LOS HECHOS 8

Saulo vaningaconhe chojni que vaguitticaon Jesús

1 Co Saulo cai anto ché ixin Esteban ndavenhe.

Co ẍajeho nchanho que Esteban ndavenhe anto tsje chojni coexinhi joinchehe feo ngain chojni que vaguitticaon Jesús ngain Jerusalén. Co cainxin na chjequé na sacjoi na ngain ngoixin nonttehe Judea co nonttehe Samaria. Joho nirepresentanté Jesús sacjoixinha na de Jerusalén. 2 Co canxion xí que anto jian vaguitticaon xa ngain Jesús cjoavá xa cuerpoe Esteban co anto tsjangaxin xa Esteban. 3 Co tiempo mé Saulo anto feo vanchehe ngain chojni que vaguitticaon ngain Jesús, hasta vaguixinhi nchiandoha na para vagantsje xí co nc̈hí co vaquianganji na co vaquiaxinhi na ngain cárcel.

Are chojní Jesús nichja tti jian joajna ngain nonttehe Samaria

4 Pero chojni que vac̈hjexin de Jerusalén, ngoixin tti vacji na, vandache na icha chojni tti joajna que danjo iná vida naroa. 5 Ná de jehe na que vac̈hjexin de Jerusalén vinhi Felipe, co jehe cjoi ngain ná rajna nonttehe Samaria co coexinhi ndache chojni nttiha de ixin Cristo. 6 Co chojni nttiha vaquinhi na jian tti vandac̈ho Felipe. Co jehe na vaguicon na cain milagro que jehe vanchehe conixin joachaxín Dios, 7 ixin tsje chojni que vechonda espíritu jianha vagac̈hjehe na cain tti jianha mé, co espíritu jianha mé vacoyao are vagac̈hjexin de ngain na. Co tsje chojni que c̈hoha vaquingui co chojni que c̈hoha vacji cai vacoẍoenhe na. 8 Mexinxin ngain rajna mé chojni anto vaché na.

9 Pero nttiha cai vehe ná xí que vinhi Simón. Icha saho jehe xa vehe xa ná ttoso ngain rajna mé, co jehe xa vancheyehe xa co vancheẍaon xa chojni nttiha ngain nonttehe Samaria. Co vandac̈ho xa ixin jehe xa ná chojni anto importante. 10 Niyeye co ninchinnchin, cainxin na anto jian vaquinhi na tti vandac̈ho xí mé co vandac̈ho na:

―Xí yá tti chonda jie joachaxín Dios.

11 Co cain na anto vaquinhi na tti vandac̈ho xí mé ixin jehe xa vancheyehe xa na conixin joattosohe xa anto sé tiempo. 12 Pero are Felipe ndache na tti jian joajna de ixin queẍén Dios ttetonha co de ixin nombré Jesucristo, are jehe nichja jañá, anto tsje chojni, xí co nc̈hí vitticaon na co joiguitte na. 13 Co cai Simón vitticaon co joiguitte. Cottimeja jehe vacao Felipe. Co anto vagoan admirado are vicon tsje milagro co señal que vanchehe chojní Jesucristo.

14 Are mé cain nirepresentanté Jesús ẍa vintte na Jerusalén. Co are jehe na conohe na ixin chojni Samaria vitticaon na joajné Dios, rroanha na Pedro co Juan nttiha. 15 Co are cayoi nimé joiji na nttiha, joinchetsenhe na ñao Dios que jehe rrorroanha Espíritu Santo ngain chojni que vitticaon Jesús nttiha Samaria 16 ixin ẍa joiha Espíritu Santo conixin joachaxin ngain ni ná na, ixin jeho joiguitte na de ngain nombré Jesús. 17 Cottimeja Pedro co Juan coín rá ngataha já na co jañá joí Espíritu Santo ngain na conixin joachaxin.

18 Co are Simón vicon ixin Espíritu Santo ttí ngain chojni are nirepresentanté Jesús vaquín rá na ngataha já na, jehe joinchenttoxinhi na tomi 19 co ndac̈ho:

―Chjana ra janha joachaxin yá cai, para que are janha cai tsín rana ngataha já quexeho chojni, Espíritu Santo tsí ngain jehe na conixin joachaxin.

20 Cottimeja Pedro ndac̈ho ngain:

―Dios sinttatján jaha conixin tomia cai ixin jaha ẍaxaon que tti danjo Dios nchao sina conixin tomi. 21 Jaha jiquininxinha sinchehe ẍa jihi ixin ansean jeha jian ngain Dios. 22 Ttendoenhe ñao cosa jianha jihi, co nchetsenhe ñao Dios para ver si jañá sinttatjañaha tti jaha ẍaxaon ngain ansean. 23 Janha chonxin ixin jaha anto tonchjoaha co ansean jianha, co cain cosa jianha yá tti tanc̈hjandaha jaha para ttinxin tti jian.

