Hechos 8

Saulo kintotojtoka non okineltokayah Cristo Jesús

1 Saulo okimoli kuali makimiktikah n Esteban.

Itech non tonati, non de Jerusalén opé kintotojtokah porke okineltokayah Cristo Jesús. Nochteh ochocholojkeh omotlajtlaatitoh itech tlalmeh de Judea iwa de Samaria, iwa sanwel n tlatematiltijkeh omokajkeh. 2 Sikimeh tokniwah non okimopantiayah Dios, okitookakeh n Esteban iwa satlawel okichokilijkeh. 3 Pero Saulo okintotojtokatinemia non okineltokayah n Cristo, okalakia incha iwa okinkixtiaya kintilantiwits n tlakah iwa n siwameh, iwa okintsakuaya.

Felipe tetlapowia de itlajtol Dios itech tlali de Samaria

4 Akimeh ocholojkeh de Jerusalén, sentetl kan ik oyayah otetlapowiayah de n kualitlájtoli de Dios. 5 Felipe, oyá kan se altepetl de Samaria iwa ompa opé kintlapowia de Cristo. 6 Miakeh tlakah omoololoayah iwa ika pakílistli okikakiah tlan Felipe okinmiliaya. Okikakiah iwa okimitayah n milagros non ye okinchiwaya. 7 Porke miakeh tlakah non okimpiayah espíritus amokualteh opajtiah, iwa ijkuak n espíritus amokualteh okisayah inmijtik nonteh kokoxkeh, chikaktik otsajtsiah. Miakeh koxomeh iwa non amo oweletiah onejnemiah noiwa opajtiah. 8 Ika noni, nochteh non ochantitokah itech non altepetl okipiayah miak pakílistli.

9 Ompa Samaria ochantitoka se tlakatl non itoka Simón, ye achto otetlajchiwiaya iwa okinkajkayawaya n tlakah non ompa ochantitokah, iwa nochteh okimiliaya ye weletini. 10 Iwa nochteh okikakiah, non okachi tsijtsikitsi asta non okachi ya teta, iwa okijtoayah:

—Nin tlakatl kipia iweletilis Dios.

11 Nochteh oyayah inawak, porke ika itetlajchiwilis miak xiwitl okinkajkaya. 12 Pero ijkuak n tlakah de Samaria okineltokakeh tlan Felipe okinmatiltiaya ijkuak ye okintlapowiaya de Cristo Jesús iwa okinmajsikamatiltiaya tlan kijtosneki itlanawatil Dios, miakeh tlakah iwa siwameh omokuaatekiayah. 13 Asta inewia n Simón otlaneltokak iwa omokuaateki, iwa opé kiwikatinemi n Felipe iwa satlawel omotlajtlachialtiaya ijkuak okimitaya n wejweyi milagros iwa neskayolteh non Felipe okinchiwaya.

14 Iwa ijkuak n tlatematiltijkeh non okatkah Jerusalén okimatkeh miakeh tlakah de Samaria yokiselijkeh itlajtol Dios, okititlankeh n Pedro iwa Juan mawiah ompa. 15 Ijkuak Pedro iwa Juan okalakitoh Samaria, omotiotsajtsilijkeh inawak Dios para nochteh n tokniwah de Samaria non kineltokah Cristo Jesús, makiselikah n Espíritu Santo. 16 Porke nion seme de yejwah yokiselijka n Espíritu Santo, porke san ok omokuatekijkah itech Itoka n Toteko Jesús. 17 Ijkuakó Pedro iwa n Juan okintlalijkeh inmawah impah, iwa non kineltokah Cristo Jesús, okiselijkeh n Espíritu Santo.

18 Ijkuak Simón okitak n Espíritu Santo owaltemoaya ijkuak n tlatematiltijkeh okintlaliliayah inmawah impah, okinkakiti kinmakas tomi, 19 iwa okinmili:

—Noiwa ne techmakakah non weletílistli, para ijkuak ne nikintlalis nomawah ipan aka noiwa makiseli n Espíritu Santo.

