APOCALIPSIS 7

Reꞌ Wa̱n rikꞌor quibiral take wahxaklajcꞌahl ikꞌob (144,000) xcojoric quehtalil

1 Chiri̱j chic wili, xwilow woꞌ wach i quejeb chi raj tzꞌeꞌ wa̱ch i Dios reꞌ paꞌalque̱b china̱ i juꞌjun reh ricaj tzꞌuꞌc i wach acꞌal. Reꞌ take reꞌ cꞌahchiꞌ quipitim chi reꞌ take quejeb chi te̱w quiꞌoquic cho pan cajtzꞌuꞌc reh wach acꞌal maꞌ eta chic nquiyew cho quitewil je china̱ i haꞌ eh jeꞌ china̱ take che̱ꞌ cꞌaham. 2 Chiri̱j chic reꞌ, xwilow woꞌ chic jenaj raj tzꞌeꞌ wa̱ch i Dios reꞌ wilic ru̱cꞌ i cojbal ehtalil cꞌuhtbal reh chi reꞌ take cꞌacharel coꞌlomaj chic take ruꞌum i Dios reꞌ xa cꞌachlic woꞌ chi junelic. Reꞌ aj tzꞌeꞌ wa̱ch wili reꞌ xchalic ar reꞌ nelic cho wi̱ꞌ i kꞌi̱j jeꞌ wili xikꞌor chi cow queh take quejeb chi rich aj tzꞌeꞌ wa̱ch i Dios aj pitol take reh te̱w reꞌ xyeꞌeric woꞌ cajawric chi nacaꞌnam tiꞌcꞌaxic queh take wilque̱b wach acꞌal eh jeꞌ woꞌ wilque̱b pan haꞌ:

3 «Chawuyꞌej pe tak, ma̱ban pe tak tiꞌcꞌaxic wach acꞌal, jeꞌ woꞌ pan tak haꞌ eh jeꞌ woꞌ china̱ take che̱ꞌ cꞌaham. Chacoj pe tak quehtalil yejal quiwach take cꞌacharel quikꞌahsam qui̱b chiri̱j i ricamaj i kAja̱w Dios, cu reꞌ aj woꞌ ruꞌ na̱banam tak haj wilic kꞌoro̱j aweh tak, nqui queh. 4 Ar ajic chiri̱j chic rikꞌormojic reꞌreꞌ, xnibiraj chi reꞌ quiqꞌuihal take cojo̱j quehtalil xponic wahxaklajcꞌahl ikꞌob (144,000) take. Reꞌ take nicꞌ paꞌ qꞌuihal naquicꞌulum quehtalil reꞌreꞌ ar chi quixilac take cablaj chꞌuk chi tinamit tzꞌuhcrunak cho cu̱cꞌ take cablaj chi racꞌu̱n i maꞌ Israhel quichalic. 5 Reꞌ juntuhm chi cꞌacharel reꞌ juninak ikꞌob lajeb ikꞌob (12,000) take chi winak, aj ra̱ꞌ riꞌsil cho maꞌ Jurah take. Reꞌ take reꞌreꞌ naricojoric quehtalil quichꞌi̱l take juninak ikꞌob lajeb ikꞌob (12,000) chi winak jeꞌ ru̱cꞌ ra̱ꞌ riꞌsil cho maꞌ Ruwen take, quichꞌi̱l woꞌ take juninak ikꞌob lajeb ikꞌob chi winak (12,000) jeꞌ ru̱cꞌ ra̱ꞌ riꞌsil cho maꞌ Ca̱t take. 6 Jeꞌ woꞌ naricojoric quehtalil take juninak ikꞌob lajeb ikꞌob chi winak (12,000) jeꞌ ru̱cꞌ take ra̱ꞌ riꞌsil cho maꞌ Aser chꞌi̱l take juninak ikꞌob lajeb ikꞌob (12,000) chi winak ra̱ꞌ riꞌsil cho maꞌ Neptalih, quichꞌi̱l woꞌ juninak ikꞌob lajeb ikꞌob (12,000) chi winak jeꞌ ru̱cꞌ take ra̱ꞌ riꞌsil cho maꞌ Manases. 7 Jeꞌ woꞌ reꞌ take juninak ikꞌob lajeb ikꞌob (12,000) chi winak ra̱ꞌ riꞌsil take cho i maꞌ Simyon naricojoric woꞌ quehtalil chꞌi̱l take juninak ikꞌob lajeb ikꞌob (12,000) chi winak ra̱ꞌ riꞌsil cho maꞌ Lewih chꞌi̱l take juninak ikꞌob lajeb ikꞌob (12,000) chi winak ra̱ꞌ riꞌsil cho maꞌ Isacar. 8 Maꞌ xa reꞌ ta take reꞌ jeꞌ laꞌ woꞌ reꞌ naricꞌuluric cu̱cꞌ take juninak ikꞌob lajeb ikꞌob (12,000) chi winak ra̱ꞌ riꞌsil cho maꞌ Sawulon chꞌi̱l take juninak ikꞌob lajeb ikꞌob (12,000) chi winak ra̱ꞌ riꞌsil cho maꞌ Chep eh chꞌi̱l woꞌ take juninak ikꞌob lajeb ikꞌob (12,000) chi winak ra̱ꞌ riꞌsil cho maꞌ Wenjamin.

