Revelation 7

Israelkunu Tjuṯa Nampa 144,000

1 Nyangangka maḻangkaṉa nyangu angelpa kutjara kutjara ngaṟanyangka, panya paluṟu tjana ngaṟangi nganytjarta kutjara kutjara, kutju kakaraṟa, kutju wiluṟara, kutju uḻpaṟira, munu kutju alinytjara. Munu paluṟu tjana waḻpa markuṟa anga-kanyiningi waḻpangku manta uṟu puṉu kuḻu puḻkaṟa uritjingantjaku-tawara.

2 Kaṉa ma-nyangu angelpa kutjupa ngalya-wirkankunyangka kakaraṟanguṟu. Ka paluṟu maṟangku kanyiningi puṉu walkatjunkupai Godalu ungkunytja, panya aṉangu Godaku tjukurta wangaṉarangku kulilpai tjuṯangka ngalyangka walkatjunkunytjikitjangku. Munu paluṟu wangkangu angelpa panya 4-palangka waḻpa kuwaripangku anga-kanyinnyangka, panya Godalu tjananya witulyanu manta uṟu kuḻu uritjingaṟa kurantjaku. Alatji angelpa panya paluṟu tjananya wangkangu, 3 “Wanyu kuwaripa paṯala! Manta, uṟu, munu puṉu kuḻu wantima kurantja wiyangku, kaṉa Godala wangaṉarangku kulilpai tjuṯangka-waraṟa ngalyangka walkatjunkuku.” Munu mulapaṯu tjanala ngalyangka walkatjunu Godaku tjukurta kulilpai tjuṯangka.

4-8 Kaṉi kutjupangku tjakultjunu, “Aṉangu nyanga paluṟu tjana Israelku katja panya 12-nguṟu tjuṯa mulapa nampa nyangatja 144,000. Panya 12,000 Judah-languṟu, 12,000 Rupintanguṟu, 12,000 Kaatalanguṟu, 12,000 Atjalanguṟu, 12,000 Napatalilanguṟu, 12,000 Manitjalanguṟu, 12,000 Tjimiyantanguṟu, 12,000 Levilanguṟu, 12,000 Itjakalanguṟu, 12,000 Tjipulantanguṟu, 12,000 Josephalanguṟu, munu 12,000 Pintjimantanguṟu. Nyanga palula tjanala angeltu ngalyangka walkatjunu Israelkunu tjuṯangka.”

Aṉangu Winki Tjiya Wiṟungka Kuranyu Ngaṟanytja

9 Munuṉa palula maḻangka nyangu aṉangu winki mulapa mungilyi ngaṟanyangka watingku puṯu kantamilaṟa wiyantjaku. Paluṟu tjana ngura kutjupa kutjupa tjuṯanguṟu pitjala ngaṟangi tjaa kutjupa kutjupa, manta kutjupanguṟu kutjupanguṟu, miṟi kutjupa kutjupa. Munuya pitjala ngaṟangu tjiya wiṟungka Lamalamangka kuranyu mantara piṟantjara munuya maṟangku kutjungku kutjungku kanyiningi parka waṟa puṉu taitanguṟu. 10 Palunyatjanungkuya mirara wangkangi alatji,

“Godalu tjiyangka nyinanytjalu Lamalamangku kuḻu nganaṉanya wankaṟunu.

Kala palunya pulanya tiṯutjarangku alatjiṯu mirawaṉira waḻkulku.”

11 Kaya tjiya panya wiṟu palula angelpa tjuṯa para-arintaṟa ngaṟangi, ka kuka panya nyaḻpitjara 4 munu tjiḻpi panya 24 kuḻu tjungu nguṟurpa ngaṟangi tjiya panya palula itingka. Kaya angelpa uwankarangku waṯungaṟakatira Godanya waḻkuningi, 12 munuya wangkangi,

“Mulapa Godalu aṉangu tjuṯa wankaṟunu.

Paluṟu panya wiṟu alatjiṯu nyinanyi palya mulapa, munu witulya pitalytji puḻkanya, kulintja tjukaṟurunya.

Kala nganaṉa nyuntumpa pukuḻarira nyuntunya rawangku alatjiṯu mirawaṉira waḻkuṉi,

panya Godanya alatjiṯu tiṯutjara nyinapainya.

Uwa mulapa.”

13 Kaṉi tjiḻpi kutjungku tjapinu, “Ngananya tjanaya nyanga mantara piṟanpatjara? Yaaltjinguṟu nyanganpa pitjangu?”

14 Kaṉa ngapartji palula wangkangu, “Wiya, kuwari kutjuṉa nyanganyi ngurpangku. Tjinguṟu nyuntu ninti.”

Kaṉi paluṟu wangkangu, “Aṉangu nyanga palunya tjananya panya aṉangu kutjupa tjuṯangku pikangku tiṯutjarangku kuraningi, kaya nyanga paluṟu tjana Jesunya wantinytja wiyangku tiṯutjarangku waṉaningi munuya wankaringkulalta ngaṟanyi. Munuya Lamalama ilura milkaḻi tjutinytjanguṟu mantara piṟanpatjara nyinanyi palumpa milkaḻingka paltjiṟa piṟanmankunytja. 15 Pala palulanguṟuya ngaṟanyi Godaku timpulangka palumpa tjiyangka kuranyu munuya palunya tiṯutjarangku waḻkuṉi mungangka kaḻaḻa.

“Ka tjiyangka nyinanytjalu tjananya aṯunymaṟa kanyini munu tjanala tjungu tiṯutjara nyinanyi. 16 Kaya tjana piṟuku paḻtjatjiratjarinytja wiya kapi iluringkunytja wiya kuḻu nyinaku tiṯutjara. Ka tjananya piṟuku tjiṉṯungku kuḻingku kuḻu kampanytja wiyaringkuku.

17 “Panya Lamalama nyara tjiya wiṟungka nguṟurpa nyinanyi, nyara paluṟu tjanampa tjapata nyinanyi munu tjananya wiṟuṟa aṯunymaṟa kanyilku panya tjapatangku tjiipi tjuṯa kanyintja puṟunytju. Panya tjapatangku tjiipi kapikutu katipai, tjikiṟa wanka nyinanytjaku, palu puṟunypa paluṟu tjananya aṯunymaṟa kanyilku tiṯutjara wanka nyinanytjaku. Munu paluṟu tjananya pukuḻpa mulapa tiṯutjarangku kanyilku piṟuku ulanytjaku wiya. Kaya ulanytja wiya paluṟu tjana tiṯutjara pukuḻpa alatjiṯu nyinaku.”

<- Revelation 6 Revelation 8 ->