Link to home pageLanguagesLink to all Bible versions on this site
12
N weletílistli non techmaka n Espíritu

1 Nokniwah, nikneki xikmatikah ke n Espíritu techmajmaka iweletilis tinochteh. 2 Nomejwah kuali nonkimatih, ijkuak ayamó ononkineltokayah Cristo Jesús, onomechtoktiayah xikinweyilikah diosmeh non kinmachijchiwah iwa amo tlajtoah. 3 Yika, axa nikneki kuali xikmatikah akin tlajtoa ika iweletilis n Espíritu amo weletis kiwijwikaltis n Cristo Jesús. Noiwa akin amo tlajtoa ika iweletilis n Espíritu, mach weletis kijtos, “¡Jesús, Ye Noteko!”

4 Onka tlatlámantli tlatliokólili non se weletis kiselis, pero san se Espíritu akin kitemaka. 5 Onka tlatlámantli toteki tlan ika weletis tiktekichiwiliskeh, pero onka san se Toteko. 6 Weletis tikchiwaskeh san miak, pero onka san se Dios akin kichiwa nochi tekitl intech n tlakah. 7 N Espíritu sejse kinmaka se weletílistli para manomechompalewi.

8 Sikimeh n Espíritu kinmaka weletílistli para matetlapowikah ika ixtlamatílistli.
Iwa oksikimeh kinmaka weletílistli para matlajtokah tlan oksikimeh amo okimatiah.
9 Iwa oksikimeh, n Espíritu kinmaka weletílistli para matlaneltokakah.
Oksikimeh kiseliah weletílistli para makimpajtikah kokoxkeh san ika se Espíritu.
10 Oksikimeh, n Espíritu kinmaka weletílistli para makinchiwakah milagros,
iwa oksikimeh para matetlapowikah tlan Dios kineki matikchiwakah.
Oksikimeh, n Espíritu kinchiwa mayetokah ixtlamatkeh para makimatikah katliejmeh tlajtojtokeh ika Espíritu iwa katliejmeh amó.
Oksikimeh, n Espíritu Santo kinmaka weletílistli para matlajtokah ika oksikimeh tlájtolteh.
Iwa oksikimeh, n Espíritu kinmaka weletílistli para makinmajsikamatikah nonteh tlájtolteh yankuikeh iwa makijtokah tlanón kijtosnekih.
11 Pero nochi noni kichiwa non san Ye se Espíritu, Akin kinxejxelilia iweletilis nochteh ijkó kemi Ye kimonekiltia.
Tinochteh tikateh san itech se kuerpo

12 Cristo kemi se kuerpo non kimpia miakeh iomiowah, iwa ninteh iomiowah maya miakeh kimajmana san se kuerpo. 13 Porke tejwah tinochteh, tla tiyetoskeh tijudíojteh noso amo tijudíojteh, titlanémakteh noso amó, ijkuak otimokuaatekijkeh, axa ya tikmajmana san se kuerpo porke tikpiah san se Espíritu, iwa tinochteh otitlaonikeh san itech non Espíritu.

14 Se kuerpo amo majmantok san ika se omitl, yej ika miakeh omiomeh. 15 Tla se tokxi kijtoskia: “Ne amo nimaitl, yika ne amo niteaxka itech nin kuerpo”, amo por noni ayakmó yetos teaxka itech non kuerpo. 16 Iwa tla se tonakas kijtoskia: “Ne amo niixtololotl, yika ne amo niteaxka itech nin kuerpo”, amo por noni ayakmó yetos teaxka itech non kuerpo. 17 Yika, tla nochi n kuerpo yaskia ixtololotl, ¿kenomi titlakakiskiah? Noso tla nochi n kuerpo yaskia nákastli, ¿kenomi titlaijnekuiskiah? 18 Pero Dios okimájmanki tokuerpo kemi Ye okimonekilti. 19 Tla nochi tokuerpo yaskia ixtololotl, ¿kenomi yaskia tokuerpo? 20 Yika, maya tikpiah toma, tonakas, toixtololo noso tokxi, san se kuerpo tikpiah.

21 Toixtololo amo weletis kilis n toma: “Amo techpoloa”; nion totsonteko weletis kinmilis tokxiwah: “Amo nonnechpoloah.” 22 Mach ijkó, porke tlan itech tokuerpo tikmoliah amo chikawak, ye tlan okachi moneki. 23 Tlan tikmoliah amo weyi kijtosneki itech tokuerpo, ye tlan okachi tikmokuitlawiah. Iwa tlan itech tokuerpo nikmolia amo okachi ipati, ye tlan okachi tikyektlakentia. 24 Porke tlan okachi kualtsi itech tokuerpo, amo moneki matikyekchijchiwakah. Ijkó Dios okiyekchijchi tokuerpo para tlan tikmoliah amo okachi ipati, moneki mamotlakita okachi. 25 Ijkó okichijchi para amo mamoxexelo tokuerpo, yej nochi tlan kimajmantok tokuerpo mamosepantlachilikah. 26 Yika, ijkuak se tokxi noso se toma mokokoa, nochi tokuerpo tlaijyowia. Iwa tla se tokxi noso se toma okachi tikmokuitlawiah, nochi tokuerpo mokawa ika pakílistli.

27 Ijkó kiné, nochteh nomejwah nonkimajmanah ikuerpo n Cristo, iwa non sejsemeh non sasalitokeh itech non kuerpo.

28 Ijkó, Dios okinmajmak tlatlamantli tekitl non Ye okinpéjpenki. Achto, okintlali

tlatematiltijkeh,
satepa non kitematiltiah itlajtol Dios non Ye kinmilia makitematiltikah,
satepa, tlamachtijkeh,
satepa, non kinchiwah milagros,
satepa, non kimpajtiah kokoxkeh,
oksikimeh non tlapalewiah,
oksikimeh non tlayakana,
iwa oksikimeh matlajtokah ika oksikimeh tlájtolteh.
29 Xikitakah, amo nochteh tlatematiltijkeh, nion amo nochteh profetas. Amo nochteh tlamachtijkeh, nion amo nochteh kinchiwah milagros. 30 Amo nochteh okiselijkeh weletílistli para kimpajtiskeh kokoxkeh, amo nochteh tlajtoah ika oksikimeh tlájtolteh, nion amo nochteh weletih kiteajsikamatiltiah tlan kijtoah nonteh tlájtolteh. 31 Nomejwah xiktlajtlanilikah manomechmaka tlan okachi kuali itlatliokolil Dios.
Pero ne nomechititis ok se nemílistli tlan okachi ipati.

<- 1 Corintios 111 Corintios 13 ->