9 Chiri̱j chic i wili, xwilow wach juntuhm chic riqꞌuihal cꞌacharel. Kꞌe̱ꞌ woꞌ chic yohbal wach qꞌuihal take chi maꞌ woꞌ hab wach ta nak enchol cajaljic. Reꞌ take cꞌacharel reꞌreꞌ, cꞌul elenak take cho chi junsut tinamit wach acꞌal ru̱cꞌ rehreh wach jaꞌquil cꞌacharel. Jeꞌ woꞌ, maꞌ xa jenaj ta wach quikꞌorbal quikꞌoric wi̱ꞌ reh laꞌ chiꞌnchel juꞌjun chi kꞌorbal wilic ayuꞌ wach acꞌal. Chiꞌnchel riqꞌuihal tinamit reꞌreꞌ xwilow chi xa sak chic quisoꞌ eh chi xa suk chic quicꞌux cꞌahchiꞌ quicꞌuyuꞌsam i xak pacꞌ pan quikꞌab paꞌalque̱b cok chiwach i Dios reꞌ wilic chi kꞌatal kꞌoric china̱ chiꞌnchel eh jeꞌ woꞌ chiwach i Cꞌacharel rijalwachem ri̱b chi jenaj Qꞌuijol Me̱ꞌ. 10 Chi cunchelal aj take reꞌreꞌ, xa junkꞌoric chic take chi cow chi lokꞌonic ru̱cꞌ i bi̱ch wili:

“Reꞌ kacoꞌljic xkacꞌul i hoj xa reꞌ wach i kAja̱w Dios

reꞌ wilic rajawric chi kꞌatal kꞌoric

chꞌi̱l woꞌ i Cꞌacharel rijalwachem ri̱b chi jeꞌ jenaj Qꞌuijol Me̱ꞌ,

xa reꞌ wach take reꞌ xiyeꞌbic keh, nqui take.

11 Ar ajic naxkꞌormojic chi jeꞌ reꞌ, chiꞌnchel take raj tzꞌeꞌ wa̱ch i Dios paꞌalque̱b woꞌ cok ar xquixucꞌa̱ꞌ qui̱b eh xquilokꞌej wach i Dios. Reꞌ take reꞌ quisutem ri̱j i yeꞌa̱b riban wi̱ꞌ kꞌatoj kꞌoric i Dios chi richꞌi̱l cok i Cꞌacharel rijalwachem ri̱b chi jenaj Qꞌuijol Me̱ꞌ. Jeꞌ woꞌ, reꞌ take reꞌ quisutem woꞌ ri̱j take quejeb ricaꞌwinak chi winak reꞌ wilic quiwaꞌric jeꞌ ricab quiwaꞌric take rijeb tak winak eh jeꞌ woꞌ reꞌ take quejeb chi cꞌacharel reꞌ wilic nakꞌ quiwach chiqui̱j chi quiwach. 12 Jeꞌ aj wili lokꞌonic xcaꞌn:

“Til aj coric i kꞌoric wili chawi̱j i hat:

Chi junelic i kꞌi̱j sakom

xa reꞌ woꞌ hat til riraꞌil rinimal wach ajawric,

riraꞌil noꞌjbal, riraꞌil cuseꞌsbal, riraꞌil ansil

eh reꞌ woꞌ hat manlic wach kꞌatoj kꞌoric naꞌn.

Ruꞌum reh chiꞌnchel reꞌreꞌ, chacꞌul alokꞌil, chacꞌul alokꞌonjic

eh jeꞌ woꞌ chacꞌul atioxjic.

