Link to home pageLanguagesLink to all Bible versions on this site

Nopa Amatlajcuiloli para nopa Hebreo Tlaneltocani

1
Toteco technojnotztoc ica Icone, Jesucristo

1 Huejcajya Toteco Dios quinnojnotzqui tohuejcapan tatahua miyacpa ica itlajtol pannextijcahua. Quemantic quinnojnotzqui itlajtol pannextijcahua ipan temictli, quemantic ica tlanextili huan quemantic itztoya nechca inijuanti quema quincamanalhuiyaya. 2 Pero ama ipan ni tlayacapan tonali Toteco technojnotztoc ica Icone catli yaya techtitlanili. Toteco Dios quitequimacac Icone ma quichijchihua nochi tlamantli catli onca huan quiijtojtoc para nochi catli onca eltoc iaxca. 3 Itlatlanex Toteco Dios cahuani ipan Icone pampa Icone itztoc san se ica ya. Quena, Jesucristo itztoc quen iixcopinca catli technextilía quenicatza itztoc Toteco Dios. Ica icamanal, Icone Toteco quimajcuitoc nochi catli onca ipan tlaltipactli huan ilhuicactli campa eltoc, pampa icamanal tlahuel quipiya chicahualistli. Yaya mijqui para techpajpacas tlen totlajtlacolhua huan teipa yajqui ilhuicac huan mosehuito inejmac Toteco Dios campa más onca tlatlepanitacayotl.

Icone Toteco itztoc más hueyi que nochi itequihuajcahua Toteco

4 Ya ni technextilía para Icone Toteco itztoc más hueyi que nochi itequihuajcahua Toteco, pampa Toteco quimacac Icone se tequiticayotl [1:4 O se itoca.] catli onpano más hueyi que nopa catli itequihuajcahua quipiyaj. 5 Toteco Dios amo quema quiilhuijtoc se itequihua catli quiilhui Icone quema quiijto:

“Ta tiNocone. Ama nitlayolmelahua tlamiyacapa para na nimoTata.”
Huan amo quema quiijto tlen se itequihua:
“Na nielis iTata huan yaya elis Nocone.”
6 Huan ijcuilijtoc ipan seyoc lugar catli quiijtos Toteco Dios quema quiixnextis ipan tlaltipactli Icone catli quipiya hueyi tlatlepanitacayotl, huan ya ni catli quiijtos Toteco Dios:
“Ma quihueyichihuaca nochi notequihuajcahua.”
7 Ijcuilijtoc ipan Icamanal Toteco tlaque inintequi itequihuajcahua, huan ya ni catli quiijtohua:
“Toteco Dios quinchijqui itequihuajcahua ma itztoca tonaltzitzi.
Quena, quintequihuía quen tlayolmelahuani catli itztoque quen tlilelemectli.”
8 Pero quema Toteco Dios quicamanalhui Icone, ijcuilijtoc para ya ni catli quiijto:
“Ta tiDios, titlanahuatis para nochipa huan amo quema tlamis motlanahuatilis.
Titlatlajtolsencahuas senquistoc xitlahuac huan temachtli.
9 Mitzpactía nochi catli cuali huan tijcualancaita nochi catli amo cuali.
Yeca Toteco Dios, yaya catli moTeco,
mitztequitlalijtoc tiitlanahuatijca huan mitzmacatoc más paquilistli que nochi sequinoc.”
10 Nojquiya Toteco Dios quiilhui Icone:
“NoTeco, ipan ipejya nochi catli onca, ta tijchijchijqui itlatzinpehualtil tlaltipactli.
Ta tijchijchijqui nochi hasta ilhuicactli ica momax.
11 Nochi inijuanti tlamise, pero ta, tiitztos para nochipa.
Tlaltipactli huan ilhuicactli sosolihuise quen sosolihui se yoyomitl.
12 Tiquinmimilos quen elisquía se tlaquemitl catli sosoltic huan ya ajsic hora para tlantiyas.
Pero ta, noTeco, tielis san se para nochipa.
Amo quema tihuehuejtiyas, niyon amo quema tlamis monemilis.”
13 Huan Toteco Dios amo quema quiilhui se itequihua quen quiilhui Icone ipan ni camanali:
“Ximosehui nica nonejmac campa onca más tlatlepanitacayotl,
hasta nijchihuas para tiquinnahuatis nochi mocualancaitacahua.”
14 Itequihuajcahua Toteco itztoque san tonaltzitzi catli tetequipanohuaj. Quena, Toteco quintitlantinemi para quinpalehuise huan quinmocuitlahuise nochi masehualme catli Toteco quintlapejpenijtoc para quinmaquixtis tlen inintlajtlacolhua.

HEBREOS 2 ->