Hebreos 3

Jesús okachi weyijkatitok ke Moisés

1 Nokniwah yolchipawakeh, Dios onomechpéjpenki para xiyetokah iaxkawah. Yika xikyekitakah n Cristo Jesús, porke Ye totlatematilti iwa non okachi weyi tiópixki itech tlan tejwah tikneltokah. 2 Porke Jesús nochipa kichiwa tlan Dios kinawatia, ijkó kemi Moisés okichi nochi tlan okinawatijkeh makichiwa inawak n israelitajtlakah. 3 Pero moneki okachi matikweyilikah n Jesús ke Moisés, ijkó kemi tikweyiliah akin okichijchi se kali, iwa amo n kali. 4 Nochi kali non tikitah, onka se akin okichijchi, pero nochi tlan onka ilwikak iwa ipan tlaltíkpaktli, Dios okichijchi. 5 Moisés okitekitili Dios, iwa nochipa okitlakitak, porke okimpalewi itlakaikniwah ijkó kemi Dios okinawati, iwa okijto tlan Dios satepa kijtoskia. 6 Pero Cristo ken Ikone Dios, kema tetlakitak iwa kimpalewia akimeh tikneltokah, iwa nonteh ye n tejwah. Iwa tejwah tikmajmana non ialtepetlakawah tla tikneltokah ika pakílistli n temakixtílistli non tikseliskeh.

Ximotlachilikah para amo nonyetoskeh kemi non amo tlaneltokah

7 Yika, matikchiwakah tlan Espíritu Santo kijtoa:

Tla axa nonkikakih itlajtol Dios,

8 amo ximoyoltlakuawakah, kemi okichijkeh n judíojteh,

non amo otetlakitakeh kan tlaltejtéyinki.

Yejwah okinekiah kitaskeh asta kani Dios kinxikoskia ika tlan amokuali okichiwayah.

9 Ompa onechyejyekojkeh nomotatawah,

maya ome póali xiwitl okitakeh nochi tlan ne onikchi.

10 Yika onikuálanki inwah nonteh tlakah,

iwa onikijto: “Inyolo nochipa kineki kichiwas tlan amokuali,

iwa amo motekawiliah manikinyakana.”

11 Yika onikuálanki inwah, iwa oniksentlali,

ayik nikinkawilis makalakikah kan Ne onikijto mosewiskia. Sal. 95:7-11

12 Nokniwah, kuali ximotlachilikah, amo kichiwa se de nomejwah moyoltlakuawas iwa kipolos itlaneltokalis, iwa moixkoyantis inawak Dios non yolitok. 13 Yej nomechilia, nochipa ximosepanyolchikawakah nochi tonati, para ijkó amaka matlajtlakolchiwa, iwa amo manomechtokti xiyoltlakuawakah. 14 Porke tejwah timochiwah iaxkawah Cristo tla nochipa titlaneltokaskeh inawak Ye kemi achto.

15 Yika kijtoa itlajkuilol Dios:

Tla itech nin tonati nonkikakih tlan Dios kijtoa,

amo ximoyoltlakuawakah kemi okichijkeh n judíojteh ijkuak okixnamikeh.

16 ¿Iwa akimeh okikakeh itlajtol Dios iwa amo okitlakamatkeh? Yejwah akimeh Moisés okinkixti de kan tlali de Egipto. 17 Iwa ¿akimeh nekateh non inwah okualantoka Dios ome póali (40) xiwitl? Dios okualantoka iwan akimeh otlajtlakolchijkeh, non satepa omijmikeh kan amaka chanti. 18 ¿Akimeh nekateh non Dios okinmili amo kalakiskiah kan Ye mosewia? Ijkó okinmili akimeh amo okitlakitakeh. 19 Milák, amo oweletkeh okalakeh kan tlali de Canaán kan mosewiskiah, porke amo okineltokakeh Dios.

<- Hebreos 2 Hebreos 4 ->