Hechos 2

Totajtsi Dios kualtitlani n Espíritu Santo

1 Ijkuak oajsiko n ilwitl de Pentecostés, nochteh non okineltokakeh n Cristo Jesús okatkah sansikah itech se kali.

2 San nima owaltlatékuinki kan ilwikak, kemi ijkuak tlaxojpitsa se ejekatl chikaktik, iwa omonawaloti ijtik nochi n kali kan yejwah oewatokah. 3 Ijkuakó okinmonextilijkeh sikimeh kemi nenépilteh milintokeh non omoxexelojkeh impah nochteh. 4 Iwa nochteh okiselijkeh n Espíritu Santo, iwa opé tlajtoah ika tlatlamanteh tlájtolteh. Iwa okijtoayah tlan n Espíritu Santo okinmiliaya makijtokah.

5 Itech nonteh tonatijmeh, ompa Jerusalén okatkah miakeh judíojteh non satlawel okimopantiayah itlanawatil Moisés. Ninteh judíojteh owalajkeh de nochi lado de nin tlaltíkpaktli. 6 Ijkuak okikakeh non tlatekuinílistli, san nima owalmoololojkeh miakeh tlakah, iwa mach ok okimatiah tlan kijtoskeh, porke yejwah opé kikaki kintlapowiah ika intlajtol. 7 Yejwah satlawel omotlajtlachialtijkeh, iwa okijtojkeh:

—¿Amo de Galilea nochteh ninteh non tlajtojtokeh? 8 ¿Tleka kiné, tikinkakih tlajtoah ika totlajtol non tejwah ipan otitlakatkeh? 9 Nika kateh sikimeh tlakah de Partia, de Media, de Elam, de Mesopotamia, de Judea, de Capadocia, de Ponto iwa de Asia, 10 de Frigia iwa de Panfilia, de Egipto iwa de tlalmeh de África, non kateh okachi tlayakapa de Cirene. Nika noiwa chantitokeh sikimeh tlakah de Roma. 11 Noiwa nika kateh sikimeh tlakah non owalajkeh de Creta iwa de Arabia. Iwa ika tejwah totlajtol tikinkakih kenijki yejwah kimijtoah n milagros non Dios yokinchi.

12 Nochteh san omotlajtlachialtiayah iwa mach okimatiah tlan kijtoskeh, iwa omotlatlajtlaniayah:

—¿Tlan kijtosneki nochi ni?

13 Pero oksikimeh san otepijpinawiayah, iwa okijtoayah:

—¡Ninteh tlakah wintitokeh!

Pedro omóketski iwa opé tlajtoa

14 Ijkuakó Pedro omóketski iwa n májtlakteh iwa n se tlatematiltijkeh, iwa chikawak opé tlajtoa:

—Judíos iwa nochteh akimeh nonchanchijtokeh nika Jerusalén, xikmatikah nochi ni, iwa kuali xikkakikah tlan nomechilis. 15 Ninteh tlakah amo wintitokeh kemi nomejwah nonkimoliah, porke wel ok kualka, sikin las nueve de kuinal. 16 Porke nochi tlan axa panotok, ye noni tlan yowejka okijto n profeta Joel:

17 N Totajtsi Dios kijtoa:

Itech sa iksemi tonatijmeh,

niktitlanis no Espíritu itech nochteh n tlaltikpaktlakah.

Nomopilwah iwa nomochpochwah kijtoskeh tlan tlamochiwas satepa.

Nomotelpochwah kinmitaskeh neskayolteh

iwa n tetajtsitsinteh tejtemikiskeh.

18 Itech nekateh tonatijmeh niktitlanis no Espíritu itech n tlakah iwa siwameh akimeh tekiti nonawak,

iwa tetlapowiskeh tlan satepa tlamochiwas.

19 Tlakpak kan ilwikak iwa tlatsintla itech tlaltíkpaktli:

nikinteititis neskayolteh,

estli, tletl iwa méxpoktli.

20 N tonati ayakmó tlawis,

iwa n metsi chichilewis kemi estli,

achto de maajsiki itonati n Toteko,

non tonati yetos weyi iwa mawistik.

21 Iwa nochteh akimeh kitenewaskeh Itoka n Toteko, Ye kinmakixtis.

22 'Tlakah de Israel, xikkakikah tlan nomechilis: Jesús de Nazaret, Dios okipéjpenki. Nomejwah kuali nonkimatokeh, porke Dios okimák weletílistli para makinchiwa wejweyi neskayolteh nomoixpa, kemi nomejwah kuali nonkimatokeh. 23 Pero nomejwah ononkikitskijkeh iwa ononkitemaktijkeh inmak tlakah tlajtlakolejkeh, iwa yejwah okimiktijkeh ipan krus, ijkó kemi Dios yokimatia iwa okimonekilti ijkó mamochiwa. 24 Pero Totajtsi Dios okiyoliti. Ye okitekixtili imak n mikílistli, porke n mikílistli mach owéletki okítlanki. 25 N rey David otlajto de Cristo Jesús ijkuak okijto:

Nochipa onikitaya n Toteko noyakapa;

amitla weletis nechmojtis, porke ye kajki nomayekma.

