorereghi.

Yesu ivi wawayota ma muriyai ighe kirakai.

5 Dobu vuna karakava ina nekiibau na tisisiyei, dobuna na ke aneya ini badei. 6 Giruma katamana kamonai wawaya igiruma bo,

“O God, wawayota na ke avai ma kegha da kenotanotai,

wawaya natusi na avi kubiine kinuwapoyei?

7 Kutereoruwei da mara tupona kava aneya gaburisiyai imakai.

Muriyai kuterepai da kadara ma vigheghena kuverei.

8 Ma rewapana gwabimuwai iviiya da bera kudubina ini badei.”[~1~]

Weni sisiyina kamonai God ivona da wawaya bera kudubina iti badei. Ivonakiiyaragha da bera kudubina iti badei, ma kegha da wekarakava takitakitai da ke ita vivibada. 9 Ma namada takitai da Yesu itereoruwei da mara tupona kava aneya gaburisiyai imakai. Kubiita ivokwarakwara ma irabobo, tuna kubiine karako takitakitai da kadara ma vigheghena God gwabinai iviiya. God ina agabiibai irakata da Yesu ivonatawei da wawaya kudubisi dobuwai kubiisi ita rabobo. 10 Bera kudubina iyamoni da kudubina rapenai. Ma ina kayowana da natunatuna peyarina kana kadara ku kamona ina rui. Tuna kubiine bera maninina iberai maranai Yesu inuwatawei da ivokwarakwara, ma nani vokwarakwarana kamonai ivovunaghi da God natunatuna iti nowesi da yawasa makamakii nonowina ita panani.

11 Ma tuna wawaya i berabero ekowakowatawei ma imaninisi. Tuna ma iyavo kava namada ikowatawesi, i Mamai na sago. Tuna kubiine Yesu ke ita vivinimayesi ma debiiyai evonavona da ti na ina rakaraka. 12 Takovi da evonavona da tota na varevaresina ma novunovuna, iyamna God kurina ivona bo,

“Varevaresiku ma novunovuku ana vonesi da kam vava irakata.

Ma am wawaya kamosiyai ani gheghenim.”[~2~]

13 Ma bade ivona meyei,

“Aku vitumaghana God kurina atereterei.”

Ma sisiya ikiitana meyei, ivona bo,

“God, taku ma natunatum kuvereku na peyarikai weni.”[~3~]

14 Ma God natunatuna itupuwa da ere viyosi ma tarasi. Tuna kubiine Yesu bade itupuwa da ti nakanani, ivi wawayota da ina rabobowai na rabobo badana ita gwaramutui, tuna wawayina na Devil. 15 Nakanani iberai da iyavo kava rabobo yabumanina ikutatanisi na irupamatawesi. 16 Vona bubuna da Yesu weni berasi iberai na ke aneya kubiisi ma vitumaghana damta kubiita, tota Abraham tupurereghina ivi viteta.[~4~] 17 Tuna kubiine ivi wawayota da tuna na varevaresina ma novunovuna nakanani. Ma biga iviiya da tuna God ina suwara kapuna badana. Ma bigana kamonai ivi patutu kirakai ma wawaya ivi kamyuyuwa kirakiiyesi da kubiisi ivi suwara da God ina nuwapughu ita vovinubai da i berabero ita notatawei. 18 Ma tuna mani ruyagha ma vokwarakwara damina iviiya, tuna kubiine kovokovoghina da iyavo kava ruyagha epanapanani na ini vitesi.

<- Hibru 1 Hibru 3 ->