20 Ijkuakó Pedro okili:

—Motomi mapojpoliwi mowa, ken tikyejyekolia tlan Dios kitemaka weleti mokoa ika tomi. 21 Te amitla tikpia towah nion mitsnamiki tikchiwas nin tekitl, porke moyolo amo chipawak inawak Dios. 22 Ximolnamiki, iwa xiktlatlaujti Dios mamitstlapojpolwi, chamo ijkó mitstlapojpolwilis tlan otikmoli itech moyolo. 23 Porke nikita moyolo tentok ika miak nexikólistli, iwa n tlajtlákoli mitstakatsojtok.

24 Ijkuakó Simón otlanankili:

—Xiktlatlautikah Dios amitla manechajsi ika tlan ononnechilijkeh.

25 Ijkuak yotlankeh okinmatiltijkeh itlajtol Toteko, n tlatematiltijkeh omokopkeh Jerusalén. Iwa itech miakeh altepetsitsinteh de Samaria kan ik opanotiayah, otetlapowiayah de n kualitlájtoli de Dios.

Felipe iwa n tlakatl de Etiopía

26 Satepa se iángel n Toteko okili n Felipe:

—Ximoketsa iwa xio kan tlalmeh non kateh ik tlatsintla, xikonana n ojtli non temoa de Jerusalén iwa onkisa Gaza.

Ye ni n ojtli non panoa kan tlaltejtéyinki. 27 Felipe owalmóketski iwa oyá, iwa itech ojtli okajsito se tlakatl de Etiopía. Nin tlakatl okatka eunuco[a] iwa okatka weyi tekiwa iwa tesorero inawak n reina Kandace akin otlanawatiaya kan tlali de Etiopía. Ye yowalmokopaya de Jerusalén kan okiweyijkachiwato Dios. 28 Nin tlakatl yowalmokopaya kan ialtépeu, oewatotiwalaya ipan ikarreta iwa okiamapoaya se amatlajkuíloli non okijkuilo n profeta Isaías. 29 Ijkuakó n Espíritu Santo okili n Felipe:

—Xikajsiti neká karreta iwa ximonetecho inakastla.

30 Ijkuak Felipe okajsito n tlakatl etíope, okikak okiamapoaya itlajkuilol n profeta Isaías, iwa okitlajtlani:

—¿Tikajsikamati tlan tikamapoa?

31 N tlakatl okinankili:

—¿Kenomi nikajsikamatis, tla amaka nechajsikamatiltia?

Iwa okitlatlaujti n Felipe matlejko ipan ikarreta iwa mamotlali inakastla.

32 Iwa ye ni n tlájtoli non okiamapoaya n tekiwa de Etiopía:

Kemi se ichkatsi okiwikakeh kan tlamiktilo;

iwa ijkó kemi se ichkakonetl amo tsajtsi ijkuak kiximah,

ijkó Ye amitla okijto keman okimiktijkeh.

33 Inmixpah nochteh okipijpinawijkeh iwa amaka okitlajtolpalewi;

¿akin weletis techinmititis ipilwah?,

porke okimiktijkeh itech nin tlaltíkpaktli. Is. 53:7-8

34 N etíope okitlajtlani n Felipe:

—Nimitstlatlaujtia, techili, ¿de akin tlajtoa n profeta, de ye inewia noso de ok se?

35 Ijkuakó Felipe opé kitlapowia de non tlajkuíloli n etíope kan okiamapoaya, iwa opé kajsikamatiltia n kualitlájtoli de Jesús. 36 Okalakitoh kan okatka atl, iwa n tekiwa etíope okijto:

—Nika onka atl, amaka nechtsakuilia manimokuaateki.

37 Felipe okili:

—Tla milák titlaneltoka ika nochi moyolo, weletis timokuaatekis.

N tlakatl okinankili:

—Nikneltoka Cristo Jesús, Ye Ikone n Totajtsi Dios.

38 Ijkuakó otlanawati makiketsaltikah n karreta, iwa san ken ome otemokeh ijtik atl, iwa Felipe okikuaateki n tlakatl etíope. 39 Ijkuak owalkiskeh ijtik atl, Iespíritu n Toteko Dios okiwík n Felipe, iwa n tekiwa etíope ayakmó oksepa okitak; iwa oyá icha ika pakílistli. 40 Pero Felipe okalakito kan altepetl de Azoto, iwa opé kitematiltia n kualitlájtoli de Dios itech miakeh altepemeh asta okalakito Cesarea.

<- Hechos 7 Hechos 9 ->