1-33 Nyangka Mama Kuurrtu Mawutjala watjarnu tiinti miirl-miirlpa pupatjunkutjaku. Palunyalu watjarnu puuka miirl-miirlpa-ya kaninytjarra tjarrpatjunkutjaku. Tjiinya puuka kaninytjarra yapu walu kutjarra ngarrirranytja Mama Kuurrku wangka 10-tjarra. Nyangka Mama Kuurrtu watjarnu warntu walykumunu waraly-waralytjunkutjaku puuka miirl-miirlta kalkurni. Palunyalu watjarnu tayipulpa nyuma tjunkupayinya katirra tjunkutjaku, puru lantanpa tili 7-tjarra katirra tjunkutjaku.
34 Nyangka ngangkarli wirrmiralu pitjangu tiinti miirl-miirlnga tjutura kanyiranytja. Nyangka tili purlkanyalu yutira kanyiranytja tjiinyamarntu Mama Kuurrnga nyinarranyangka. Nyangka-ya purtu nyakulanytja. 35 Palunyanguru Mawutjanya tiinti palunyangka purtu tjarrpangu wantingu. 36 Nyangka ngangkarli palunyalu Yitjurayilku tjamupirti-tjananya parrakatirrayintja. Tjiinya-ya yungarra pakalkitjamunu. Ngarna ngangkarli tiintinguru pakannyangka-ya pakalku yalatjarringkula kutipitjapayi. 37 Nyangka ngangkarli tiintingka ngaralanyangka-ya ngurrangka nyinama. 38 Tjiinya-ya ngurra kutjupa-kutjupaku yalatja mapitjalayintjalu karlarla nyaku Mama Kuurrku ngangkarli tiintinguru ngaralanyangka. Palunyalu-ya mungangka nyaku tili warupirinypa kamparranyangka.