HEBREWS 2

An g wo uꞌukchid g Jiosh haꞌichu ahga

1 Neh, wehs ihda o ab t‑chehgidch mo g Jiosh alidag wehs dahm g e‑nahtoi. Kutt heg hekaj ab wo si t‑uꞌukchid id ab s‑kehg haꞌichu ahgaj matt kah ch pi gam hu hab wo i t‑juh ab amjed. 2 Pi ash d Jiosh alidag ch d wabsh anghil matsh wa ia uꞌapa g Jiosh haꞌichu ahga heki hu. Tsh wabshaba s‑koꞌokam bei g e‑namkidadag hegam mash pi ab hu ha kaiham. 3 Sh eda d si alidaj g Jiosh hegai matsh hemu ia uꞌapa g haꞌichu ahgaj. Kutt hemho wa ab wo kaihamad. Am o t‑tashogid g doꞌibiadag. Kutt pi has masma wo t‑doꞌibia ab amjed g s‑koꞌok t‑namkidadag matt pi ab hu wo kaihamad.

Hegam matsh ab kah g Jiosh alidag o s‑ap am t‑ahgid ihda haꞌichu ahgaj matsh ia uꞌapa. 4 K g Jiosh hab ha junidahim g s‑hasig haꞌichu ch hekaj am wohokamchud g haꞌichu ha ahga. K g Hekia S‑apꞌekam Gewkdag ab t‑mahkch g gewkdag mach hekaj hab wua g nahnko mahs i wehmtadag ch i gewkemhunadag ab aꞌai t‑wui.

T‑doꞌibiakam o am i t‑wanimed

5 Pi ash d anghil mas g Jiosh am i ha chuhcha mat am wo himchudad g kownaltaligaj. Dach ahchim hemajkam. 6-7 Neh, an o hebai hab chuꞌig Jiosh oꞌohana ed mash hema hab kaij ab Jiosh wui:

Ni‑Jioshga, dach wabsh al hemajkam maptsh ia wabsh t‑shul mattsh am wo ha wechokad g anghil heꞌes i tash.

Pi oki hab chum chuꞌig maps ab wo has t‑elidad ch wo t‑dagioꞌidad.

Ptsh eda ab wo si t‑hahaꞌichuchud k ab wo t‑mah g si s‑kehg s‑has haꞌichudag

8 k am wo i t‑chuhcha wehs haꞌichu dahm. Psalm 8:4-6

Neh, bo chuꞌig g Jiosh oꞌohana ch hab d ahga mat wehs g Jiosh nahtoi am wo ha wechokad g hemajkam. Pi o hab chuꞌig idani. 9 Kuch wabshaba s‑mahch matsh heki hu i shonwua ab Jesus amjed matsh hab wo e juh. Heg atsh wa i e jumalkad k t‑wepo e juh k heꞌes i tash ha wecho g anghil ch chum hems e dagito muhkig wui am wehs t‑wehhejed. Id o d Jiosh hab elida no pi si s‑t‑hoꞌigeꞌid. T g Jiosh heg hekaj ab si haꞌichuchud k an dai mat d wo t‑kownaligk.

10 Wehs haꞌichu o d Jiosh nahtoi ch wehhejed an hab chuꞌig. T heg si s‑hemajim am i apꞌech mat g Jesus wo e shoꞌigchud k hekaj wo t‑doꞌibia matt d wo aꞌaligajk ch am hahawa chum hekid wo wehmajk si s‑kehg kihdaj ed. Jiosh hab elida o wehs s‑apꞌe. 11 Pegih, tsh hab wa masma ab i t‑gawulkai g Jiosh alidag matt hab waꞌap d wo Jiosh aꞌaligak ch pi wo ha chuꞌijigk. Kush heg hekaj pi shaꞌi e elid mat hab wo t‑aꞌagad ‘ni‑wepnag.’ 12 An o hab chuꞌig Jiosh oꞌohana ed mash g alidaj s‑t‑nawojimk ch hab ahg g Jiosh:

Bant wo ha aꞌagad mo d ni‑wepnag hegam mat ab wo s‑m‑wohoch am i kahk g haꞌichu ni‑ahga.

Amt ant ha shahgid ab wo m‑hehgchulidad. Psalm 22:22

13 Kush hab ep kaij:

Ab ant hab wabsh masma wo s‑m‑wohochudad mo g m‑hemajkamga. Isaiah 8:17

K an ep oꞌohadag matsh ia wo jiwia k wo ha wehmajk ch hab wo ah:

Idam o d Jiosh aꞌaliga.

Kut am ni‑nuhkudach. Isaiah 8:18

Neh, bash kaij ch hab t‑aꞌaga ‘Jiosh aꞌaliga.’

14 Kush eda g Jiawul edgid g gewkdag mat ab wo t‑abch g t‑chuꞌijig matt hekaj gam hu hab wo i t‑juh ab amjed g Jiosh. Tsh wabshaba g Jiosh alidag t‑wepo e juh mat hekaj s‑ap ab wo bei g s‑koꞌok t‑namkidadag k wo hugio g Jiawul gewkdag mat hahawa pi wo e nako mas gam hu hab wo i t‑juh ab amjed g Jiosh. 15 Jiosh alidag atsh gewito g Jiawul am t‑wehhejed. Kutt heg hekaj pi wo ehbidad g muhkig.

16 Pi ash d anghil mas g Jiosh wo ha doꞌibia. Dach ahchim hemajkam mach ab s‑wohochud. 17 Tsh heg wa hekaj am t‑wepo e juh k t‑wepo masma ia oimmelhim ch haꞌichu nakog. Bat waꞌi masma s‑ap d wo t‑uhgchu pahligk ch ab wo s‑t‑hoꞌigeꞌidad ch gam hu hab wo i juh g t‑chuꞌijig am wehhejed g Jiosh. 18 Jiawul o chum t‑chehani matt hab wo juh g pi apꞌekam. K wabshaba g Jesus s‑ap e nakog mat am wo i t‑gewkemhunad nash pi hab waꞌap nakog mash wa g Jiawul chum chehani g pi apꞌekam.

<- HEBREWS 1 HEBREWS 3 ->