Yipuru wangkapayiku 4

1-2 Katutjalu nganaṉanya watjara tjangkuṉu ngurra palyangka nyinatjunkukitjangku. Nganaṉa tjukarurru kutu palumpa nyinanytjaku, ngula ngurra palula nyinakitja. Muutjalungarri palula tjanala Katutjaku wangka tjakultjunkunytjala tjana kulira wantipayi. Wiya Katutjanya tjanampa yunypa nyinapayi. Nganaṉaṯarra Katutjaku wangka Yiitjunyatjarra kulira palulawana tjukarurru kutu nyinanytjaku. 3 Palumpa wangka kulira walytjarringkupayi tjuṯa kutju Katutjaku ngurrangka kana kutu nyinaku. Yalatji Katutjaku wangka yirriṯi tjunutja ngarrinyi,

“Ngayulu tjananya ngurrkurringkula yalatji watjaṉu, ‘Wiya nyurrangarri ngayuku ngurrangka kana kutu nyinaku, wiya.’ ”

Katutjalu panyapa yurrunpa watjaṉu, manta ilkariṯarra palyaṉutjangku ngurra palumpaṉungka waarrkawiya nyinakitjangku. Paluru yunytjurringkupayi, yaṉangu tjuṯaṯarra ngurra palula tjungu nyinanytjaku. 4 Katutjaku wangka yirriṯi tjunutja yalatji ngarrinyi,

“Waarrka tiṉa tjiṉṯu tjikitjipala palyara Katutjanya purrkarringkula waarrkawiyalpi nyinangu.”

5 Wangka kutjupa yirriṯi tjunutja yalatji ngarrinyi,

“Nganaṉa wiya tjungu ngurra palyangka nyinaku. Ngayulu tjananya wantiku, ngurra palula nyinatjunkunytjawiyangku.”

6 Wangka panyapa watjara Katutjanya kutu yunytjurringanyi yaṉangu tjuṯa ngurra palyangka nyinatjunkunytjaku. Yurrunpa nyinapayi tjuṯangkuya Katutjakuṉu wangka kulira wantingu, tjana wiya ngurra palyangka Kayinanala nyinapayi. 7 Palunyatjanu Katutjalu Tapitanya nintiṉu wangka palunya nguwanpa watjantjaku yalatji,

“Katutjaku wangkanyurra kuwarri kulira tjukarurru nyinanytjaku, wiyanyurra kulira palumpa wangka wantinytjaku.”

8 Yirriṯi Tjatjuwalu wiya tjananya yaṉangu tjuṯa katirra Katutjaku ngurrangka nyinatjunkupayi. Katutjalu kutju yaṉangu tjuṯa palumpa ngurrangka nyinatjunkupayi. Paluru ngulalpi watjaṉu palunya tjananya ngurra palula nyinatjunkukitjangku. 9-10 Katutjanya kutu yunytjurringanyi, palumpa walytja tjuṯa ngurra palyangka nyinatjunkukitja. Paluru tjana palumpa waarrka mantawana palyara wiyantjala Katutjalu tjananya palumpa ngurra palyangka nyinatjunku. Yalatji nguwanpa Katutjalu manta ilkariṯarra tjiṉṯu tjikitjipala palyara palumpa ngurrangka waarrkawiyalpi nyinangu. Yalatji palumpa waarrkana tjuṯa palyalpi nyinaku palumpa ngurrangka.

11 Nganaṉa tjukarurru kutu palumpa waarrka palyantjaku, yirriṯi nyinapayi tjuṯa nguwanpa munupinarringkula wantinytjawiyangku. Paluru tjana munupinarringkula Katutjaku wangka kulira wantipayi. Nganaṉaṯarra wiya palumpa wangka kulira wantinytjaku.

12 Katutjaku wangka tjakultjunkunytjala nganaṉa kulira yalatji kuliṉi, “Katutjaku wangka paluru ilta ngaranyi. Wangka paluru nganaṉanya tjukarurrungkula pukuḻmankupayi, wangka palulawana nganaṉa tjukarurrulpi nyinanytjaku. Nganaṉa wiyawana palyalkitjangku kulintjala Katutjaku kurrunpangkulanya nintingku kuliṉi. Nganaṉa wiyawana nyinanytjala palurulampa ninti nyinanyi.” 13 Yaṉangungku pinangku kulintjala Katutjanya ninti nyinanyi. Katutjalu yuwankarra kulira nyakupayi, yaṉangu kurrunpaṯarra. Yaṉangungku puṯu kulilpayi nganaṉa ngunytji watjantjala, Katutjala nganaṉa ngula kuutawutjungka puṯu kulilku ngunytji watjalkitjangku. Palurulanya uwankarra nyakula nintingku kuliṉi. Nganaṉa wangka tjukarurru kutju palula watjalku.

Yiitju Kurayitjanya nganampa tuḻkuku mayutju tiṉa nyinanyi

14 Katutjaku katja Yiitju Kurayitjanya tuḻkuku mayutju tiṉa nganampa nyinanyi. Paluru ilkarikutu yankula Katutjalawana nyinanyi nganampa tjapilkitja. Yalatji kulira nganaṉa tjukarurru kutu palumpa nyinanytjaku. 15 Yiitju paluru nganampa aḻṯurunytju ilta nyinanyi. Paluru kuliṉi, “Mamungku, kuya palyalpayi tjuṯangkuṯarra ngayunya tjingapungkupayi kuya palyantjaku. Ngayuku walytja tjuṯaṯarra mamungku, kuya palyalpayi tjuṯangkuṯarra tjingapunganyingka ngayulu tjananya yaṉṯayaṉṯalku kuya tjuṯa tjana palyaltjipingkamarra.” Mamungku, kuya tjuṯangkuṯarra Yiitjunya tjingapunganyingka wiya paluru kuya palyalpayi, tjukarurru kutu paluru nyinapayi. 16 Paluru walytja nganampa tuḻkuku mayutju tiṉa nyinanyingka, nganaṉa nguḻuwiyangku Katutjanya tjapintjaku. Nganaṉa tjapintjala, paluru nganaṉanya aḻṯururringkula yaṉṯayaṉṯalku.

<- Yipuru wangkapayiku 3 Yipuru wangkapayiku 5 ->