SEREMAIA 5

Dipen Serusalem

1 Kumwail mehn Serusalem kan, kumwail tangseli nan amwail ahl akan!

Kumwail rapahki, kumwail pein rapahki

nan amwail wasahn netinet kan!

Ia duwe, kumwail kak diar aramas tehmen

me kak wia me pwung

oh song en loalopwoatohng Koht?

Ma kumwail kak diar, KAUN-O pahn ketin mahkohng Serusalem.

2 Mehnda ma kumwail kin kose me dene kumwail kin pwongih KAUN-O,

ahpw amwail lokaia kan me likamw.

3 KAUN-O kin ketin rapahki loalopwoat.

E ketin kalokei kumwail, ahpw kumwail pohnsehse;

e ketin kauweikumwailla, ahpw kumwail sohte men loalokongkihla.

Kumwail keptakaila oh sohte men sohpeisang dipamwail kan.

4 I ahpw medemedewe, “Ele ihte mepwukat me semwehmwe oh soaloalokong.

Re wiewia tiahk en pweipwei;

re sohte ese dahme kupwur en arail Koht,

dahme kupwur en KAUN-O ong irail.

5 I pahn kohla rehn me lapalap akan

oh lokaiaiong irail.

Re uhdahn ese dahme kupwur en arail Koht,

dahme kupwur en KAUN-O ong irail.”

Ahpw irail koaros soikalahr manaman en KAUN-O

oh sohte men peikiong.

6 Ih kahrepen laion en nanwel kan ar pahn kemehirailla;

kidilipes kan en nan sapwtehn pahn tehrirailpeseng,

oh lepard kan pahn alialuseli nan ar kahnimw kan reperepen mwenge.

Ma aramas pwuko pahn kohieisang nan ar kahnimw, re pahn teiteipeseng

pwehki diparail kan me nohn ngeder

oh re kalap sohpeisang Koht.

7 KAUN-O ketin keinemwe, “Dahme I pahn mahkikihong dipen nei aramas akan?

Re keseielahr

oh pwongihalahr koht likamw akan.

I kamwenge nei aramas akan lao re medla,

ahpw re wiewia dipen kamwahl

oh milahr rehn lihen netiki paliwararail kan.

8 Re duwehte ineng en oahs wol me kamweng mwahu kan,

emenemente kin inihnangih en mehn mpe eh pwoud.

9 Ia duwe, I sohte pahn kalokehkin irail wiewia pwukat

oh dupukohng wiewia suwed en soangen wehi me duwehte met?

10 I pahn kadarowei imwintihti kei pwehn kauwehla en nei aramas akan mwetin wain kan,

ahpw re sohte pahn kauwehla douluhl.

I pahn ndahng irail re en katipwasang rah kan,

pwehki kaidehn ahi rah pwuko.

11 Mehn Israel oh Suda kan

kahngohdiong ie mehlel.

Ngehi, KAUN-O, me mahmahsen.”

KAUN-O ketin Soikala Israel

12 Sapwellimen KAUN-O aramas akan soikalahr oh nda, “E sohte pahn ketin wia mehkot. Kitail sohte pahn diar apwal; sohte mahwen de lehk lapalap.” 13-14 Re nda me soukohp kan kin lokolokaiaiong nan wehwe oh sohte mahsen ehu kin sang rehn KAUN-O. KAUN-O, Wasa Lapalap, ketin mahsanihong ie, “Seremaia, pwehki aramas pwukat ar wiahier soangen koasoi kan, I pahn kupwurehda pwe ei mahsen kan en duwehte kisiniei nan owomw. Aramas akan pahn duwehte tuwi, oh kisinieio pahn isikirailla.”

15 Kumwail mehn Israel kan, KAUN-O pahn ketikihdo wehi ehu sang wasa doh pwe en mahweniong kumwail. Wehi ehu me kehlail oh me mieier sang kawa, wehi ehu me kumwail sehse eh mahsen. 16 Nah sounkesik ketieu kan sounpei dengngan kei me kin kamaramas ni sohte mahk. 17 Re pahn kangala amwail wahnsahpw akan oh kisin tungoal akan; re pahn kemehla noumwail pwutak kan oh serepein kan. Re pahn kemehla noumwail pelin sihpw kan oh kou kan, oh kamwomwala amwail tuhkehn wain oh tuhke pik kan. Neirail sounpei kan pahn kauwehla kelen kahnimw kelail kan me kumwail kin koapworopworki.

18 KAUN-O ketin mahsanih, “Ahpw ni rahn pwuko I sohte pahn kamwomwala douluhl nei aramas akan. 19 Eri, Seramaia, ni ar pahn kalelapak dahme I wiahkidahr mepwukat koaros, ke pahn ndahng irail me nin duwen ar sohpeisang ie oh papah koht en liki kan nan sapwarail, iei duwen ar pahn papah mehn liki kan nan sahpw ehu me kaidehn sapwarail.”

Koht ketin Kehkehlikiong Sapwellime Aramas akan

20 KAUN-O ketin mahsanih, “Ndahng kadaudok en Seikop kan, ndahng mehn Suda kan: 21 Kumwail rong, kumwail aramas pweipwei kan, me mie pwoaren mese, ahpw sohte kak kilang; me mie salenge, ahpw sohte kak rong. [~1~] 22 Ngehi me KAUN-O; a dahme kumwail sohte lemmwikin ie? Dahme kumwail sohte rerrerki mwohn silangi? I koasoanedier pihk pwehn wia irepen sehd, oh sehd sohte kak kotehla. Sehd pahn ngiringirisek, ahpw e sohte kak kotehla. Iloak kan pahn pwungupwungidek, ahpw re sohte kak kauwehla.[~2~] 23 Ahpw kumwail aramas akan! Kumwail me kahngohdi oh keptakai; kumwail sohpeisangieier oh keseielahr. 24 Kumwail sohte mwahn kin medemedewe kumwail en waunekin ie, mehndahte ei kin kadarewei keteu mwohn oh mwurin ahnsoun kopou kan, oh kihong kumwail ehu ahnsoun dolung wahnsahpw nan ehuehu sounpar. 25 Ahpw dipamwail kan kin irehsang kumwail soahng mwahu pwukat koaros.

26 “Aramas suwed kan kin kousoan rehn nei aramas akan; re kin wonohn awiawih duwehte aramas akan me kin kihdi uhk oh awiawih menpihr kan, ahpw re koasoanedier nair lidip kan pwe re en lidipih aramas akan. 27 Nin duwen sounkesik men eh kin audehkihla menpihr nan eh kisin kelen menpihr, iei duwen ar audehkilahr nan imwarail kan dipwisou kan me re adihada. Ihme re ahnekihki manaman oh kepwehpwe, 28 ihme re mworourouki oh mwenge mwahuki. Ar wiewia suwed kan sohte kak tokedi. Re sohte kin kihong en me sepwoupwou kan ar pwung de kihong en me milahr pahn kehnaudek ar pwuhng.

29 “Ahpw ngehi, KAUN-O, pahn kalokehkin irail mepwukat koaros; I pahn kauwong ei engieng pohn wehi wet. 30 Soahng kapwuriamwei oh suwed kowahlap ehu pweidahr nan sahpwo: 31 soukohp kan kin wia kokohp likamw; samworo kan kin kaunkihda wasa en soukohp kan ar koasoandi, oh nei aramas akan sohte kin kasapwunge irail. Eri, dahme re pahn wia ni imwilahn mepwukat koaros eh pahn leledo?”

<- SEREMAIA 4 SEREMAIA 6 ->