Chiꞌnchel take kꞌoric chawi̱j wili, til coric take, nqui take.

13 Chipam i juncꞌam reꞌreꞌ jenaj queh take quejeb ricaꞌwinak chi winak reꞌ wilic quiwaꞌric jeꞌ ricab quiwaꞌric take rijeb tak winak xiban wi̱n i pahkanic wili:

«Reꞌ take tinamit reꞌ sak quisoꞌ nawilow, hab woꞌ wach take pan acꞌux eh haj woꞌ xiꞌelic cho nanakꞌor i hat? nqui wi̱n.

14 Naxiban wi̱n i pahkanic reꞌreꞌ, jeꞌ wili xnikꞌor reh:

«Xa reꞌ woꞌ hat tehtꞌalanic reh ha̱w, quinqui reh.

Reꞌreꞌ jeꞌ wili xikꞌor wi̱n ru̱cꞌ pe̱t pahkanic:

«Reꞌ take cꞌacharel wili reꞌ aj reꞌ xicahnic chi sak wach i ca̱mna jeꞌ ricab sakil wach ncahnic i kasoꞌ nantzꞌajaric wach. Jeꞌ ricab riban i haꞌ chi reꞌreꞌ nbanic chi ncahnic chi sak wach i kasoꞌ jeꞌ woꞌ reꞌ xiban i Cꞌacharel reꞌ rijalwachem ri̱b chi jeꞌ jenaj Qꞌuijol Me̱ꞌ, xisakbej woꞌ wach i ca̱mna take cꞌacharel reꞌreꞌ naxichihcaj riquiqꞌue̱l chiqui̱j, nqui wi̱n.

Chiri̱j i pe̱t pahkanic xiban wi̱n, jeꞌ woꞌ wili xikꞌor wi̱n chiri̱j i ricab pahkanic xiban cho wi̱n:

«Reꞌ take reꞌ ar xiꞌelic cho chipam rinimal tiꞌcꞌaxic wilque̱b nak cho wi̱ꞌ. 15 Ruꞌum aj reꞌ xyeꞌeric kꞌab queh chi xiwihꞌic cok chiwach i Dios reꞌ wilic chi kꞌatal kꞌoric china̱ chiꞌnchel. Jeꞌ woꞌ, xyeꞌeric kꞌab queh chi ayuꞌ reꞌ nlokꞌonjic wi̱ꞌ i Dios xquikꞌahsaj qui̱b chi rilokꞌonjic wach i Dios chi maꞌxta riꞌorahil. Maꞌ xa reꞌ ta reꞌ, reꞌ Dios reꞌ kꞌatoj kꞌoric chic riban, xiyew kꞌab queh chi xiwihꞌic cok chipam i yeꞌa̱b ncꞌacharic wi̱ꞌ i Dios chi junelic i kꞌi̱j chi coꞌlomaj chic take. 16 Ar ajic maꞌ jaruj ta naquiwihꞌic chi maꞌxta quiwaꞌ quiha̱ꞌ, maꞌ woꞌ naquicꞌataric ruꞌum ritzꞌaꞌquil i kꞌi̱j eh xa ta nak naquicꞌram chic jenoꞌ tzꞌaꞌ. 17 Jeꞌ reꞌ nikꞌor maj reꞌ chic i Cꞌacharel reꞌ rijalwachem ri̱b chi jeꞌ jenaj Qꞌuijol Me̱ꞌ, reꞌ wilic woꞌ cok pan yejal reh lokꞌ laj yeꞌa̱b reꞌ wilic wi̱ꞌ i tzꞌuka̱b reh kꞌatbal kꞌoric, reꞌ chic reꞌ nilbic queh, jeꞌ ricab riban aj chaꞌjem me̱ꞌ chi ricꞌam je take rime̱ꞌ pan jenoꞌ ro̱k haꞌ chi encaꞌn quiha̱ꞌ reh chi naquitikim juꞌ chi suk quicꞌacharic. Jeꞌ woꞌ chic, jeꞌ ricab woꞌ nok jenoꞌ cꞌacharel njucꞌuric ri̱s nakꞌ wach chiri̱j chi okꞌic xiban ruꞌum tiꞌquil cꞌuxlis, jeꞌ woꞌ reꞌ kAja̱w Dios naresam lok tiꞌquil cꞌuxlis cu̱cꞌ take cꞌacharel reꞌreꞌ, nqui wi̱n.

<- APOCALIPSIS 6 APOCALIPSIS 8 ->