26 Yika niyolpaki,

iwa nitlakuika ika pakílistli,

iwa maya niwilantos,

kuali nikmatok oksepa nimoyolitis.

27 Porke mach tikkawas noalma kan miktla,

nion tikkawas maijtlakawi ikuerpo Mokone yolchipawak.

28 Otechimititi n ojmeh non nechwikah kan nochipa niyolitos,

iwa tikchiwas satlawel maniyolpaki ijkuak niyetos monawak.

29 'Nokniwah, kuali tikmatokeh totata rey David omikki iwa okitookakeh, porke asta axa tikmatokeh kan omotook. 30 Pero David okatka profeta, iwa kuali okimatia n Dios okisentlali seme de iixwiwah non walaskia okachi satepa yetoskia n Cristo. Ye mochiwaskia rey kemi okatka n David. 31 Ijkó, kemi yaskia inewia kontlajtlatok, David okijto Cristo moyolitiskia iwa Dios amo kikawaskia ikuerpo maijtlakawi miktla. 32 Dios okiyoliti n Jesús iwa tinochteh otikitakeh. 33 Ijkó kiné, ik iyekma Totajtsi Dios okiweyijkatlali n Jesús, iwa Jesús okiseli n Espíritu Santo non Itajtsi yokijtojka kitemakas. Iwa axa yotechaltítlanili n Espíritu Santo non axa nonkitah iwa nonkikakih. 34 David amo otlejkok ilwikak. Pero inewia okijto:

Notajtsi Dios okili Noteko:

“Ximoyayanti noyekma,

35 asta manikintlali non mitskokolia itlampa mokxiwah.” Sal. 110:1

36 'Tlakah de Israel, kuali xikmatikah, nin Jesús Akin nomejwah ononkikrusifikarojkeh, Dios okiweyijkatlali para mayeto Nomoteko iwa Nomotemakixti.

37 Ijkuak ijkó okikakeh, nochteh omoyolkokojkeh iwa okitlajtlanijkeh n Pedro iwa n oksikimeh tlatitlanilti:

—Tokniwah, ¿tlan moneki matikchiwakah?

38 Ijkuakó Pedro okinnankili:

—Xikilikah Dios manomechtlapojpolwi iwa xiktlakitakah, iwa ximotekawilikah manomechkuaatekikah itech Itoka n Cristo Jesús, ijkó Dios nomechtlapojpolwis de nomotlajtlakolwah iwa nonkiseliskeh n Espíritu Santo. 39 Nin tlájtoli non yowejka omosentlali omochi para nomejwah iwa nomopilwah, noiwa para nochteh akimeh Totajtsi Dios kinekis kinmakixtis itech nochi n tlaltíkpaktli.

40 Pedro ok okintlapowiaya n tokniwah íwa ika miak chikawálistli okimiliaya:

—¡Ximomakixtikah de n tlaijyowílistli non kiseliskeh akimeh tlajtlakolchijtinemih!

41 Ijkó kiné, akimeh okikakeh tlan Pedro okinmachti, omokuaatekijkeh; iwa non tonati omoseitilijkeh iwan tokniwah non kineltokah Cristo Jesús kemi eyi mil tlakah. 42 Iwa nochteh omochijchikawayah iwa okichiwayah tlan n tlatematiltijkeh okinmachtiayah, omoyekwikayah, omotiotsajtsiliayah iwa omoololoayah para kisepankuaskeh n paj.

Kenomi omoyekwikayah non sikinika okineltokakeh Cristo Jesús

43 Nochteh omotlajtlachialtiayah, porke itlatitlanilwah n Cristo okinchiwayah miakeh milagros iwa okinextiayah tlan amayik omotaya. 44 Nochteh non okineltokakeh omoyekwikayah, iwa okimosepanxexeliliayah tlan okipiayah. 45 Okinemakayah nochi tlan okipiayah, iwa okinxejxeliliayah n tomi akimeh okimpoloaya. 46 Ixmostla omoololoayah kan Weyi Tiopa, iwa incha okisepankuayah n paj, iwa sansikah omotlamajsewiayah ika pakílistli. 47 Okiweyijkachiwayah Dios, iwa nochteh n tlakah de non altepetl okinyekitayah. Ixmostla omomiakiliayah non okineltokayah akimeh n Toteko Dios okinmakixtijtiaya.

<- Hechos 1 Hechos 3 ->