Link to home pageLanguagesLink to all Bible versions on this site
12
1 <δ> Tô ilàri ma pwi Dàragô

1 [Gée na càùru pwiri, â go côo mwara naa na nyuâa, pâ pàra muru na o mwa tèepaa.] Ba tèepaa naa gopaérenao ê jè câmu kêe na dau maina, [na rà pò goo pâ âboro]. Wàépwiri, ê tô jè ilàri na pwényuâa[a], na é coona i tòotù, â tâa aranara du âê ê parui. Â wâna pûruê ê bwe korona, na pwa goro 12 îricò. 2 [b]Â é maagé côo, ba ée jèe pitàmari èpo. Â é i goro ê aré ma tòina kêe na dau maina.

3 [c]Â é nye tèepaa me kaa naa gopaérenao ê jè câmu kêe—ê jè pé walàuma kâra duée, wà pwi Dàragô[d]. Â po mii ê naiié, â po 7 pûruê, na jèpa tâa gò, ê nari bwe korona. Â po 10 gi kêe. 4 [e]Â é dàti boo, goro ê tûgòé, ê pwi caapwi ére gée goo âracié ére, gée goro ê pâ îricò wânidò napwéretòotù. Â é urarà boo naa gòropuu. Â nabwé, â é tà coo ara i tô ilàri na pigéaa, ba na é uti i pwi èpo kêe wiàna é pitàmariê.

5 [f]Napwa naa goo wà i pwi èpo, âna ée mwa pitûâ kâra diri ê pâ Ba, goro i tâjò paò kêe.

Ûna pitèpaé, â nye upaé kaa, jii i pwi Dàragô, naa jaa Pwiduée, naa na autâa kêe. 6 Â é uru naa namaré i tô nyaa kêe, naa na autâa na é jèe pwabwàti ba kêe, wà Pwiduée. Â o mwa èrùé naawê, naa na 1 260 tòotù.
É ipaa dèe Mikaéla

7 [g]Géewê, â nye pwa paa kaa wânidò *napwéretòotù [jaa Pwiduée]. Ba wà pàra tèpa *angela, ma Mikaéla, pwi ukai kàra, âna rà ipaa ma wà i pwi Dàragô ma tèpa duée[h] kêe. 8 Â rà piétò jiirà. Â rà tü còobé i Dàragô ma tèpa duée, gée napwéretòotù, 9 [~9~]boo naaniboo gòropuu.

(Napwa naa goo i pwi Dàragô maina bèepwiri, âna wàé kaa pwiri, wà i pwi dòèa gée na biu. Â nee, âna ‘Pwi a cicarajè’, é, *Caatana. Â wàé kaa pwiri, na é pwi a-ipa-imwüru tèpa âboro pitiri ê gòropuu.)

10 [~10~][Gée na càùru ê pai tûu kêe] â go têre ê pwâratùra na dau maina, naanidò gopaérenao, na ina pâ:

 
«Jèe tèepaa tòotù
[na jè tapacîri]!
É paari pàtàmee
wà Pwiduée kâjè!
Ée pa-udò ê Ba kêe!
É tòpò Mwaciri kêe,
naa tàrù târa pitûâ
kà pwi Mesia kêe!
Ba é tü tà Caatana,
pwi a piciapwâ goojè.
Ia é mu pitòtijè
naa jaa Pwiduée,
naa ne ma pwaa.
 é jèe tûu awé!
11 Rà jèe piétò jiié
wà tèpa béejè,
goro ê domii
kà *Pwi nari mutô;
goro ê popai
na rà *paâjupâra.
Ba càra caa piwâ,
na rà bà, ba kêe.
12 [~11~]Ipwàdée naa napwéretòotù!
Maagé côo naa gòropuu!
Au, wârigà co nawià!
É dau putàmu Caatana.
Ba é tûuboo dariwà.
 jèe ticè pàara kêe. Nabwé!»
É capwâri i tô ilàri wà Dàragô

13 É côoina wà Dàragô pâ, jèe tü têe boo naa gòropuu. Â é capwâri i tô ilàri[~12~], ba na é tubaèpà têe. Ba wà tôoni na ia é pitàmari i pwi âboro èpo. 14 [~13~]Êco na jèe naa tà tôoni, ê du wàraîri i marü bwaamata. Â é tâ jiié[~14~], naa namaré, wâna ê autâa, na jèe pwabwàti ba kêe. Â o ipièrù wâgooé, naawê, naa na âracié naja â gòobèreè[~15~].

15 Â i pwi Dàragô[~16~], âna é kòpi gée pwêe, pâ jawé na wâru, na pâ nau jèpé, ba na é wâri gò i tô ilàri. 16 Êco na é nye òmaa kaa ê napuu, â é namiri i jawé. 17 [~17~]Â é nye dau putàmu kaa i pwi Dàragô, naa goo i ilàri. Â é pâra nau ipaa, tà diri pàra tèpa naî tôoni—wà tàpé na rà pitêre dà Pwiduée, ma paâjupâra pâ, rà tèpa âboro kà Iésu[~18~].

18 Â nabwé, â é tà coo i pwi Dàragô wâ bàrawià.

<- Auinapàpari 11Auinapàpari 13 ->