24 Cottimeja Simón ndac̈ho:

―Nchetsenhe ra ñao Dios para ixin janha para ẍonhi tsonna de ixin tti jaha ra ndachjenji ni ra.

25 Cottimeja Pedro co Juan ndache chojni nttiha quehe joinchehe Jesús are vacao na. Co cai jehe na nichja na palabré Dios. Cottimeja sacjan na para Jerusalén, co are ngatja nttiha, nichja na tti jian joajné Jesucristo ngain tsje rajna ngain nonttehe Samaria.

Felipe co ná xí de Etiopía

26 Are joexin cain yá, ná angél Dios, tti chonda cain joachaxin, ndac̈ho ngain Felipe:

―Dingattjen co sadingajin ngain nttiha que xincajinxin de Jerusalén para Gaza.

Nttiha mé datto nttia lugar tti ẍonhi chojni te. 27 Felipe vingattjen co sacjoi. Co ngatja nttiha mé vetanxin ná xí de nación que dinhi Etiopía. Xí mé vechonda xa tsje joachaxin ngain nc̈hí que vaquetonhe nación mé. Co nc̈hí mé vinhi nc̈ha Candace. Xí mé tti venda cain tomí co cosé nc̈hí mé. Co jehe xa cjoi ná xí eunuco ixin ẍonhi chjan vechonda ni ẍonhi nc̈hí vecao xa. Dicji xa ngain Jerusalén para joinchesayehe xa Dios. 28 Co nchanho mé sajicjan xa para ngain nonttehe xa jingá xa carro que ttinganji conxin co jitjao xa ẍón que dicjin profeta Isaías. 29 Cottimeja Espíritu Santo ndac̈ho ngain Felipe:

―Tonchienhe tti jí carro jiha co tato tti jidicao carro.

30 Co are Felipe conchienhe nttiha, coinhi ixin xí mé jitjao xa ẍón que dicjin Isaías. Felipe joanchiangui ngain xa co ndac̈ho:

―¿Attinxin quehe rroc̈ho ẍón que rritjao?

31 Co xí mé ndac̈ho xa:

―¿Queẍén janha tsianxin, si ẍonhi quensen ndachjenji na quehe rroc̈ho?

Cottimeja joinchetsenhe xa ñao Felipe ixin tsani carro mé co sehe ngaca xa.

32 Co tti parte de tti jitaxin Palabré Dios que jitjao xa, mé ndac̈ho:

Joicao na joigoen na inchin are doen na ná coleco, jamé savicao na jehe.

Co jamé inchin corregochjan tencoa va are cjinhi na va,

jamé jehe cai conxireha rroha.

33 Icha chojni cjoanoa na jehe co anto feo joinchehe na ngain masqui ẍonhi tiempo jehe joinchehe cosa jianha.

Co de chojní jehe, ¿quensen nchao rronichja?

Ixin jehe na nagoenxon na are jehe vehe ngataha nontte jihi.

34 Co xí mé joanchianguihi xa Felipe co ndac̈ho xa:

―Ndachjenji na nttatsanha ñao, ¿de ixin quensen ndac̈ho Isaías? ¿Ade ixin jehe o de ixin iná chojni?

35 Cottimeja Felipe coexinxin nichja de ixin lugar de Palabré Dios tti jitjao xí mé. Cottimeja jehe ndac̈ho ngain xa tti jian joajné Jesús. 36 Co are jidattocaho xa ngain ná lugar tti jí jinda, ndac̈ho xa ngain Felipe:

―Nttihi jí jinda. ¿Ac̈hoha siguittexin na nttihi?

37 Felipe ndac̈ho ngain xa:

―Si ndoa ditticaon jaha, nchao.

Co jehe xa ndac̈ho xa:

―Ditticanho que Jesucristo ján Xenhe Dios.

38 Cottimeja xí mé coetonha xa ixin coengattjen na carro mé, co cayoixin na vania na co sacjoi na para ngain jinda; co Felipe joincheguitte xí mé. 39 Co are vac̈hjenguixin na de jinda, Espíritu Santo que Jesús rroanha sajoicao Felipe. Co xí mé icjanha xa vicon xa Felipe, pero sacjoi xa noxon nttiha jiyá xa co anto ché xa. 40 Co rato mé Felipe ẍago ngain rajna que dinhi Azoto, co sacjoi de rajna co rajna para ndache chojni tti jian joajna hasta joiji ngain ciudad de Cesarea.

<- LOS HECHOS 7 LOS HECHOS 9 ->