—De milajka, de milajka nomechilia: Ne n kaltentli kan ik kalakih n ichkameh. 8 Nochteh akimeh owalajkeh achto de Ne, okatkah ichtekeh iwa tekajkayajkeh. Pero n ichkameh mach okintenkakeh. 9 Ne n kaltentli, akin kalakis itech non kaltentli non Ne nonewia, momakixtis. Kalakis iwa kisas iwa kajsis tlan kikuas.

10 'N ichtek sanwel wits para tlachtekis, para temiktis iwa teixpolos. Pero Ne oniwala para nochteh n tlakah makipiakah yolílistli, iwa non yolílistli mamomiakili itech inyolo. 11 Ne nikuali tlájpixki. Se kuali tlájpixki kinmokuitlawia iichkawah, maya makimiktikah. 12 Pero se akin san tetlajpialia iwa amo iaxkawah n ichkameh, ijkuak kita wits n koyotl kinkakajtewa n ichkameh iwa choloa. Ijkuakó n koyotl kinkitskia sikimeh, iwa oksikimeh kinxijxitinia. 13 Ijkuakó non tetlajpialia choloa porke amo kintekipachoa n ichkameh sanwel itlaxtlawil.

14 'Ne kuali ni tlájpixki, iwa nikinmixmati akimeh noichkawah, iwa yejwah nechixmatih. 15 Ijkó kemi Notajtsi nechixmati iwa Ne nikixmati Notajtsi, iwa niktemaka noyolilis por noichkawah. 16 Noiwa nikimpia oksikimeh ichkameh, non amo kateh ijtik nin korral. Iwa moneki nikualinwikas noiwa. Yejwah nechtenkakiskeh, iwa nochteh yetoskeh sansikah, iwa yetos san se tlájpixki.

17 'Yika Notajtsi nechtlasojtla, porke nonewia niktemaka noyolilis, para ijkó satepa oksepa nimoyolitis. 18 Amaka weletis nechkixtilis noyolilis, yej Ne nonewia niktemaka. Ne weletis niktemakas noyolilis, iwa oksepa nikselis. Ye ni tlan onechnawati Notajtsi.

19 Ijkuak n tlayakankeh judíojteh okikakeh nin tlájtoli, oksepa omoxexelojkeh. 20 Sikimeh okijtoayah:

—Nin tlakatl kipia se demonio iwa yokuatlapolo. ¿Tleka nonkikakih?

21 Pero oksikimeh okijtoayah:

—Akin kipia se demonio mach ijkó tlajtoa. Se tlakatl non kipia se demonio mach weletis kintlapolis ixtololowah non amo tlachiah.

—¿Asta kemania san titlamatoskeh akin te? Sansemi techili tla te ti Cristo.

25 Jesús okinnankili:

—Ne yonomechili, iwa nomejwah amo nonnechneltokah. Nochi tlan Ne nikchiwa, nikchiwa ika iweletilis itoka Notajtsi iwa kinextia Ne Ni Cristo. 26 Pero nomejwah amo nonnechneltokah porke amo noichkawah. 27 Noichkawah nechtenkakih, iwa Ne nikinmixmati, iwa yejwah witseh nonawak. 28 Ne nikchiwa mayolitokah nochipa, iwa ayik moixpoloskeh, iwa amaka weletis nechinmakixtilis. 29 Notajtsi Akin onechinmaktili noichkawah, Ye okachi kipia weletílistli iwa amo onka ok se kemi Ye, iwa amaka weletis kinmakixtilis. 30 Ne iwa Notajtsi tiseititokeh.

31 Ijkuakó n tlayakankeh judíojteh oksepa okonintilankeh temeh para kimotlaskeh. 32 Jesús okinmili:

—Nomoixpa nikchijtiwits miak tlamawísoli ika iweletilis Notajtsi, ¿katlie ika nonkinekih nonnechmojmotlaskeh ika tetl?

33 N tlayakankeh judíojteh okinankilijkeh:

—Amo timitsmojmotlaskeh ika tetl por tlan kuali yotikchi, yej por tikixpanawia Dios ika tlan tikijtoa. Te san titlakatl iwa timotenewa ti Dios.

34 Jesús okinnankili:

—Itech nomotlanawatilis ijkí ijkuilitok: “Ne onikijto nomejwah nondiosmeh.” 35 Tikmatokeh tlan kijtoa itlajkuilol Dios amo weletis se kipatlas; iwa Dios okínnotski diosmeh akimeh okiselijkeh itlajtol. 36 Iwa tla Dios onechpéjpenki iwa onechaltítlanki itech nin tlaltíkpaktli, ¿kenomi nonkijtoah Ne onikixpanawi porke onikijto Ne Ni Tekone de Dios? 37 Tla amo nikinchiwa milagros kemi Notajtsi kinchiwa, amo techneltokakah. 38 Pero tla nikinchiwa milagros, amo Ne techneltokakah, yej xikinneltokakah n milagros non nikinchiwa, ijkó nonkitaskeh Notajtsi kajki nowa, iwa Ne nika íwa.

39 Oksepa okinekiah kikitskiskeh, pero Jesús okincholili.

40 Ijkuakó Jesús oksepa oyá ik nepa lado de n río Jordán, kan achto n Juan otlakuatekiaya iwa ompa omoka. 41 Miakeh oyayah inawak Jesús iwa okijtoayah:

—Juan amo okichi nion se milagro, pero nochi tlan okijto de nin tlakatl milák.

42 Iwa miakeh ompa okineltokakeh n Jesús.

<- San Juan 9San Juan 11 ->